Apocalipsis 17 - DIOSPA QHELQACHISQ

Phisu warmi juchachasqa

¹ Chay qhepata, qanchis angelkunamanta, pikunachus chay qanchis vasokunata jap'isharqanku, chaykunamanta ujnin kaj jamuspa, niwarqa: Kayman chimpamuy, chay phisu warmi imaynatachus juchachasqa kananta rikunaykipaj, pichus ashkha yaku patapi tiyasqa kashan, chayta.

² Kay pachapi kaj kuraj kamachejkunaqa paywan khuchichakorqanku, kay pachapi tiyakojkunapis paywan khuchichakuypi purispa vinowan jina machaykorqanku, nispa.

³ Chantá Santo Espíritu mosqoypi jina rikuchiwasqanpi angelqa ch'innejman pusawarqa, chaypitaj uj warmita rikorqani. Chay warmeqa puka sierpej patanpi tiyasqa kasharqa, chay sierpetaj Diospaj millayta rimaj sutikunawan junt'a karqa. Jinallataj qanchis umayoj, chantá chunka wajrayoj ima karqa.

⁴ Chay warmeqa kulli yanaraw p'achawan p'achallisqa karqa, qoriwan k'achanchasqa, k'achituta lliphirishaj rumiwan, chantá walqawan ima. Makinpeqa qorimanta vasota jap'isharqa millay imakunawan junt'asqata, khuchichakuspa ch'ichichakusqanwan ima.

⁵ Jinallataj chay warmej mat'inpi uj suti qhelqasqa karqa, watuy mana atina suti: Jatun Babilonia, phisu warmikunaj mamanku, chantá kay pachapi tukuy millay kajpa maman, nispa.

⁶ Repararqanitaj chay warmeqa Diospa ajllakusqankunaj yawarninkuwan, chantá Jesusmanta willajkunaj yawarninkuwan ima machasqa kasqanta. Payta rikuspa, noqa maytapuni t'ukorqani.

⁷ Angeltajrí niwarqa: Imaraykutaj t'ukunkiri? Chay warmimanta yachay mana atina ima niytachus munasqanta willasqayki, warmita apaj sierpemantawan ima, mayqenchus qanchis umayoj, chunka wajrayojtaj, chaymanta.

⁸ Chay rikusqayki sierpe ñawpajta karqa, kunantajrí manaña kanchu. Chaywanpis manaraj wiñaypaj chinkachisqa kashaspa, ukhu pachamanta ujtawan rikhurimonqa. Kay pacha ruwasqa kasqanmantapacha pikunaj sutinkuchus kawsay p'anqapi mana listasqachu kashan, chaykunaqa sierpeta rikuspa, t'ukonqanku. Chay sierpeqa ñawpajta karqa, kunantaj manaña kanchu, chaywanpis kutimonqarajmin.

⁹ Kaypi pichus sumaj yachayniyoj yuyayniyojtaj kasqan yachakonqa: Chay qanchis umakunaqa qanchis orqokunawan ninakun, chay orqokuna patapitaj chay warmi kamachishan.

¹⁰ Chay qanchis umakuna qanchis kuraj kamachejkunawan ninakullantaj. Chaykunamanta phishqa manaña kamachishankuñachu. Sojta kajqa kunan kamachishan, ujtaj manaraj kamachinanpaj tiyaykunrajchu. Kamachinanpaj tiyaykonqa chaypacharí mana unaytachu kamachenqa.

¹¹ Chay puka sierpe pichus karqa, kunantaj manaña kanchu, chayllataj pusaj kaj kamachej. Payqa chay qanchis kamachejkuna jinallataj kashan, paypis wiñaypaj chinkachisqa kanallanmantaj rishan.

¹² Jinallataj chay chunka wajrakunata rikusqaykeqa chunka kamachejkuna kallankutaj. Paykuna manaraj kamachiyta qallarinkurajchu. Chaywanpis sierpewan khuska uj phanita jinalla kamachinankupaj atiyta jap'enqanku.

¹³ Chay kamachejkuna parlarikuspa, kamachinankupaj atiyniyoj kasqankuta sierpeman qonqanku.

¹⁴ Chantá paykuna Corderoj contranpi maqanakonqanku. Corderotajrí paykunata atipaykonqa, imaraykuchus payqa tukuy kamachejkunaj Kuraj Kamachejninku, tukuy wiraqochikunaj Kamachejninkutaj. Pikunatachus Dios wajyaspa ajllakorqa, jinataj payta kasunku chaykuna paywan khuska kanqanku.

¹⁵ Jinallataj chay ángel niwarqa: Chay ashkha yaku rikusqaykeqa, maypichus chay phisu warmi tiyasqa kashan, chayqa ashkha runawan ninakun, jatuchaj suyukunawan, tukuy imaymana parlayniyojkunawan ima.

¹⁶ Puka sierpe, jinallataj chunka wajrankuna ima phisu warmita chejnenqanku. Chayrayku tukuy imanta qhechuspa, q'alallata saqerpayanqanku. Chantá aychanta mikhonqanku, puchojtataj ninaman choqaykuspa, ruphaykuchenqanku.

¹⁷ Ajina chay phisu warmiwan kanqa, imaraykuchus Diosqa sonqonkuman churanqa paypa munayninta ruwanankupaj, parlarikuspataj, kamachinapaj atiyta puka sierpeman qonankupaj, Diospa nisqan junt'akunankama.

¹⁸ Chay rikusqayki warmeqa jatun llajtamin, pichus kay pachapi kuraj kamachejkunata kamachishan, chay, nispa.