Apocalipsis 2 - DIOSPA QHELQACHISQ

Éfeso llajtapi iglesiapaj willay

¹ Chantá pay niwarqa: Éfeso llajtapi iglesiaj angelninman kay nisqayta qhelqay: Pichus paña makinpi qanchis ch'askakunata jap'ej, chantá qanchis qorimanta lamparakunaj chawpinpi purej kay jinata nisunki:

² Noqa tukuy ima ruwasqaykita yachani, sinch'i ruwasqaykita, chantá mana sayk'uspa sayasqaykita ima. Yachallanitaj millayta ruwaspa kawsajkunatapis mana rikuyta atisqaykita. Jesuspa kuraj kachan kani, nispa nejkunatapis qan allinta watuspa, llulla kasqankuta sut'iman orqhosqaykitapis yachallanitaj.

³ Qanqa noqarayku pacienciakorqanki, jinallataj kasuwasqaykirayku mayta ñak'arichisqa kaspa, mana llawch'iyarqankichu.

⁴ Chaywanpis, kayta contraykipi nini: Qanqa manaña ñawpajta jinachu munakuwanki.

⁵ Chayrayku imapichus pantasqaykita qhawarikuy, chaymanta kutirikamuspataj, watej noqata kasuwaspa puriy. Chantá imatachus qallariypi ruwaj kanki, chayta ujtawan ruway. Manachus noqaman kutirikamunki chayqa, noqa jamuspa, lamparaykita maypichus kananmanta qhechusaj.

⁶ Chaywanpis kayta ruwaspa, allinta ruwanki: Qanqa Nicolasta qhatejkunaj millay ruwasqankuta chejninki. Noqapis chay ruwasqankuta chejnillanitaj.

⁷ Pichus nisqayta jap'ikuyta munajqa imatachus Santo Espíritu iglesiakunaman nisqanta uyarichun. Chantá noqa pichus atipajman kawsay sach'amanta mikhuchisaj, mayqenchus Diospa janaj pacha huertanpi kashan, chaymanta.

Esmirna llajtapi iglesiapaj willay

⁸ Esmirna llajtapi iglesiaj angelninman kay nisqayta qhelqay: Ñawpaj Kaj, Qhepa Kajtaj, pichus wañusqa karqa, kawsarintaj, chaymin kay jinata nisunki:

⁹ Noqa ñak'arichisqa kasqaykita rikuni, wajcha kasqaykitapis. Chaywanpis qhapaj kanki. Yachallanitaj judío kasqankuta nejkuna qanpaj sajrata rimasqankuta. Paykuna mana Diospa ayllunmantachu kanku, aswanpis Kuraj Supaypa t'aqanmanta.

¹⁰ Chaywanpis imatachus ñak'arinaykimanta ama manchachikuychu, imaraykuchus Kuraj Supay qankunamanta wakinta wisq'achenqa, cheqatapunichus noqapi atinikusqaykichejta yachananpaj. Chaypacha, chunka p'unchayta ñak'arichisqa kankichej. Qanrí wañunaykikama kasuwaspallapuni puriy, noqataj wiñay kawsayta t'inkata jina qosqayki.

¹¹ Pichus nisqayta jap'ikuyta munajqa imatachus Santo Espíritu iglesiakunaman nisqanta uyarichun. Pikunachus atipajkunaqa manapuni wiñaypaj Diosmanta karunchasqachu kanqanku.

Pérgamo llajtapi iglesiapaj willay

¹² Pérgamo llajtapi iglesiaj angelninman kay nisqayta qhelqay: Pichus puraj ladon filochasqa espadata jap'ejqa kay jinata nisunki:

¹³ Noqa maypichus tiyakusqaykita yachani. Qanqa, maypichus Kuraj Supaypa kamachinan tiyana kashan, chaypi tiyakunki. Chaywanpis mana wasanchawarqankichu, nitaj noqapi atinikusqaykipi llawch'iyarqankichu. Pérgamo llajtapi willajniy Antipasta wañucherqanku, pichus tukuy sonqo noqata kasuwaspallapuni kawsarqa, chayta. Qanrí payta wañuchishajtinkupis, manapuni noqata wasanchawarqankichu.

