Apocalipsis 13 - DIOSPA QHELQACHISQ

Mama qochamanta llojsimoj waj sierpe

¹ Chantá noqa mama qochamanta waj sierpeta rikhurimojta rikullarqanitaj. Chayqa chunka wajrayoj karqa, qanchis umayojtaj. Chay sierpej wajrankuna patapi chunka pillukuna karqa, umankuna patapitaj Diosta phiñachinapaj jina millay sutikuna karqa.

² Chay waj sierpe rikusqayqa ch'ejchi leonman rijch'akorqa, chakenqa jukumarejta jina karqa, simintaj leonpa simin jina. Chantá puka sierpe atiyninta, kamachina tiyanata, chantá kamachinanpaj atiyniyoj kayta ima chay waj sierpeman qorqa.

³ Jinallataj noqa chay waj sierpej ujnin umanta allin k'irisqata rikorqani, wañunanpaj jina. Chaywanpis chay k'irisqa umanqa thañiporqa. Chayrayku kay pachapi kaj chhika runa t'ukuspa, chay waj sierpeta kasorqanku.

⁴ Runakunataj puka sierpeta yupaycharqanku, mayqenchus mama qochamanta llojsimoj chay waj sierpeman atiyta qorqa, chayta. Jinallataj chay waj sierpetapis yupaychaspa, nerqanku: Pitaj kay waj sierpe jina kanmanri? Pitaj paywan maqanakuyta atinmanri? nispa.

⁵ Jinallataj chay waj sierpeman atiyta qorqa, mayta wapuykachaspa parlananpaj, chantá Diospa contranta millayta rimananpaj ima. Jinallataj payman atiyta qollarqataj kinsa wata khuskanniyojta munayninta ruwananpaj.

⁶ Chantá chay waj sierpeqa Diospaj millayta rimarqa, jinallataj Diospa sutinta, Diospa tiyakunanta, chantá janaj pachapi tiyakojkunaj contranta ima maldicillarqataj.

⁷ Jinallataj Dios payta saqerqa Diospa ajllasqankunawan maqanakuspa, paykunata atipajta. Jinallataj kamachinanpaj atiyta qorqa tukuy aylluta, tukuy imaymana runata, waj parlayta parlajkunata, tukuy suyuta ima.

⁸ Kay pachapi tukuy runataj chay waj sierpeta yupaycharqanku. Kay pacha manaraj ruwasqa kashajtin, pichus wañuchisqa kanan karqa, chay Corderoqa kawsay p'anqapi qhelqasqa, pikunachus wiñay kawsayniyoj kananku karqa, chay sutinkuta. Kay ujkunaj sutinkurí mana chay p'anqapi qhelqasqachu karqa.

⁹ Pichus nisqayta jap'ikuyta munajqa kayta uyarichun:

¹⁰ Pichus carcelpi wisq'asqa kanan kashan, chayta carcelman wisq'anankupaj apanqanku. Chantá pichus wañuchisqa kanan kashan, chaytapis wañuchenqanku. Chay niyta munan Diospa ajllakusqankunaqa qhatiykachasqa kanata pacienciawan awantanankuta, Diosta mana wasanchaspa.

¹¹ Chaymanta waj sierpetañataj jallp'amanta rikhurimushajta rikorqani. Chay sierpeqa iskay wajrayoj karqa, wajrankunataj corderoj wajranman rijch'akorqa, parlasqantaj puka sierpejta jina karqa.

¹² Chantá jallp'amanta rikhurej sierpeqa mama qochamanta rikhurej sierpej atiyninwan kamacherqa, nerqataj kay pachapi tukuy runakuna chay ñawpaj kaj sierpeta yupaychanankuta, mayqenpa ujnin umanchus k'irisqa kashajtin thañiporqa, chayta.

¹³ Jallp'amanta rikhurimoj chay sierpeqa runaj mana jayk'aj rikusqan t'ukunata ruwallarqataj. Ninatapis tukuy rikushajtinku janajmanta kay pachaman urmachimorqa.

¹⁴ Jinallataj jallp'amanta rikhurimoj sierpeqa ñawpa kaj sierpe atiyta qosqanwan t'ukuna imakunata ruwarqa, chaykunawantaj kay pachapi tukuy runata q'otiyarqa. Chantá jallp'amanta rikhurimoj sierpe kamachillarqataj, chay ñawpaj kaj sierpej lantinta ruwanankuta, mayqenpa ujnin umanchus k'irisqa kashajtin thañiporqa, chaypata.

¹⁵ Jinallataj Diosqa jallp'amanta rikhurimoj sierpeman atiyta qorqa, ñawpaj kaj sierpej lantinman kawsayta qonanpaj, ajinamanta chay lanti parlananpaj. Atiyta qollarqataj tukuy pikunachus payta mana yupaychayta munajkunata wañuchinanpaj.

¹⁶ Chay jawa kamachillarqataj tukuy runakuna paña makinkupi, chayrí mat'inkupi marcasqa kanankuta: Wawapis jatunpis kachunku, qhapajkunapis wajchakunapis kachunku, wata runapis manapis wata runachu kachunku.

¹⁷ Pichus mana chay marcayoj, chayrí sierpej sutinwan, chayrí sutinpa yupayninwan mana marcasqa kajqa mana ni imata rantiyta, nitaj vendeytapis aterqachu.

¹⁸ Chay marca imachus kasqanta yachanapaj yachayniyoj kana, pichus yachayniyoj kajtaj sierpej yupayninta watuchun. Chay yupayqa runaj yupayninmin, chaytaj 666.