Apocalipsis 10 - DIOSPA QHELQACHISQ

Juch'uy p'anqata jap'ishaj ángel

¹ Chaymantataj noqa atiyniyoj uj angelta janaj pachamanta urayk'amojta rikorqani, phuyuwan muyurisqata. Uman patapi uj k'uychi karqa, uyantaj inti jina lliphipisharqa, chakintaj nina lawraj jina karqa.

² Makinpitaj uj juch'uy p'anqata kicharisqata jap'isharqa. Chantá paña chakinta mama qocha pataman churaspa sayarqa, lloq'e chakintataj jallp'a pataman churaspa.

³ Chaypachataj chay angelqa leonpis qhaparishanman jina sinch'ita qhaparerqa. Qhaparejtintaj, qanchis qhon qhonkuna kutichimorqanku.

⁴ Chay qanchis qhon qhonkuna parlamojtinkama, noqa nisqankuta qhelqanaypajña wakichikusharqani. Jinallapi janaj pachamanta nimuwajta uyarerqani: Imatachus chay qanchis qhon qhonkuna nimunku, chayta ama qhelqaychu, manachayqa pakaspa waqaychay, nispa.

⁵ Chantá mama qocha patapi, jallp'a patapiwan ima sayashajta rikusqay angelqa janajnejman paña makinta oqharerqa.

⁶ Jinaspataj payqa, pichus janajta, jallp'ata, mama qochata, chaykunapi imachus kajkunatawan ruwarqa, chay wiñay wiñaypaj kawsaj Diospa sutinpi tiluspa, nerqa: Suyana tiempo tukukapunña.

⁷ Maypachachus qanchis kaj ángel trompetanta waqachiyta qallarenqa chaypacha, Diospa pakasqa wakichisqan junt'akonqa. Chaytaj kanqa, imatachus paymanta sut'inchajkunanejta willacherqa, chayman jina, nispa.

⁸ Chantá janaj pachamanta chay parlamoj uj kutitawan niwarqa: Qan mama qocha patapi, jallp'a patapi ima sayashan, chay angelman rispa, kicharisqa juch'uy p'anqata makinmanta jap'iy, nispa.

⁹ Chantá chay angelman rispa, juch'uy p'anqata qonawanta nerqani. Paytaj niwarqa: Kayqa, jap'ispa mikhuykuy. Mikhuykojtiykitaj, simiykipi abeja misk'i jina misk'i kanqa, wijsaykipitajrí jayayanqa, nispa.

¹⁰ Chantá juch'uy p'anqata angelpa makinmanta jap'ispa, mikhuykorqani, simiypitaj abeja misk'i jina misk'i karqa. Mikhuykojtiytajrí, wijsaypi jayayarqa.

¹¹ Chaymantataj chay parlamoj nillawarqataj: Tukuy suyumanta runaman, tukuy imaymana runaman, tukuy imaymana parlayniyojman, chantá kuraj kamachejkunaman ima uj kutitawan Diosmanta sut'inchanayki tiyan, nispa.