Amós 5 - DIOSPA QHELQACHISQ

Diosman kutirikuna

¹ Israelitakuna, qankunaj contraykichejpi llakiy yarawita takisqayta uyariychej.

² Manaraj qharita rejsej sipas jina Israelqa urman, manaña ujtawan sayariyta atinanpaj jina. Kikin jallp'api wijch'usqa qhepakun, manataj pipis kanchu aysarej.

³ Tukuyta Kamachej Tata Diosqa israelitakunaman ajinata nin: Sichus uj llajtamanta waranqa runakunata maqanakuman kachankichej chayqa, pachajllaña kutimonqanku. Sitajchus uj llajtamanta pachajta maqanakuman kachankichej chayqa, chunkallaña kutimonqanku, nispa.

⁴ Tata Diosqa israelitakunaman nillantaj: Noqaman kutirikamuwaychej kawsanaykichejpaj.

⁵ Amaña Betelman qayllaychejchu, amataj Gilgalman riychejchu. Amallataj Bersebanejtapis chimpaychejchu, imaraykuchus Gilgalpi tiyakojkuna apasqa kanqanku, Beteltaj laqayallamanña tukuchisqa kanqa, nispa.

⁶ Tata Diosman kutirikamuychej, kawsanaykichejpaj. Manachus jinata ruwankichej chayqa, Tata Dios israelitakunaj patankuman ninata kachaykamonqa, Betelpitaj ninata thasnunanpaj mana pipis kanqachu.

⁷ Ay, qankunamanta, justiciata ñak'arinaman tukuchejkuna, pikunachus cheqan kajta ruwanata pampaman wijch'ojkuna.

⁸ Tata Diosmin Cabrilla nisqa ch'askakunata, Orión nisqa ch'askakunatawan ruwarqa. Payllataj tutata p'unchayman tukuchin, jinallataj p'unchaytapis laqhaman. Paymin mama qochamanta yakuta phuyuman tukuchispa, jallp'a pataman parachimun.

⁹ Paymin jatuchaj pukarakunata urmachin, laqayamantaj tukuchin. Paypa sutenqa Tata Diosmin.

¹⁰ Ay, qankunamanta justiciata ruwajta chejnejkuna, pikunachus testigo jina cheqanta parlajkunata mana rikuyta atejkuna.

¹¹ Qankunaqa ch'eqosqa rumimanta ruwasqaykichej wasikunapi mana tiyakuyta atinkichejchu, nitaj poqochisqaykichej uvamanta vinotapis ujyayta atinkichejchu, imaraykuchus wajchakunata waqacherqankichej, poqochisqanku trigomantataj ashkha impuestota orqhorqankichej.

¹² Tata Dios nillantaj: Noqa millay ruwasqaykichejta yachani, juchaykichejtaj may jinamin kanku. Qankunaqa cheqanta ruwajta ñak'arichinkichej, juzgadopitaj wajchakuna quejapi atipachikunankupaj lluk'ita jap'ikunkichej.

¹³ Chayrayku yuyayniyoj runaqa ch'inlla kakun, imaraykuchus kunan tiempoqa manamin allinchu.

¹⁴ Mask'aychej allin kajta, amataj mana allin kajtaqa, kawsankichejtaj. Ajinata niyta atinkichej: Tukuy Atiyniyoj Tata Dios noqanchejwan kashan, nispa, chay nisqaykichejtaj jinapuni kanqa.

¹⁵ Mana allin kajta chejniychej, allin kajtataj munakuychej. Justicia ruwana wasipi cheqan justicia ruwasqa kananta mask'aychej. Jinata ruwajtiykichej, ichapis Tukuy Atiyniyoj Tata Dios puchoj israelitakunamanta khuyarikunman.

¹⁶ Ajinatamin nin Tukuy Atiyniyoj Tata Dios: Tukuy plazakunapi waqay kanqa, tukuy callekunapitaj nanaywan qhapariy kanqa. Campo runakunata wajyanqanku paykunawan khuska waqanankupaj, pagomanta waqajkunatataj waqanankupaj mink'allanqankutaj.

¹⁷ Tukuy uva huertakunapipis waqanqanku, maypachachus noqa jasut'ej jamusaj, chaypacha. Noqa Tata Diosmin ajinata nini.

¹⁸ Ay, jatun llakiy kanqa, pikunachus Tata Diospa p'unchaynin chayamunallantaña munashanku, chaykunapaj. Yachankichejchu imaynachus chay p'unchay qankunapaj kananta? Chay p'unchayqa laqhalla kanqa, manataj sut'ichu.

¹⁹ Chay p'unchay kanqa, imaynachus runa leonmanta ayqekushaspa, jukumariwanñataj tinkuykun, ajina. Chayrí runa wasinman ayqespa perqaman atiykurikojtin, katariñataj khanirparin, ajina.

²⁰ Arí, Tata Diospa p'unchaynin laqhalla kanqa, manataj k'anchay kanqachu. Tuti laqha kanqa, manataj sut'ichu.

²¹ Tata Dios nillantaj: Yupaychanawaykichejpaj raymikunata chejnikuni, millachikunitaj. Sutiypi jatun tantakuyniykichejtapis mana awantayta atinichu.

²² Sutiypi uywata ñak'aspa q'olachinata mana munanichu, nitaj ch'aki mikhuy jaywanawaykichejtapis. Manallataj wira torillokunata allinyakuna jaywanata jina q'olachisqaykichejtapis jap'ikusqaykichejchu.

²³ Karunchaychej noqamanta ch'ajwaspa takisqaykichejta. Arpaykichejpa waqasqanta mana uyariyta munanichu.

²⁴ Aswanpis justiciata ruwayqa yaku jina purichun, cheqan sonqo kaytaj mayupi mana tukukoj yaku jina kachun.

²⁵ Israelitakuna, tawa chunka watata ch'innejpi purishaspa, uywa ñak'asqa q'olachinata, jaywanatawan noqamanchu jaywawarqankichej?

²⁶ Aswanpis kamachejniykichej Sicut lantita aparqankichej, jinallataj Quiún ch'askaj lantintapis lijrarikorqankichej, mayqentachus qankunalla ruwakorqankichej, chaykunata.

²⁷ Chayrayku noqaqa Damascomanta aswan jaqayman apachisqaykichej. Noqa Tukuy Atiyniyoj Tata Dios chayta nini. Chaymin suteyqa.