Apocalipsis 4 - DIOSPA QHELQACHISQ

Janaj pachapi Diosta yupaychanku

¹ Chaykuna qhepanta, noqa janaj pachapi uj punku kichasqata rikorqani. Chantá qallariypi trompeta jina jatunmanta parlamojta uyarerqani, paytaj niwarqa: Kayman qayllamuy, noqataj qhepanejman imakunachus kanan kashan, chaykunata rikuchisqayki, nispa.

² Chantá chay kikinpacha Santo Espíritoj kamachiyninpi kaspa, noqa janaj pachapi kamachina tiyana churasqata rikorqani. Chay kamachina tiyanapitaj uj runa tiyasqa kasharqa.

³ Pichus kamachina tiyanapi tiyajqa jaspe sutiyoj rumi jina, chantá cornalina sutiyoj rumi jina lliphipisharqa. Jinallataj kamachina tiyanaj muyuyninpi k'uychi karqa, chaytaj esmeralda sutiyoj rumi jina lliphipisharqa.

⁴ Rikullarqanitaj chay kamachina tiyanaj muyuyninpi iskay chunka tawayoj kamachina tiyanakunata. Chaykunapitaj iskay chunka tawayoj kuraj runakuna tiyasharqanku. Paykuna yuraj p'achayoj, chantá umankupi qori pilluyoj karqanku.

⁵ Jatun kaj kamachina tiyanamanta lliuj lliujkuna llijusharqa, qhon qhonkunapis t'ojyasharqa. Jinataj qanchis nina jachonkuna kamachina tiyanaj ñawpaqenpi lawrasharqanku. Chayqa Diospa qanchis jinamanta rejsichikoj Santo Espíritun karqa.

⁶ Kamachina tiyanaj ñawpaqenpitaj vidriomanta mama qocha jina cristalman rijch'akoj karqa. Kamachina tiyanaj chawpinpi, chantá muyuyninpi ima tawa kawsajkuna karqanku. Paykuna ñawpaqenkupi, qhepankupipis ashkha ñawiyoj karqanku.

⁷ Ñawpaj kaj kawsajqa leonman rijch'akorqa, iskay kaj kawsajtaj toroman. Kinsa kaj kawsajqa runaman rijch'akorqa, tawa kaj kawsajtaj phawashaj ankaman.

⁸ Chay tawantin kawsajkunaqa sapa ujninku sojta lijrayoj karqanku, lijrankunataj patanpi ukhunpi ashkha ñawiwan junt'a karqa. Chantá tuta p'unchay mana sayk'uspa, nisharqanku: May llimphu, may llimphu, may llimphupuni Tukuy Atiyniyoj Diosqa, pichus karqapuni, kashantaj, jamonqataj, chay, nispa.

⁹ Chay kawsajkunaqa kamachina tiyanapi tiyasqa kajta pachis nispa yupaychanku, pichus wiñay wiñaypaj kawsan, chayta.

¹⁰ Ajinata chay kawsajkuna ruwashajtinku, chay iskay chunka tawayoj kuraj runakunaqa kamachina tiyanapi tiyasqa kajpa ñawpaqenpi qonqoriykukuspa, wiñay wiñaypaj Kawsajta yupaychallankutaj. Chantá pillunkukunata kamachina tiyanaj ñawpaqenman churaspa, ninku:

¹¹ Tukuyta Kamachej Diosniyku, qanllamin jatunchanapaj jina kanki, may sumajpaj jina qhawana, tukuy atiyniyojtaj, imaraykuchus qanmin tukuy kaj chhikata ruwarqanki. Qan chaykunata ruwarqanki, kunankamataj munasqaykirayku kashallankupuni, nispa.