Apocalipsis 19 - DIOSPA QHELQACHISQ

Janaj pachapi takejkuna

¹ Chay qhepata janaj pachapi ashkha runaj parlasqanta jina uyarerqani. Paykuna ajinata nisharqanku: Tata Diosninchej jatunchasqa kachun, imaraykuchus payqa tukuy atiyniyoj, jinataj qhespichiwarqanchej. Chayrayku, jatunchasqapuni kachun.

² Diospa justicia ruwasqanqa cheqan, cheqataj. Chayrayku chay manchay uyarisqa phisu warmita juchacharqa, pichus khuchichakusqanwan kay pachata pierdecherqa, chayta. Diosqa kamachinkunata wañuchisqanmanta chay warmiwan pagachikorqa, nispa.

³ Chantá ujtawan nillarqankutaj: Tata Dios jatunchasqa kachun. Babilonia llajtaqa wiñaypa wiñayninkama q'oshñispallapuni kanqa, nispa.

⁴ Chaymantá chay iskay chunka tawayoj kuraj runakuna, chantá chay tawa kawsajkuna ima pampakama k'umuykuspa, Diosta yupaycharqanku, pichus kamachina tiyanapi tiyasqa kasharqa, chayta. Nerqankutaj: Ajina kachun, Tata Dios jatunchasqa kachun, nispa.

⁵ Chantataj kamachina tiyanamanta ujpa parlasqanta uyarerqani: Diospa tukuy kamachinkuna, payta may jatun respetowan qhawajkuna, mana kasu ruwana, jinataj maypaj qhawasqa kajkuna, Diosninchejta yupaychaychej, nispa.

Corderoj casaraku raymin

⁶ Jinallataj ashkha runaj parlasqanta jina uyarillarqanitaj, ashkha yakoj phajchasqanta jina, chantá ashkha qhon qhonkunaj manchay sinch'i t'ojyasqanta jina. Paykunataj nisharqanku: Tata Dios jatunchasqa kachun, imaraykuchus Tukuyta Kamachej, Tukuy Atiyniyoj Diosninchej kamachishanña.

⁷ Payta jatunchaspa, jatun kusiywan kusikuna, imaraykuchus Corderoj casarakunan p'unchay chayamunña, casarakunanpaj parlakusqan sipaspis wakichikusqaña suyashan.

⁸ Chay sipasman Dios atiyta qorqa yuraj lliphipej sumaj awasqa linomanta p'achawan p'achallikunanpaj. Linomanta sumaj awasqa telaqa ninakun Diospa ajllakusqankunaj cheqan ruwasqankuwan, nispa.

⁹ Chantá ángel nillawarqataj: Kayta qhelqay: Pikunachus Corderoj casaraku rayminman wajyasqa kajkunaqa kusisqa kanqanku, nispa. Nillarqataj: Ajinata Dios nispaqa, mana llullakunchu, nispa.

¹⁰ Chayta ángel nejtin, noqaqa payta yupaychanaypaj chakin chaynejman pampakama k'umuykorqani. Paytajrí niwarqa: Ama chayta ruwaychu. Noqaqa qan jina, chantá Jesuspa nisqanta jap'ikoj wawqe panaykikuna jina Diospa kamachillantaj kani. Qanqa Diosllata yupaychay, imaraykuchus Diosmanta sut'inchajkunaj nisqankoqa, Jesusmanta willanallapajpuni runaj sonqonta aysan, nispa.

Yuraj caballopi lloq'asqa kaj

¹¹ Chaypacha, noqa janaj pachata kicharisqata rikorqani. Uj runa yuraj caballopi lloq'asqa kasharqa, sutintaj karqa Nisqanta Junt'aj Kaj, chantá Cheqa Kaj ima, imaraykuchus payqa justiciata ruwan, chantá cheqa kajta ruwaspa maqanakun.

¹² Paypa ñawenqa nina lawray jina karqa, umanpitaj ashkha pilluyoj karqa. Sutenqa qhelqasqa karqa, chay sutintataj mana pipis yacharqachu, manachayqa paylla.

¹³ Yawarwan pukachasqa p'achawan p'achallisqa kasharqa, uj sutintaj Diospa Simi Nisqan karqa.

¹⁴ Chantá janaj pachamanta soldadokunaqa paypa qhepanta yuraj caballokunapi risharqanku, linomanta sumaj awasqa yuraj llimphu p'achawan p'achallisqa.

¹⁵ Paypa siminmanta uj filo espada llojsimorqa, chaywan tukuy suyupi tiyakojkunata atipananpaj. Payllataj fierro varawan kamachenqa, jinallataj Tukuy Atiyniyoj Diosqa uva sarunapi jina k'arajta phiñakuspa paykunata saronqa.

¹⁶ P'achanpitaj, moqon patanejpitaj kay suti qhelqasqa karqa: Kamachejkunaj Kuraj Kamachejninku, Wiraqochikunaj Kamachejnintaj, nispa.

¹⁷ Chaymantataj noqa uj angelta inti patapi sayashajta rikorqani. Paytaj aycha mikhoj phawajkunaman jatunmanta qhaparerqa: Jamuspa tantakamuychej Diospa jatun mikhuyninta mikhunaykichejpaj.

¹⁸ Chaypi qankuna kuraj kamachejkunaj aychankuta mikhunkichej, soldadokunata kamachejkunaj aychankuta, atiyniyojkunaj aychankuta, caballokunaj aychankuta, caballopi purejkunaj aychankuta ima. Mikhullankichejtaj tukuy runaj aychankuta, wata runakunapis kachunku amapis, mana kasu ruwanapis kachunku chayrí maypaj qhawasqapis kachunku, nispa.

¹⁹ Chaymanta sierpeta, chantá kay pachapi kuraj kamachejkunata ima rikorqani. Paykuna ashkha soldadota tantaykuspa, yuraj caballopi lloq'asqa kajpa contranpi, chantá soldadonkunaj contrapi ima maqanakoj risharqanku.

²⁰ Chantá sierpeqa jap'ichisqa karqa, jinallataj llullakuspa sut'inchajpis. Chay sut'inchajqa sierpej sutinpi runa mana jayk'aj rikusqan t'ukunata ruwaspa, sierpej marcanta apajkunata q'otiyasqa, lantinta yupaychanankupaj. Jinataj sierpewan, llulla sut'inchajninwan ima azufrewan lawrashaj nina qochaman kawsashaj wijch'uykusqa karqanku.

²¹ Sierpej soldadonkunapis wañuchisqallataj karqanku yuraj caballopi lloq'asqa kajpa siminmanta llojsej espadawan. Chantá aycha mikhu phawajkunaqa wañusqakunaj aychankuwan sajsakorqanku.