¹⁴ Chaywanpis contraykipi noqa kayta nini: Qanqa Balaampa yachachisqanta qhatejkunata qhawakushallanki. Balaamqa kuraj kamachej Balacta yuyaychasqa israelitakunata juchallichinanta, lantikunaman jaywasqata mikhunankupaj, chantá khuchichakunankupaj ima.

¹⁵ Jinallataj qanqa Nicolaspa yachachisqanta qhatejkunata qhawakushallanki.

¹⁶ Chayrayku watej noqaman kutirikamuy, manachayqa usqhayllata qanman jamuspa, simi nisqaywan paykunaj contrankuta maqanakusaj.

¹⁷ Pichus nisqayta jap'ikuyta munajqa imatachus Santo Espíritu iglesiakunaman nisqanta uyarichun: Noqaqa pichus atipajman maná nisqa chay pakasqa mikhunata mikhuchisaj. Jinallataj uj yuraj rumisituta qosaj, chay rumisitupitaj mosoj suti qhelqasqa kanqa. Chay sutita mana pipis yachanqachu, manachayqa pichus chay rumita jap'ejlla yachanqa.

Tiatira llajtapi iglesiapaj willay

¹⁸ Tiatira llajtapi iglesiaj angelninman kay nisqayta qhelqay: Diospa Churin, pejpatachus ñawin nina lawray jina kanku, chakinpis llosq'ochasqa bronceman rijch'akun, chay kay jinata nisunki:

¹⁹ Noqa tukuy ima ruwasqaykita yachani. Noqata munakuwasqaykita, noqapi atinikusqaykitapis rikuni. Jinallataj rikuni imaynatachus wajkunata yanapasqaykita, jinataj mana sayk'uspa pacienciakusqaykita ima. Chantá yachallanitaj qhepata imatachus kunan ruwashanki, chay aswan sumaj kasqanta ñawpajta ruwasqaykimanta nisqaqa.

²⁰ Chaywanpis kayta niyki: Qanqa Jezabel sutiyoj warmita, pichus Diosmanta sut'inchaj kasqanta nin, chay warmej millay yachachisqanta qhawakushallanki. Chay warmeqa noqata qhatiwajkunaman yachachin khuchichakuyta atillasqankuta, chantá lantikunaman jaywasqa mikhunatapis mikhuyta atisqankuta ima.

²¹ Noqa unayta suyarqani Jezabelqa watej noqata kasuwaspa purinanta. Paytajrí mana munanchu khuchichakuspa purinata saqeyta.

²² Chayrayku noqa payta sinch'ita onqochisaj. Pikunachus paywan khuchichakunku, chaykunapis mayta ñak'arenqanku, manachus millay ruwasqankumanta noqaman kutirikamonqanku chayqa.

²³ Wawankunatapis noqa wañurachisaj. Ajinamanta tukuy iglesiakuna yachanqanku noqaqa runaj yuyayninta, sonqontawan ima rejsisqayta. Sapa ujniykichejmantaj ruwasqaykichejman jina qopusqaykichej.

²⁴ Chaywanpis Tiatira llajtapi iglesiamanta wakinman kayta niykichej: Qankunaqa Jezabelpa yachachisqanta mana jap'ikorqankichejchu. Manallataj jap'ikunkichejchu ukhu yachachiykuna nisqata, mayqenchus Kuraj Supaypa yachachisqan kashan, chayta. Chayrayku manaña waj imakunatawan ruwanaykichejta mañasqaykichejchu.

²⁵ Aswanpis noqapi atinikuspallapuni kaychej, noqa kutimunaykama.

²⁶ Chantá noqaqa tukuy atipajkunaman, pikunachus tukukuykama kasuwanku chaykunaman suyukunata kamachinanpaj atiyta qosaj,

²⁷ imaynatachus Tatay noqamanpis kamachinaypaj atiyta qowarqa, ajinata. Paykunataj fierro varawan suyukunata kamachenqanku, t'uru mankata jinataj phiriranqanku.

²⁸ Jinallataj paykunaman sut'iyayta llojsimoj ch'askatapis qollasajtaj.

²⁹ Pichus nisqayta jap'ikuyta munajqa imatachus Santo Espíritu iglesiakunaman nisqanta uyarichun, nispa. Ajinata Jesucristo niwarqa.