Apocalipsis 5 - DIOSPA QHELQACHISQ

Cordero k'uyusqa p'anqata kicharin

¹ Chantá noqa chay kamachina tiyanapi tiyasqa kajpa paña makinpi rikorqani uj k'uyusqa p'anqata. Chay k'uyusqa p'anqaqa ukhunpi jawanpi ima qhelqasqa karqa, qanchis sellowantaj sellasqa.

² Rikullarqanitaj atiyniyoj uj angelta, paytaj jatunmanta parlaspa, taporqa: Pitaj sellokunata llik'ispa kay p'anqata kicharinanpaj jina kanmanri? nispa.

³ Chaywanpis mana pipis janaj pachapi, kay pachapi, nitaj jallp'a urapipis p'anqata kicharinanpaj jina karqachu chaypi qhelqasqata ñawirinanpaj.

⁴ Chantá noqa maytapuni waqarqani, mana ujllapis chay p'anqata kicharispa ñawirinanpaj kasqanrayku.

⁵ Kuraj runakunamanta ujninrí niwarqa: Ama waqaychu. Judá jatun ayllumanta León, pichus kuraj kamachej Davidpa kamachinan tiyanata chayaqeta jina jap'ej, chaymin atipasqanrayku qanchis sellokunata llik'ispa, kay p'anqata kichariyta atin, nispa.

⁶ Jinapi noqaqa uj Corderota rikorqani, wañuchisqapis kanman karqa jinaman rijch'akojta. Payqa kamachina tiyanaj chawpinpi, chantá tawa kawsajkunaj chawpinkupi, kurajkunaj chawpinkupiwan sayasharqa. Paytaj qanchis wajrayoj, chantá qanchis ñawiyoj ima karqa. Chayqa Diospa qanchis jinamanta rejsichikoj Santo Espíritun, pitachus Dios tukuy kay pachaman kachamusqa, chay.

⁷ Corderotaj qayllaykuspa, kamachina tiyanapi tiyashajpa paña makinmanta chay p'anqata jap'erqa.

⁸ P'anqata jap'isqantawantaj, chay tawa kawsajkuna, chantá chay iskay chunka tawayoj kurajkuna ima Corderoj ñawpaqenpi pampakama k'umuykorqanku. Sapa ujninku arpata jap'isharqanku, chantá qorimanta copapi inciensowan junt'asqata. Copapi inciensoqa Diospa ajllakusqanpa mañakusqankuwan ninakorqa.

⁹ Chantá paykuna uj mosoj takiyta takispa, nerqanku: Qanllamin chay k'uyusqa p'anqata jap'inaykipaj jina kanki, sellonkunatataj llik'inaykipaj, imaraykuchus qan wañuchisqa karqanki. Jinallataj qanmin cruzpi wañuspa yawar jich'asqaykiwan runakunata ranterqanki Diospata kanankupaj tukuy ayllumanta, tukuy imaymana rimayniyojta, tukuy imaymana rijch'aj runata, chantá tukuy suyumanta ima.

¹⁰ Jinallataj paykunata ruwarqanki Diosninchejpaj kuraj kamachejkuna, chantá sacerdotekuna ima kanankuta, paykunataj kay pachapi kamachenqanku, nispa.

¹¹ Chantá ujtawan qhawaspa, noqa kamachina tiyanaj muyuyninpi ashkha angelkunaj parlasqankuta uyarerqani, chay angelkunataj waranqa waranqa karqanku. Uyarillarqanitaj kawsajkunaj, chantá kurajkunaj parlasqankuta.

¹² Tukuyninku jatunmanta parlaspa, nisharqanku: Pichus wañuchisqa karqa, chay Corderoqa tukuy atiyniyoj, may jina qhapaj, tukuy yachayniyoj, chantá sinch'i kallpayoj kasqanta tukuy rimarichunku. Chayrayku maypaj qhawasqa, jatunchasqa, yupaychasqataj ima kachun, nispa.

¹³ Jinallataj noqa tukuy ima ruwasqa kajta janaj pachapi, kay pachapi, jallp'a urapi, mama qochapi ima ajinata takejta uyarillarqanitaj: Kamachina tiyanapi tiyasqa kajman, Corderomanpis wiñay wiñaypaj kachun maypaj qhawasqa kay, jatunchasqa kay, tukuy atiy ima, nispa.

¹⁴ Tawantin kawsajkunataj kuticherqanku: Ajina kachun, nispa. Chay iskay chunka tawayoj kurajkunataj pampakama k'umuykuspa, Corderota yupaycharqanku.