Apocalipsis 16 - DIOSPA QHELQACHISQ

Qanchis vasokuna

¹ Chantá Templomanta noqa jatunmanta parlamojta uyarerqani, chay parlamojtaj qanchis angelkunata nerqa: Riychej, chay qanchis vasokunamanta Diospa k'araj phiñakuyninta kay pachaman jich'aykamuychej, nispa.

² Jinataj ñawpaj kaj ángel rispa, vasonmanta kay pachaman jich'aykamorqa. Chantá pikunachus ñawpajta rikhurimoj sierpej marcanwan marcasqa karqanku, lantintapis yupaycharqanku, chaykunapi millayta asnaj lleqhe rikhurerqa.

³ Chaymanta qhepan kaj angelñataj mama qochaman vasonmanta jich'aykorqa, mama qochataj yawarman tukorqa, wañuchisqa runaj yawarninwan jina. Chayraykutaj mama qochapi kaj chhika kawsajkuna tukuynin wañurarqanku.

⁴ Jinallataj kinsa kaj angelqa mayukunaman, chantá yaku juturikunaman ima vasonmanta jich'aykorqa. Chaykunapipis yakoqa yawarman tukullarqataj.

⁵ Chantá yakuta kamachej angelta kay jinata nejta uyarerqani: Tukuyta Kamachej Dios, qanmin cheqan kanki. Qanqa wiñaypaj kawsanki, may llimphutaj kanki, imaraykuchus runata jasut'ispaqa, cheqanta ruwanki.

⁶ Kay pachapi tiyakojkunaqa ajllakusqaykikunata wañucherqanku, jinallataj qanmanta sut'inchajkunatapis. Chayrayku qanpis runakunata wañuchisqankoj yawarninkuta paykunaman ujyachillankitaj, imaraykuchus chaypaj jina kanku, nispa.

⁷ Chantá noqa altarmanta ajinata nejta uyarillarqanitaj: Arí, Tukuyta Kamachej, Tukuy Atiyniyoj Dios, qanqa cheqan kasqaykiman jina, chantá cheqa kajman jina juzganki, nispa.

⁸ Chaymantataj tawa kaj angelñataj vasonmanta intiman jich'aykorqa. Ajinata ruwaspataj, intiman atiyta qorqa, sinch'ita k'ajarispa runakunata ruphaykunanpaj.

⁹ Runakunaqa intej sinch'i k'ajasqanwan rupharasqa karqanku. Chaywanpis paykuna mana Diosman kutirikorqankuchu, nitaj payta jatuncharqankuchu. Aswanpis Diospaj millayta rimarqanku, pichus chay ñak'ariykunata apachimunanpaj atiyniyoj karqa, chaypaj.

¹⁰ Chantá phishqa kaj angelñataj vasonmanta jich'aykorqa, ñawpajta rikhurimorqa, chay sierpej kamachinan tiyanaman. Chayraykutaj chay sierpej kamachiynenqa laqhapi rikhurerqa. Runakunataj nanaywan qallunkuta khanirakorqanku.

¹¹ Paykunarí ni chaywanpis millayta ruwanata saqespa Diosman kutirikorqankuchu. Aswanpis nanaywan ñak'arisqankurayku, chantá ukhunkupi lleqhe jatarisqanrayku janaj pachapi kaj Diospa contranta millayta rimarqanku.

¹² Chaymantataj sojta kaj angelñataj Éufrates jatun mayuman vasonmanta jich'aykorqa. Chantá Éufrates mayupi yaku ch'akiporqa, inti llojsimuynejmanta kuraj kamachejkuna, chantá soldadonkukuna ima chimpayta atinankupaj.

¹³ Chantá chay qhepata rikorqani puka sierpej siminmanta, ñawpajta rikhurimoj sierpej siminmanta, chantá llullakuspa sut'inchajpa siminmanta ima llojsimojta, k'aylankulaman rijch'akoj kinsa millay supaykunata.

¹⁴ Chay supaykuna runaj mana jayk'aj rikusqan t'ukunata ruwaspa, tukuy kay pachapi kuraj kamachejkunaman rinku. Jinaspataj, runakunata tantanku Tukuy Atiyniyoj Diospa contranpi maqanakunankupaj. Chay kanqa, maypachachus Dios tukuy runata juzganqa, chay p'unchayta.

¹⁵ Chayrayku Jesús nin: Allinta qhawakuychej, imaraykuchus noqaqa suwa jina jamusaj mana yuyasqanku p'unchayta. Kusisqamin kanqanku pikunachus rijch'ashajlla, chantá p'achallisqa suyawajkuna. Ajinaqa paykunata mana q'alallatachu taripasaj, nitaj imamantapis p'enqakonqankuchu, nispa.

¹⁶ Chantá supaykunaqa “Armagedón” nisqa cheqapi kuraj kamachejkunata, soldadonkukunata ima tantaykorqanku. Armagedón suteqa hebreo rimaypi kashan.

¹⁷ Chaymanta qanchis kaj angelñataj vasonmanta wayraman jich'arqa. Chantá janaj pachapi templopi kamachina tiyanamanta, jatunmanta parlasqan uyarikorqa: Ñapis ñak'ariykuna tukukushanña, nispa.

¹⁸ Chantá lliuj lliujkuna, qhapariykuna, qhon qhonkuna ima karqa. Jallp'aqa manchayta ikhakorqa. Runa kay pachapi kasqanmantapacha, chay jina jallp'a ikhakoyqa mana jayk'ajpis karqachu.

¹⁹ Jatun llajta Babiloniataj kinsaman t'aqakorqa, tukuy kay pachapi llajtakunapis thuñisqa karqanku. Jinapi Dios chay jatun llajta Babiloniaj juchallisqanmanta yuyarikorqa, jinataj k'araj phiñakuyninwan sinch'ita jasut'erqa.

²⁰ Chantá mama qochapi tukuy churukuna ayqerqanku, orqokunataj yakuman chinkaykorqanku.

²¹ Janajmantataj runaj patanman manchay jatuchaj chijchi para urmamorqa, kinsa arroba jina llasayoj. Runakunatajrí chijchi para chay jinata ñak'arichisqanmanta Diospaj millayta rimarqanku.