Apocalipsis 14 - DIOSPA QHELQACHISQ

Cordero, 144.000 takejkunawan ima

¹ Chantá noqa Sión orqo patapi Corderota sayashajta rikullarqanitaj, paywantaj 144.000 runakuna kasharqanku. Paykunaj mat'inkupi Corderoj sutin, chantá Tatanpa sutin ima qhelqasqa karqa.

² Chantá janaj pachamanta jatunmanta parlamojta uyarerqani ashkha yaku phajchajta jina, qhon qhonpa t'ojyasqanta jinataj. Chay jatunmanta parlajta uyarisqaytaj ashkha arpata waqachejkunaj waqachisqanku jinallataj karqa.

³ Chay runakuna Diospa kamachinan tiyanaj ñawpaqenpi, jinataj tawa kawsajkunaj, chantá kuraj runakunaj ñawpaqenkupi ima uj mosoj takiyta takisharqanku. Chay takiyta mana pipis yachaqakuyta aterqachu, manachayqa chay 144.000 runakunalla, pikunatachus kay pachapi kajkuna ukhumanta Cordero ashkha preciota pagaspa kacharichisqa, chaykunalla.

⁴ Paykunaqa mana jayk'aj warmikunawan puñuykorqankuchu, jinallataj Corderoj qhepanta rej kanku mayllamanpis rejtin. Jinallataj paykunaqa runakuna ukhumanta rantisqa karqanku Diospaj, Corderopaj ima ñawpaj kaj jaywana jina kanankupaj.

⁵ Paykuna manallataj llullakorqankuchu, chayrayku mana k'amina karqanku.

Kinsa angelkuna

⁶ Chaymanta waj angeltañataj chawpi janajpi phawashajta rikorqani. Chay angelqa wiñaypaj valorniyoj sumaj willayta apasharqa, kay pachapi tukuy runaman, tukuy suyupi, tukuy imaymana rijch'aj runaman, aylluman, chantá tukuy imaymana parlayta parlajkunaman ima willananpaj.

⁷ Chantá jatunmanta parlaspa, nerqa: Diosta manchachikuychej, sutintataj jatunchaychej, imaraykuchus juzganan p'unchay chayamunña. Pichus janaj pachata, kay pachata, mama qochata, yaku juturikunata ima ruwajta yupaychaychej ari, nispa.

⁸ Chantá chay angelpa qhepanta waj angelñataj rikhurimuspa, nillarqataj: Babilonia jatun llajtaqa urmanña. Arí, urmanña, imaraykuchus chay llajtaqa tukuy suyumanta runata juchalliyta yachacherqa, chantá waj dioskunata kasuyta ima, nispa.

⁹ Chay angelpa qhepanta waj angelñataj rikhurimuspa, nerqa: Pichus mama qochamanta rikhurimoj chay sierpeta, jinataj lantintapis yupaychajqa, marcantataj mat'inpi, chayrí makinpi churachikojqa,

¹⁰ Diospa phiñakuyninpa vinonmanta ujyanan kanqa. Chay vinoqa mana imawan chajrusqa, Diospa phiñakuyninwan junt'asqa vasonpi kashan. Paykuna Diospaj t'aqasqa angelkunaj ñawpaqenpi, jinataj Corderoj ñawpaqenpi ninawan, chantá ninayarishaj azufrewan ima ñak'arichisqa kanqanku.

¹¹ Chantá paykunaj ñak'arisqankoj q'oshñintaj wiñay wiñaypaj q'oshñenqa. Chay waj sierpe rikhurimojta, lantintapis yupaychajkuna, chantá marcanta churachikojkuna ima tuta p'unchay ñak'arispa, mana samarenqankuchu.

¹² Chay niyta munan Diospa ajllakusqankunaqa qhatiykachasqa kasqankuta pacienciawan awantanankuta, jinataj kamachisqanta kasunankuta, chantá Jesuspi atinikuspa mana sayk'uspa sinch'ita sayanankuta.

¹³ Chantá janaj pachamanta jatunmanta parlajta uyarillarqanitaj: Kayta qhelqay: Kunanmanta qhepaman Tukuyta Kamachej Jesuswan ujchasqa wañojkunaqa saminchasqa kanqanku, nispa. Arí, Santo Espiritupis nillantaj: Paykuna llakiykunata sinch'ita ñak'arisqankumanta samarikonqanku, imaraykuchus Dios tukuy allinta ruwasqankumanta t'inkankuta qoponqa, nispa.

Poqoy oqharina p'unchay

¹⁴ Chantá qhawashajtillay, uj yuraj phuyu rikhurerqa, chay phuyu patapitaj Runaj Churinman rijch'akoj tiyasqa kasharqa. Payqa umanpi qori pilluyoj karqa, makinpitaj sumaj filochasqa hozeta jap'isharqa.

¹⁵ Chaymantataj templomanta waj angelñataj llojsimorqa, phuyu patapi kajmantaj jatunmanta parlaspa, nerqa: Hozeykita jap'ispa ruthuypacha, imaraykuchus ruthuna p'unchay chayamunña. Chajraqa ñapis poqosqaña, nispa.

¹⁶ Phuyu patapi tiyasqa kajtaj chajrata hozewan ruthoj yaykorqa, jinamanta chajraqa ruthusqa karqa.

¹⁷ Chaymantataj janaj pachapi kaj templomanta waj angelñataj sumaj filochasqa hozeyoj llojsimorqa.

¹⁸ Altarmantataj waj ángel llojsimullarqataj. Payqa ninata kamachinanpaj atiyniyoj karqa. Paytaj filochasqa hozeta jap'irisqa kasharqa, chay angelta jatunmanta parlaspa, nerqa: Chay hozeykiwan uva chhullchuta pallaj kay pachaman yaykuy, imaraykuchus poqosqaña kashanku, nispa.

¹⁹ Chay angeltaj filochasqa hozenwan uvata pallayta qallarerqa. Chantá pallasqan uvata uva saruna jatun t'oqoman jich'aykorqa. Chayqa Diospa phiñakuyninmin.

²⁰ Chay pallasqan uvaqa llajtamanta jawanejpi sarusqa karqa, sarojtinkutaj, uva saruna jatun t'oqomanta yawar llojsimorqa. Caballokunaj frenonkama chayaspataj, chay yawar 300 kilometrota jina purirerqa.