Apocalipsis 1 - DIOSPA QHELQACHISQ

Qhelqaj qallariynin

¹ Kayqa Jesucristoj sut'inchasqan, mayqentachus Dios payman qorqa kamachinkunaman rejsichinanpaj imachus askamalla kananmanta, chay. Jesusqa angelninnejta chaykunata kamachin Juanman rejsicherqa.

² Chantá Juan chay tukuy imata rikusqanmanta testigo jina willarqa Diospa nisqanmanta, chantá Jesucristoj willasqanmanta ima.

³ Dios saminchanqa, pichus kay sut'inchaypa nisqanta iglesiaj uyarinanta ñawirenqa, chayta. Jinallataj saminchanqa pikunachus ñawirejta uyarinku, chantá kasunku, chaykunatapis, imaraykuchus kay p'anqapi imachus qhelqasqa kajpa junt'akunan ñapis qayllamushanña.

Juan qanchis iglesiakunata napaykun

⁴ Noqa Juan kayta Asiapi kaj qanchis iglesiakunaman qhelqamuykichej: Wiñaypaj kawsaj Dios wiñaymantapacha karqapuni, paytaj uj p'unchay ujtawan jamunan kashan. Pay, jinataj Tukuyta Kamachej Jesucristo, chantá kamachinan tiyanaj ñawpaqenpi qanchis jinamanta rejsichikoj Santo Espíritu ima qankunaman qhasilla k'acha yanapayninta, sonqo tiyaykuytataj qochun.

⁵ Jesucristoqa cheqanta willaj testigomin. Paymin wañusqamanta ñawpajta kawsarimporqa, payllataj kay pachapi tukuy kuraj kamachejkunata kamachin. Jesucristo munakuwarqanchej, jinataj wañuspa yawar jich'asqannejta juchanchejta pampacharqa.

⁶ Chay jawa Cristoqa noqanchej kamachejkuna jina kamachinanchejta munarqa, chantá Tata Diosninta yupaychanapaj sacerdotekunata jina churawarqanchej. Chayrayku pay jatunchasqa kachun, chantá wiñay, wiñaynintinpaj paymin kamachichun. Ajina kachun.

⁷ Qhawaychej: Cristo phuyupi jamushan. Tukuy runakuna payta rikonqanku, jinallataj payta t'ojsejkunapis. Kay pachapi kaj chhika runakuna payta manchachikuspa, manchayta waqanqanku. Arí, ajina kachun.

⁸ Noqa kani Tukuy Imaj Qallariynin, Tukukuynintaj, pichus kunan kaj, karqataj, wiñaypaj kallanqapunitaj, chay, nispa nin Tukuy Atiyniyoj Dios.

Juan Jesucristota rikun

⁹ Noqa Juan qankunaj wawqeykichej kani, Jesuswan ujchasqa kasqayraykutaj Diospa kamachiyninpi qankunawan khuska kashani. Jinallataj tukuy imaymana ñak'ariykunapi, chantá chay ñak'ariykunata Jesucristoj paciencia qosqanwan awantanapaj qankunawan khuska kashallanitaj. Noqaqa Patmos sutiyoj churupi wijch'usqa kasharqani Diospa simi nisqanmanta, chantá Jesucristomanta ima willasqayrayku.

¹⁰ Uj kuti Tukuyta Kamachej Jesuspa p'unchayninpi noqa Santo Espíritoj kamachiyninpi kaspa, Tata Diosta yupaychasharqani. Jinallaman qhepaymanta jatunmanta uj parlamojta uyarerqani, chay parlasqantaj trompetaj waqasqan jina karqa.

¹¹ Chantá kay jinata niwarqa: Imatachus rikusqaykita uj p'anqaman qhelqaykuy, chaytataj Asiapi kaj kay qanchis llajtakunapi iglesiaman apachiy: Efesoman, Esmirnaman, Pergamoman, Tiatiraman, Sardisman, Filadelfiaman, Laodiceaman ima, nispa.

¹² Chantá noqaqa parlamuwajta rikunaypaj qhepayta qhawarqani, qhawaspataj, qorimanta qanchis lamparakunata rikorqani.

¹³ Chay qanchis lamparakunaj chawpinpitaj Runaj Churinman rijch'akojta rikorqani, qhoysu p'achayojta, qhasqontaj qorimanta ruwasqa chumpiwan chumpisqata.

¹⁴ Paypa chujchan yuraj millma jina karqa, rit'i jina yurajtaj, ñawintaj nina lawray jina karqa.

¹⁵ Chakenqa llosq'ochasqa bronceman rijch'akorqa, ninayarishaj hornopi jich'asqa jina. Parlasqanpis ashkha yakoj phajchasqan jina uyarikorqa.

¹⁶ Jinallataj paña makinpi qanchis ch'askata jap'isharqa, siminmantataj puraj ladon filochasqa espada jina llojsimusharqa. Uyanpis manchayta lliphipisharqa, chawpi p'unchayta imaynatachus inti sinch'ita k'anchan, ajinata.

¹⁷ Maypachachus payta rikorqani chaypacha, noqa wañusqa jina ñawpaqenpi wijch'ukorqani. Paytajrí paña makinta patayman churaspa, niwarqa: Ama mancharikuychu. Noqa kani ñawpaj kaj, qhepa kajtaj,

¹⁸ chantá pichus kawsaj. Wañusqa karqani, kunantajrí wiñay wiñaypaj kawsashani. Noqallataj runakunata wañusqamanta kawsarichinaypaj atiyniyoj kani, jinallataj ukhu pachaj llaventawan jap'ishani.

¹⁹ Ajinaqa qan imatachus rikusqaykita qhelqay ari, kunan imachus kashan, chantá qhepanejman imachus kanan kashan, chaykunatawan.

²⁰ Kunantaj noqa sut'inchasqayki, paña makiypi rikusqayki chay qanchis ch'askakuna, chantá chay qanchis lamparakuna ima imatachus niyta munasqanta: Qanchis ch'askakunaqa qanchis iglesiakunaj angelninkuna kanku, chay rikusqayki qanchis lamparakunataj qanchis iglesiakuna kanku, nispa.