2 Timoteo 4 - DIOSPA QHELQACHISQ

Diospa nisqanta yachachiy

¹ Noqaqa Diospa ñawpaqenpi, chantá Cristo Jesuspa ñawpaqenpipis, pichus Kuraj Kamachej jina kamachinanpaj jamuspa kawsajkunata, wañusqakunatapis juzganqa, chaypa ñawpaqenpi, kayta ruwanaykita kamachiyki:

² Diospa simi nisqanmanta mana sayk'uspa parlaypuni tutapis, p'unchaypis, mayk'ajllapis. Jinataj wawqe panakuna pantajtinku, cheqan ñanman churay, k'amiy, chantá pacienciawan yachachispa, Jesucristota qhatejkunaj sonqonkuta oqhariy.

³ Chayta niyki, imaraykuchus aswan qhepanejman runakuna cheqan kaj yachachiyta mana uyariyta munanqankuchu. Manachayqa paykuna munasqankuman jina ashkha yachachejkunata mask'anqanku, imatachus uyariyta munasqankuta yachachinankupaj.

⁴ Cheqa kajta qhesachanqanku, qhasi manakaj cuentokunallata uyarispa kasunankupaj.

⁵ Qantajrí tukuy imapipis allin yuyayniyojpuni kay, imata ñak'ariypipis pacienciakuspa. Chantá Jesusmanta sumaj willayta willallaypuni, jinataj imachus ruwanaykitapis allinta ruway.

⁶ Noqarí Diosman jich'asqa jaywana jina jaywasqa kanaypaj jinaña kashani. Wañunay p'unchayqa chayamushanña.

⁷ Noqaqa soldado jina sumajta maqanakorqani tukuy imapi Diosta kasunaypaj. Maymanchus chayanayman chayashaniña. Chantá Diospi atinikusqaypi mana llawch'iyarqanichu.

⁸ Chayrayku kasukuspa kawsasqaymanta noqapaj pillu tiyan. Chaytataj jaqay p'unchaypi Tukuyta Kamachej Dios, pichus cheqan kaj Juez t'inkata jina qowanqa. Manataj noqallamanchu qowanqa, aswanpis kutimunan p'unchayta imata jina tukuy suyajkunamanpis qollanqataj.

Pabloqa Timoteota imatachus ruwananta nin

⁹ Timoteo, usqhayllata watukuwaj jamunaykipaj atisqaykita ruway.

¹⁰ Demasqa saqerpariwaspa, Tesalónica llajtaman ripun, kay pachapi kajta astawan munakusqanrayku. Crescentepis Galaciaman rin, Titotaj Dalmaciaman.

¹¹ Lucaslla noqawan kashan. Qan jamuspaqa, Marcosta pusamuy, imaraykuchus payqa noqata imachus ruwanaypi sumajta yanapawanqa.

¹² Tiquicotaqa Efesoman kacharqani.

¹³ Qanrí jamoj jina, Troaspi Carpoj wasinpi saqesqay patanchana p'achayta, p'anqaykunatawan apampuway, astawanqa qarapi qhelqasqakunata.

¹⁴ Fierrota takaj Alejandroqa ashkha mana allinkunata ruwawarqa. Tukuyta Kamachej Diosrí payman ruwasqanman jina kutichiponqa.

¹⁵ Qanpis paymanta allinta qhawakuy, imaraykuchus yachachisqanchejpa contranpi anchatapuni sayaykun.

¹⁶ Ñawpaj kutita kamachejkunaj ñawpaqenkupi ch'ataykuwasqankumanta kutichikushajtiy, mana pipis yanapawarqachu, manachayqa tukuyninku saqerpariwarqanku. Chayta ruwasqankurayku ama paykunamanta Dios cuentata mañachunchu.

¹⁷ Chaywanpis, Tukuyta Kamachej Dios noqawan karqa, kallpachawarqataj Jesuspa sumaj willayninmanta sut'ita parlanaypaj, ajinamanta mana judío kajkuna uyarinankupaj. Ajinata Diosqa leonpa siminmanta jina wañunaymanta kacharichiwarqa.

¹⁸ Paytaj tukuy mana allin kajmantapis waqaychallawanqataj, janaj pacha kamachiyninman pusakapuwaspataj, qhespichiwanqa. Payqa wiñay wiñaypaj jatunchasqa kachun. Ajina kachun.

Pablo wawqe panakunata napaykun

¹⁹ Napaykapuway Priscilata, Aquilata, Onesíforoj wasinpi kajkunatawan.

²⁰ Erastoqa Corintopi qhepakorqa, Trofimotataj Miletopi onqosqata saqerqani.

²¹ Qanrí manaraj chiri tiempo chayamushajtin, jamuypuni. Jinataj Eubulo, Pudente, Lino, Claudia, chantá tukuy wawqe panakuna ima qanta napaykamusunku.

²² Tukuyta Kamachej Jesucristo qanwan kachun. Jinallataj Diospa qhasilla k'acha yanapayninpis qankunawan kachun.