Amós 7 - DIOSPA QHELQACHISQ

Mosqoypi jina phinki phinkikunata rikun

¹ Tukuyta Kamachej Tata Dios kayta rikuchiwarqa: Payqa may chhika phinki phinkikunata wakichisharqa qhepa tarpuy p'utuyta qallarishajtin kachaykamunanpaj. Chay tarpuy karqa, kuraj kamachejpaj uj t'aqata chajra poqoymanta ñawpajta oqharisqanku, chaymanta qhepamanraj.

² Chantá chay phinki phinkikuna chajrata tukuykushajtinña, nerqani: Tukuyta Kamachej Tata Dios, juchaykuta pampachawayku. Imawantaj kawsasqayku juch'uy suyulla kashaspari? nispa.

³ Chantá Tata Dios khuyakuspa, nerqa: Chaytaqa mana ruwasajchu, nispa.

Mosqoypi jina ninata rikun

⁴ Chantá Tukuyta Kamachej Tata Dios kayta rikuchiwarqa: Payqa manchay lawrarishaj ninata wakichishasqa ayllunta chaywan jasut'inanpaj. Chay ninaqa mama qochata ch'akirparichisqa, tukuy chajratapis ruphaykullasqataj.

⁵ Chantá nerqani: Ama ari chayta ruwaychu, Tukuyta Kamachej Tata Dios. Imawantaj kawsasqayku juch'uy suyulla kashaspari? nispa.

⁶ Chayrayku Tata Dios imatachus yuyasqanta manaña ruwayta munarqachu: Manallataj chaypis kanqachu, nispa.

Mosqoypi jina plomadata rikun

⁷ Tata Dios kaytapis rikuchillawarqataj: Tukuyta Kamachej Diosqa perqa qayllapi kashasqa, makinpitaj plomadata jap'ishasqa.

⁸ Chantá Tata Dios niwarqa: Amós, imatataj rikunki? nispa. Noqataj nerqani: Albañilpa plomadanta rikuni, nispa. Paytaj niwarqa: Kunan kay plomadawan yachasaj Israel aylluy cheqantachus purishan manachus, chayta. Chantá manaña ujtawan paykunaj juchankuta ajinalla pasachisajchu.

⁹ Isaacpa yupaychanan wasikuna thuñisqa kanqanku, Israelpa lanti yupaychana templonkunapis urmachisqa kanqa. Jeroboanpa aylluntapis espadawan wañuchichisaj, nispa.

Amoswan Amasiaswan

¹⁰ Chaymanta qhepaman Betelmanta sacerdote Amasiasqa Israelta kuraj kamachej Jeroboanman uj willajta kachaspa, nicherqa: Amosqa Israel suyupi qanpa contraykita runakunata oqharichispa purishan. Noqanchejrí mana ajina parlajtaqa qhawallasunmanchu.

¹¹ Payqa tukuynejta purispa, kay jinata nishan: Jeroboán espadawan wañuchisqa kanqa, tukuy Israel ayllutaj mana munashaj waj suyuman apasqa kanqa, nispa.

¹² Chantá sacerdote Amasías Amosta kamacherqa: Diosmanta sut'inchaj, ripuy kaymanta. Sichus Diosmanta sut'inchaspa kawsayta munanki chayqa, ripuy Judá suyuman, chaypitaj sut'inchamuy.

¹³ Amaña Betelpi Diosmanta sut'inchaychu, imaraykuchus kay llajtapi tiyan tukuy israelitakunaj kuraj kaj templonku, maymanchus kuraj kamachejwan, tukuy runawan ima yupaychaj jamunku, chay, nispa.

¹⁴ Amostajrí Amasiasman kuticherqa: Noqaqa mana Diosmanta sut'inchajchu kani, nitaj Diosmanta sut'inchaj kanaypaj yachachiwarqankuchu. Kawsanaypajqa uywata michini, k'ita higotataj pallakuni.

¹⁵ Chaywanpis ovejata michikushajtiy, Tata Dios niwarqa: Rispa, Israel aylluyman sutiypi parlamuy, nispa.

¹⁶ Chayrayku uyariy Tata Diospa nisqanta. Qan ninki: Ama imatapis Diospa sutinpi parlaychu Israelpa contranta, amataj parlaychu Isaacpa mirayninpa contrantapis, nispa.

¹⁷ Tata Diostajrí kay jinata nisunki: Warmiyki llajta chawpipi phisu warmiman tukonqa, jinataj churiykikuna, ususiykikunapis wañurachisqa kanqanku. Jallp'aykitapis suerteta choqaspa rak'inakullanqankutaj, qantaj Diosta mana rejsejkunaj suyunkupi wañunki. Israelitakunapis mana munashajta llajtankumanta karu suyuman apasqa kanqanku, nispa.