Apocalipsis 20 - DIOSPA QHELQACHISQ

Waranqa watata Cordero kamachenqa

¹ Chantá noqa janaj pachamanta uj angelta urayk'amushajta rikorqani. Chay angeltaj makinpi ukhu pachaj llaventa jap'isharqa, jinallataj uj jatun cadenatawan.

² Payqa sierpeta, pichus ñawpa katari karqa chayta, wisq'ananpaj jap'erqa. Payqa Kuraj Supay, chayrí Supay Satanás sutiyoj, paytataj waranqa watapaj wataykorqa.

³ Chantá angelqa sierpeta ukhu pachaman wijch'uykorqa, wisq'aykuytawantaj llaveykorqa, sellaykorqataj, waranqa wata junt'akunankama amaña runakunata q'otiyananpaj. Chaywanpis qhepanejman uj pisi p'unchayllapaj kacharisqa kanqa.

⁴ Rikullarqanitaj kamachina tiyanakunata, chaykunapitaj tiyakusharqanku, pikunachus juzganankupaj atiyta jap'erqanku, chaykuna. Umanku qholusqa kajkunaj almankutapis rikullarqanitaj, pikunachus Jesusmanta, chantá Diospa simi nisqanmanta ima willasqankurayku wañuchisqa kasqanku, chaykunata. Paykunaqa sierpeta, lantintapis mana yupaychasqankuchu, manallataj mat'inkupi, chayrí makinkupipis marcanwan marcachikusqankuchu. Kunantajrí paykuna kawsarimpuspa, Cristowan khuska waranqa watata kamacherqanku.

⁵ Chaymin ñawpaj kaj kawsarimpoyqa. Chay waj wañusqakunarí, waranqa wata junt'akunankama mana kawsarimporqankuchu.

⁶ Kusisqamin, Diospaj t'aqasqataj kanku pikunachus ñawpaj kaj kawsarimuypi kawsarimpojkunaqa. Qhepa kaj wañoyqa manaña paykunata imanayta atinchu. Aswanpis, paykuna Diospata, chantá Cristojtawan ima sacerdotenkuna kanqanku, paywantaj waranqa watata kamachenqanku.

⁷ Waranqa wata junt'akojtin, Satanasqa watasqa kasqanmanta kacharichisqa kanqa.

⁸ Paytaj tukuy suyupi tiyakojkunata q'otiyaj llojsenqa, kay pachaj tawantin k'uchupi kashanku, chaykunata. Chay suyukuna Gog, chantá Magog ima sutichasqa kanku. Chaykunapi tiyakojkunatataj maqanakupaj tantanqa, paykunataj yupay mana atina kanqanku, mama qocha kantupi t'iyu jinapuni.

⁹ Paykuna tukuy pampata aywirispa jamorqanku, chantá Diospa ajllakusqankunaj jarankuta, jinataj munasqa llajtatawan ima muyuykorqanku. Jinallaman janaj pachamanta nina urayk'amuspa, paykunata q'olarparerqa.

¹⁰ Jinapi paykunata q'otiyaj, chay Kuraj Supayqa azufrewan lawrashaj nina qochaman wijch'uykusqa karqa, maypichus chay ñawpaj kaj sierpe, chantá llulla sut'inchaj ima kasharqanku, chayman. Chaypitaj paykuna tuta p'unchay, wiñaypa wiñayninkama ñak'arenqanku.

Yuraj kamachina tiyana

¹¹ Chay qhepata noqa uj jatun yuraj kamachina tiyanata rikorqani, chaypi tiyasqa kashajtawan ima. Paypa ñawpaqenmantataj kay pacha, janajpis chinkasqata chinkarqanku.

¹² Chantá rikullarqanitaj Diospa ñawpaqenpi sayashajta wañusqakunata, pikunachus mana kasu ruwana, jinataj maypaj qhawasqa karqanku, chaykunata. Chantá angelkuna p'anqakunata kicharerqanku, chay p'anqakunamanta ujnintaj kawsay p'anqa karqa. Chay wañusqakunataj juzgasqa karqanku, kawsashaspa imatachus ruwasqankumanta, p'anqakunapi qhelqasqa kasqanman jina.

¹³ Mama qochaqa chaypi wañusqa kajkunata jaywaporqa. Wañuypis, ukhu pachapis chaypi wañusqa kajkunata jaywapullarqataj. Diostaj sapa runata ruwasqanman jina juzgarqa.

¹⁴ Chaymantataj wañuywan, ukhu pachawan ima nina qochaman wijch'uykusqa karqanku. Chaymá iskay kaj wañoyqa. Pikunachus nina qochaman wijch'uykusqa kanku, chaykuna wiñay wiñaypaj Diosmanta karunchasqa kanku.

¹⁵ Jinallataj pejpa sutinchus Kawsay P'anqapi mana listasqachu karqa chayqa, chay runa nina qochaman wijch'uykusqa karqa.