Apocalipsis 3 - DIOSPA QHELQACHISQ

Sardis llajtapi iglesiapaj willay

¹ Chantá Jesucristo niwarqa: Sardis llajtapi iglesiaj angelninman kay nisqayta qhelqay: Pichus Diospa qanchis jinamanta rejsichikoj Santo Espiritunta, chantá qanchis ch'askakunata ima jap'in, chay nisunki: Noqaqa tukuy ima ruwasqaykita rikuni, yachallanitaj tukuy kasuwaspa purisqaykita yuyasqankuta. Chaywanpis chayqa mana jinachu. Qanqa mana kasuwaspachu purinki.

² Chayrayku rijch'ariy. Qan imakunatarajchus allinta ruwashanki, chaykunata astawan allinta ruwanaykipaj atisqaykita ruway, imajtinchus chaykunapis ña chinkapunanpaj jinaña kashan. Noqa rikuni imatachus ruwasqayki mana Diosniypa munasqanman jinachu kasqanta.

³ Chayrayku Diosmanta imatachus yachakusqaykita yuyarikuy, chantá watej kasuy, noqamantaj kutirikamuy. Manachus rijch'arinki chayqa, suwa jina mana yuyasqayki p'unchayta jamusaj.

⁴ Chaywanpis Sardis iglesiapi pisilla juchallispa mana ch'ichichakojkuna kanku. Paykuna yuraj p'achawan p'achallisqa noqawan purenqanku, chaypaj jina kasqankurayku.

⁵ Tukuy atipajkunaqa yuraj p'achawan p'achallichisqa kanqanku, manataj kawsay p'anqamanta sutinkuta orqhosajchu. Manachayqa Tataypa ñawpaqenpi, chantá angelninkunaj ñawpaqenpi ima rejsichisaj paykuna noqajta kasqankuta.

⁶ Pichus nisqayta jap'ikuyta munajqa imatachus Santo Espíritu iglesiakunaman nisqanta uyarichun.

Filadelfia llajtapi iglesiapaj willay

⁷ Filadelfia llajtapi iglesiaj angelninman kay nisqayta qhelqay: Kay jinata nin May Llimphu Kaj, Cheqa Kaj, pichus kuraj kamachej Davidpa llaventa jap'in, chay. Pay punkuta kicharejtin, mana pipis wisq'ayta atinchu, punkuta wisq'ajtintaj, mana pipis kichariyta atinchu.

⁸ Noqaqa tukuy ima ruwasqaykita rikuni. Jinataj ñawpaqeykipi uj punkuta kicharini, chaytataj mana pipis wisq'ayta atinmanchu. Qanqa pisi kallpayoj kashaspapis, nisqayta kasorqanki, manataj mana rejsiwaj tukorqankichu.

⁹ Noqaqa Kuraj Supaypa t'aqanmanta kajkunata, pikunachus judío kasqankuta ninku, manataj judiochu kanku, chaykunata ruwasaj ñawpaqeykiman jamuspa qonqorikunankuta. Ajinamanta paykuna yachanqanku noqa qanta mayta munakususqayta.

¹⁰ Qanqa pacienciawan suyanaykita kamachisqayta kasorqanki. Chayrayku noqapis ñak'ariy p'unchaypi qanta waqaychasqayki. Chay ñak'arinaqa tukuy kay pachapi kaj chhika runakunaman jamonqa imayna sonqoyojchus kasqanku yachakunanpaj.

¹¹ Noqaqa usqhayta kutimusaj. Chayrayku qanqa, imachus tiyapusunkiraj, chaymanta ch'ipakuy, ama pipis pilluykita qhechusunanpaj.

¹² Jinataj tukuy atipajkunataqa Diosniypa Templonpi sayanta jina kanankuta ruwasaj, manataj jayk'ajpis chaymanta kuyurichisqachu kanqanku. Jinallataj noqaqa Diosniypa sutinta paykunapi qhelqasaj, Diosniypa llajtanpa sutintawan ima. Chayqa mosoj Jerusalén, mayqenchus janaj pachamanta, chantá Diosniymanta ima urayk'amonqa, chay. Mosoj sutiytapis paypi qhelqallasajtaj.

¹³ Pichus nisqayta jap'ikuyta munajqa Santo Espíritu iglesiakunaman imatachus nisqanta uyarichun.

Laodicea llajtapi iglesiapaj willay

¹⁴ Laodicea llajtapi iglesiaj angelninman kay nisqayta qhelqay: Ajina kachun nej, cheqanta willaj, mana llullakoj testigo, pinejtachus Dios tukuy imata qallariypi ruwarqa, chay nisunki:

¹⁵ Noqaqa tukuy ima ruwasqaykita rikuni. Jinallataj yachani qanqa mana tukuy sonqochu kasuwasqaykita, manachayqa tumpallata. Allin kanman tukuy sonqo kasunawayki, chayrí mana kasunawayki.

¹⁶ Qan tumpallata kasuwasqaykirayku, noqaqa qhesachasqata qhesachasqayki.

¹⁷ Qanqa nishanki: Noqaqa qhapaj kani, tukuy imayoj, manataj imamantapis pisinichu, nispa. Jinapis mana reparakunkichu khuyana kasqaykita, mana imayoj, wajcha, ñawsa, q'alallataj.

¹⁸ Chayrayku noqamanta ninapi sumaj ch'uwachasqa qorita rantikunaykita yuyaychayki, cheqapuni qhapaj kanaykipaj. Chantá yuyaychayki p'achallikunaykipaj yuraj p'achata rantikunaykita, ama q'alalla kasqaykirayku p'enqakunaykipaj. Yuyaychallaykitaj rantikunaykita ñawiykipaj jampita, sut'ita rikuyta atinaykipaj.

¹⁹ Noqaqa tukuy pitachus munakusqayta k'amispa cheqan ñanman churani. Chayrayku tukuy sonqo kasuway, noqamantaj kutirikamuway.

²⁰ Noqaqa punkuykipi kashani, takashanitaj. Sichus wajyasqayta uyarispa punkuta kicharimuwanki chayqa, noqa wasiykiman yaykusaj, qanwan khuskataj mikhusaj.

²¹ Tukuy atipajkunaqa kamachinay tiyanapi noqawan tiyanqanku, imaynatachus noqapis atipaspa Tataywan khuska kamachinan tiyanapi tiyaykukorqani, ajinata.

²² Pichus nisqayta jap'ikuyta munajqa Santo Espíritu iglesiakunaman imatachus nisqanta uyarichun, nispa. Ajinata Jesús nerqa.