Apocalipsis 12 - DIOSPA QHELQACHISQ

Warmimanta, sierpemanta rijch'anachina

¹ Chaymanta noqa janaj pachapi runaj mana jayk'aj rikusqan t'ukunata rikhurejta rikorqani: Intiwan p'achallisqa jina uj warmita rikorqani. Killaqa chakin urapi karqa, umanpitaj uj pillu chunka iskayniyoj ch'askakunayoj karqa.

² Chay warmi wijsallisqa karqa, onqokunan chayamojtintaj, nanaywan sinch'ita ñak'arispa qhaparisharqa.

³ Jinallataj janaj pachapi runaj mana jayk'aj rikusqan waj t'ukuna rikhurillarqataj: Uj jatun puka sierpe rikhurerqa. Chay sierpeqa qanchis umayoj, chunka wajrayoj karqa, sapa umanpitaj pilluyoj.

⁴ Chupanqa janajpi ch'askakuna kinsaman t'aqasqamanta ujnin kaj t'aqata qharastaspa, kay pachaman wijch'uykamorqa. Chantá sierpeqa onqokushaj warmej ñawpaqenpi sayaykorqa, paqarichikojtinkama wawanta oqoykunanpaj.

⁵ Chantá chay warmeqa uj qhari wawata paqarichikorqa, pichus tukuy suyuta fierro varawan kamachenqa, chayta. Chaywanpis chay warmej wawanta oqharispa, Diosqa paypa kamachinan tiyanaj ñawpaqenman aparqa.

⁶ Warmitajrí ch'innejman ayqerqa, maypichus Dios paypaj uj cheqata wakichisqa, chayman, chaypi 1.260 p'unchayta payta mikhuchinankupaj.

⁷ Chaymanta qhepanejman jatun maqanaku janaj pachapi karqa: Arcángel Miguel, angelninkunawan ima sierpej contranta maqanakorqanku. Sierpepis angelninkunawan Miguelpa contranta maqanakullarqankutaj.

⁸ Chaywanpis Miguelta mana atipayta aterqankuchu. Chayrayku sierpewan, angelninkunawan ima janaj pachamanta wijch'umusqa karqanku.

⁹ Ajinata chay jatun sierpe jawaman wijch'usqa karqa. Chay sierpeqa unay ñawpa katari, pichus Kuraj Supay, Satanastaj sutichasqa kashan, chay. Payqa llullakuspa, kay pachapi tukuy runata loq'eyan. Chantá sierpeta, angelninkunatawan ima kay pachaman wijch'umorqanku.

¹⁰ Chay qhepata noqa janaj pachamanta jatunmanta parlamojta uyarerqani: Kunan Diosninchej jatun atiyninwan ayllunta qhespichin, jinallataj tukuy runata kamachishan. Chantá Criston kasuchikunanpaj atiyniyojllataj kashan. Wawqe pananchejkunata ch'atajtarí ñapis janaj pachamanta wijch'umunkuña, pichus Diosninchejpa ñawpaqenpi tuta p'unchay paykunata ch'ataykoj, chayta.

¹¹ Wawqe pananchejkunaqa Cordero cruzpi wañuspa yawar jich'asqanrayku, chantá Diosmanta willasqankurayku Supayta atiparqanku. Paykuna kawsayninkuta pisipaj qhawasqankurayku, wañuyta mana manchachikorqankuchu.

¹² Chayrayku janajkuna, kusikuychej, chaypi tiyakojkunapis. Chaywanpis kay pachapi, chantá mama qochapi tiyakojkuna ima manchay jatun llakiyta rikonqanku, imaraykuchus Kuraj Supay paykunaman may phiñasqa urayk'amun. Paytaj yachan paypaj pisi p'unchayllaña kashasqanta, nispa.

¹³ Chay sierpe kay pachaman wijch'umusqa kaspaqa, qhari wawata paqarichikoj warmita qhatiykacharqa.

¹⁴ Chaywanpis Diosqa warmiman jatun ankaj lijranta qorqa, sierpemanta ayqespa ch'innejman phawananpaj. Chaypitaj pay kinsa wata khuskanniyojta qhawasqa karqa, sierpe ama imanananpaj.

¹⁵ Chantá sierpeqa warmej qhepanta siminmanta ashkha yakuta phullchichimorqa, chay warmita yaku apananpaj.

¹⁶ Kay pachatajrí warmita yanapananpaj siminta kicharerqa, jinaspataj chay yakuta ch'onqaykorqa, mayqentachus sierpeqa siminmanta phullchichimorqa, chayta.

¹⁷ Chantá sierpeqa warmipaj mayta phiñakorqa. Chayrayku warmej mirayninmanta wakinkunawan maqanakoj rerqa. Paykuna Diospa kamachisqanta kasunku, Jesusmanta willaspataj sinch'ita sayanku.