Apocalipsis 22 - DIOSPA QHELQACHISQ

¹ Chay qhepata angelqa kawsaj yakuyoj ch'uwa mayuta rikuchiwarqa, cristal jina lliphipejta, mayqenchus Diospa kamachina tiyananmanta, chantá Corderojmantawan llojsimusharqa, chayta.

² Chay mayoqa llajtaj jatun callenpa chawpinta purisharqa, chay mayoj puraj chimpanpitaj kawsachej sach'akuna karqa, mayqenchus sapa wata chunka iskayniyoj kutita poqoj, sapa killa uj kutita, chay sach'a. Chay sach'akunaj laqhentaj kay pachapi tukuy runata qhaliyachinanpaj jampi karqa.

³ Chay llajtapi manaña imapis Diospa maldicisqan kaj kanqañachu, imaraykuchus Diospa kamachinan tiyana, chantá Corderojpatawan ima chaypi kanqa, kamachinkunataj payta yupaychanqanku.

⁴ Paykuna Diospa uyanta rikonqanku, sutintaj mat'inkupi qhelqasqa kanqa.

⁵ Chaypi tutaqa manaña kanqachu. Manataj lamparaj k'anchananqa kanqañachu, nitaj inti k'anchananpis, imaraykuchus Dios, pichus Tukuyta Kamachej Kajqa paykunata k'anchanqa. Chantá Diospa kamachinkuna wiñaypa wiñaynintinpaj kamachenqanku.

Jesucristo kutimonqapuni

⁶ Chantá chay ángel niwarqa: Kay tukuy imata uyarisqayki, chantá rikusqayki imaqa jap'ikunapaj jina kanku. Tukuyta Kamachej Dios, pichus paymanta sut'inchajkunata yuyaychan chay, angelninta kamachinkunaman kachamun, chaykuna usqhayta junt'akunanmanta yachayta qonanpaj.

⁷ Jesús nin: Noqa usqhayta jamushani. Kusisqamin kanqa pichus kay p'anqapi imachus sut'inchasqa kajta kasojqa, nispa.

⁸ Noqa Juan kay imakunata uyarerqani, rikorqanitaj. Chayta uyarispa, rikuspataj kay imakunata rikuchiwaj angelta yupaychanaypaj pampakama k'umuykorqani.

⁹ Paytajrí niwarqa: Ama noqata yupaychawaychu. Noqaqa kamachi masiyki kani, Diosmanta sut'inchaj wawqeykikuna jina, kay p'anqaj nisqanta kasojkunajta ima. Qanqa Diosllata yupaychay, nispa.

¹⁰ Nillawarqataj: Ama kay p'anqapi sut'inchana willayta pakaychu, imaraykuchus junt'akunan p'unchay qayllaña kashan.

¹¹ Chaykamarí millayta ruwajqa millay kajta ruwallachunrajpuni, ch'ichi puriyniyojtaj ch'ichichakuspallapuni purichun. Cheqan runarí cheqan kajta ruwallachunpuni, juchamanta t'aqasqataj astawan astawan llimphuchakun.

¹² Jesús nillantaj: Arí, noqa t'inka aparisqa usqhayta jamushani, sapa ujman maychus ruwasqanman jina qopunaypaj.

¹³ Noqa Tukuy Imaj Qallariynin, Tukukuynintaj kani, jinallataj Ñawpaj Kaj, Qhepa Kaj ima.

¹⁴ Kusisqamin kanku pikunachus p'achankuta t'ajsakunku chaykunaqa. Ajinamanta paykuna kawsachej sach'amanta poqoyta mikhonqanku, mosoj llajtamantaj punkunejta yaykuyta atenqanku.

¹⁵ Jinapis jawapi qhepakonqanku millayta ruwajkuna, layqakuna, khuchichakojkuna, runa wañuchejkuna, lantita yupaychajkuna, jinallataj llullakuyta munakojkuna, chantá mana cheqanta ruwayta munakojkuna ima.

¹⁶ Noqa Jesusqa chaykunata iglesiakunaman willananpaj angelniyta kachamorqani. Noqa Davidpa mirayninmanta kaj kani, sut'iyamuyta lliphipej ch'askataj.

¹⁷ Santo Espirituwan, casarakoj sipaswan ima ninku: Jamuy, nispa. Chayta uyarejpis nillachuntaj: Jamuy, nispa. Ch'akichikojqa jamuchun, ujyayta munajtaj kawsayta qoj yakumanta qhasilla ujyachun, nispa.

¹⁸ Tukuy pikunachus kay p'anqapi qhelqasqa kajta uyarejkunaman, noqa Juan kayta sut'ita nini: Sichus pipis kay p'anqapi imachus qhelqasqa kajman yapaykunman chayqa, kay p'anqapi ima ñak'ariykunachus qhelqasqa kashan, chaykunata Dios payman apachimonqa.

¹⁹ Sitajchus pillapis kay p'anqapi imachus qhelqasqamanta imallatapis qhechunman chayqa, Diosqa kawsay sach'amanta mana mikhojta saqenqachu, nitaj ajllakusqan llajtaman yaykuchenqachu, mayqenmantachus kay p'anqapi willan, chayman.

²⁰ Chay tukuy imata willajqa nin: Noqaqa usqhayta jamushanipuni, nispa. Ajina kachun. Arí, Tukuyta Kamachej Jesús, jamuy.

²¹ Tukuyta Kamachej Jesucristoj qhasilla k'acha yanapaynin tukuyniykichejwan kachun. Ajina kachun.