2 Timoteo 2 - DIOSPA QHELQACHISQ

Jesucristoj sumaj soldadon

¹ Qan, wawáy, kallpachakuy, Cristo Jesusman ujchasqa kasqanchejrayku, Dios qhasilla k'acha yanapayninta qowasqanchejnejta.

² Chantá ashkha rikojkunaj uyarinankuta imatachus yachachishajta uyariwarqanki, chayta atinikunapaj jina kajkunaman yachachiy, paykunapis wajkunaman yachachiyta atinankupaj.

³ Qantajrí Cristo Jesuspa sumaj soldadon jina noqawan khuska tukuy ima ñak'arinata awantay.

⁴ Ni mayqen soldadopis soldado jina ruwananpi kashaspa, waj ruwanaman sat'ikunchu. Manachayqa kamachejninpa munayninta ruwan payta kusisqata rikuyta munaspa.

⁵ Manallataj pujllaypi tinkojpis pilluta t'inkata jina jap'enqachu, manachus kamachisqaman jina pujllanqa chayqa.

⁶ Ajinallataj chajrata tarpojpis, payraj ñawpajta chajra poqosqanmanta mikhunan tiyan.

⁷ Kay nisqaypi sumajta unanchay, Tukuyta Kamachej Jesustaj yachayta qosonqa kay tukuy ima umaykiman yaykunanpaj.

⁸ Jesucristomanta ni jayk'aj qonqakuychu. Payqa Davidpa mirayninmanta karqa, kawsarimporqataj wañusqakuna ukhumanta, sumaj willayta willasqayman jina.

⁹ Paymanta sumaj willayta willasqayrayku noqa ñak'arishani, runa wañuchipis kayman jinataj wisq'asqa kashani. Diospa simi nisqanrí mana wisq'asqachu.

¹⁰ Chayrayku, tukuy imata ñak'arispa awantashani Diospa ajllakusqankunata munakusqayrayku, paykunapis Cristo Jesusnejta qhespichisqa kayta, chantá wiñay kusiytawan tarinankupaj.

¹¹ Kay nisqaqa jinapuni: Sichus Cristowan khuska wañusun chayqa, paywan khuskallataj kawsasunchej.

¹² Paywan khuskachus ñak'arisun chayqa, paywan khuskallataj kamachiyninpi kamachisunchej. Sichus Cristota qhesachasun chayqa, paypis manallataj jap'ikuwasunchu.

¹³ Sichus payta wasanchasunman chaypis, payqa nisqanta junt'allanpuni, imaraykuchus nisqanmanta manapuni kutirinchu.

Diospa munasqanman jina ruwaj kamachi

¹⁴ Timoteo, chaykunamanta tukuyman yuyarichiy. Chantá Diospa ñawpaqenpi paykunata kamachiy, ama ima simi jawa churanakunankuta. Chay jina churanakunaqa mana imapaj walejchu, aswanpis uyarejkunaj umankuta muyuchispa, pierdechin.

¹⁵ Qanrí atisqaykita ruway Diospa ñawpaqenpi allinpaj qhawasqa kanaykipaj. Imachus ruwanaykita sumajta ruway, ama imamanta p'enqakunaykipaj jina, cheqa kaj willayta maychus kajta yachachispa.

¹⁶ Diosman mana kutirikojkunaj qhasi manakaj thawtisqankuta ama kasu ruwaychu, imaraykuchus chayqa astawan astawan runata millay kawsayman apan.

¹⁷ Chay jinata yachachejkunaj yachachisqankoqa gangrena onqoy jina junt'aykun, chaykunamantataj Himeneowan, Filetowan ima kanku.

¹⁸ Paykuna cheqa kajmanta pantaykuspa, yachachinku wañusqamanta kawsarimpoyqa kasqantaña. Ajinata nispataj, wakinkunata Diospi atinikuymanta pantachinku.

¹⁹ Chaywanpis Diospa cimiento churasqanqa sumajta sayan, chay cimientopitaj kay jina qhelqasqa kashan: Tukuyta Kamachej Diosqa paypata kajkunata rejsin, nispa. Nillantaj: Tukuy pikunachus Tukuyta Kamachej Diospata kajkunaqa millayta ruwaspa purinamanta t'aqakuchunku, nispa.

²⁰ Nisunchej: Qhapaj runaj wasinpi imachus kajqa mana tukuychu qorimanta, chayrí qolqe metalmanta ruwasqa. Wakin imakuna kallantaj k'ullumanta, t'urumantapis. Chantá wakenqa jatun p'unchayllapi oqharinapaj kanku, wakintaj sapa p'unchay oqharinapaj.

²¹ Ajinallataj pichus mana allin kajta ruwanamanta t'aqakojqa jatun p'unchayllapi oqharinapaj jina kanqa. Payqa Tukuyta Kamachej Diospaj t'aqasqa kaspa, wakichisqa kanqa, Dios paynejta tukuy allin kajta ruwananpaj.

²² Waynakunata, sipaskunataqa tukuy imaymana millay kajta ruwaspa purinaman sonqonku aysan. Qanrí chay jina purinamanta ayqey. Aswanpis cheqan kajta ruwaspallapuni puriy, jinallataj Diosta mana wasanchaspa kawsay. Chantá munakuyniyoj kaspa, wajkunawan allinpi kawsakuy. Ajinata ruway, pikunachus llimphu sonqomanta Diosta yupaychanku Diosninkupaj rejsikapusqankurayku, chaykunawan khuska.

²³ Qhasi manakaj wampu tapunakuykunata ama kasu ruwaychu. Yachanki jina, chaykunaqa phiñanakunallata jatarichin.

²⁴ Tukuyta Kamachej Diospa kamachinrí mana churanakojchu kanan tiyan, manachayqa tukuypaj k'acha, yachachinapaj wakichisqa, pacienciayoj ima.

²⁵ Payqa mana uyarikuyta munajkunata llamp'u sonqowan k'amispa, cheqan ñanman churachun. Ichapis chay jinamanta Dios munanman paykuna payman kutirikunankuta, cheqa kajta rejsinankupaj.

²⁶ Ajinamanta yuyayninkuman kutirispa, Kuraj Supaypa tojlla churasqanmanta llusp'inkuman, imajtinchus payqa watasqata jina paykunata jap'ishan, munayninta ruwanankupaj.