2 Samuel 21 - DIOSPA QHELQACHISQ

David Gabaón llajtayojkunawan

¹ David kuraj kamachej kashajtin, kinsa wata junt'ata yarqhay karqa. Chaypacha Davidqa Tata Diosta tapurerqa, Tata Diostaj kuticherqa: Chay yarqhayqa kashan Saúl, jinataj ayllunkunapis gabaonitakunata wañuchisqankumanta, nispa.

² Chantá Davidqa gabaonitakunata wajyaspa, paykunawan parlarqa. Gabaonitakunaqa mana Israel ayllumantachu karqanku, manachayqa amorreokunamanta puchojkuna karqanku. Chaykunawantaj israelitakunaqa tratota ruwasqanku. Saulqa gabaonitakunata Israelmanta, Judamanta ima mayta sientespa, tukuchiyta munarqa.

³ Davidtaj paykunata tapurerqa: Imanasajtaj qankunawanri? Imatataj ruwasaj allinyananchejpaj, jinamanta Tata Diosqa ayllunta saminchananpajri? nispa.

⁴ Gabaonitakunataj kuticherqanku: Saulwan, aylluntinwan ch'ajwaqa mana qolqemantachu, nitaj qorimantachu, nillataj munaykuchu mayqen israelita wañunantapis, nispa. Davidtaj paykunata nerqa: Niwaychej ari imatachus munankichej qankunarayku noqa ruwanayta, nispa.

⁵ Chantá paykuna kuticherqanku: Chay runaqa chinkachiyta munawarqayku, wakichikorqataj noqaykuta tukuchiyta munaspa, amaña kay Israel suyupi tiyakunaykupaj.

⁶ Chayrayku chay runaj ayllunmanta munayku qanchis qharikunata qonawaykuta, noqaykutaj chaykunata Tata Diospa ñawpaqenpi warkhusqayku Tata Diospa ajllasqan kuraj kamachej Saulpa llajtan Gabaapi, nispa. Kuraj kamachejtaj nerqa: Qosqaykichej, nispa.

⁷ Chaywanpis Davidqa Saulpa allchhin, Jonatanpa churin Mefibosetta khuyarqa, paywan Jonatanwan Tata Diospa ñawpaqenpi uj tratota ruwasqankurayku.

⁸ Jinapis jap'icherqa Ayáj ususin Rispáj iskaynin churinkunata. Chaykuna Saulpa wawankuna karqanku, Armoni jinataj Mefiboset sutiyoj. Ajinallatataj jap'icherqa Saulpa ususin Micalpa phishqa churinkunatawan, paykunaj tatankutaj karqa Mejolamanta Barzilaypa churin Adriel.

⁹ Chaykunataqa Gabaonpi tiyakojkunaman jaywaykorqa, paykunataj Tata Diospa ñawpaqenpi chay orqo patapi sipirarqanku. Ajinamanta wañorqanku ujllapi qanchisnintin, cebada oqhariy qallarikushajtin jina.

¹⁰ Chantá Ayáj ususin Rispaqa qhashqa luto p'achawan p'achalliykukuspa, uj chhanka pataman mast'aykukorqa. Chaypitaj qhepakorqa cebada oqharikuymantapacha paray tiempo chayamunankama, jark'aspa suwintukuna chay ayakunaman p'unchaypi ama tiyaykunankupaj, jinallatataj ch'isinpis k'ita animalkuna ama qayllanankupaj.

¹¹ Chantá Davidman willamorqanku Saulpa ujnin warmin, Ayáj ususin Rispá imatachus ruwashasqanta.

¹² Chaypacha Davidqa Galaad jap'iypi Jabés llajtaman rispa, Saulpa tullunta, jinataj churin Jonatanpa tulluntapis oqharimorqa. Jabés llajtayojkunaqa aya warkhurayashajta Betsán plazamanta suwamusqanku, maypichus filisteokuna Saulta Gilboapi atipaykuspa warkhusqanku, chaymanta.

¹³ Jinataj David kamacherqa Saulpata, Jonatanpatawan tullunkuta apamunankuta, jinallataj sipisqa karqanku, chaykunajtapis.

¹⁴ Saulpa tullunta, jinataj Jonatanpatapis p'amparqanku Saulpa tatan Cispa covachanpi, Benjaminpa jap'iyninpi, Selá nisqa llajtapi. Tukuy imatataj kuraj kamachej kamachisqanman jina ruwarqanku. Chayta ruwasqankuraykutaj Diosqa israelitakunamanta khuyakorqa, tukuy imataj watejmanta poqorqa.

Abisayqa Davidta wañuchisqa kananmanta jark'an

¹⁵ Filisteokuna watej israelitakunaj contranpi oqharikorqanku. Chaypacha Davidqa, soldadonkuna ima paykunawan maqanakoj llojserqanku. Maqanakuspataj, David sinch'ita sayk'urparerqa.

¹⁶ Jinapi uj jatunkaray runataj Isbibenob sutiyoj Davidta wañuchiyta munaspa, qayllaykorqa. Chay runaj lanzanpa umanqa kinsa kilo khuskanniyojmanta astawanraj karqa, chumpinpitaj uj mosoj espadata apasharqa.

¹⁷ Seruyáj churin Abisaytajrí Davidta yanapaj rispa, chay filisteota wañurparicherqa. Chaypacha Davidpa soldadonkunaqa mañarqanku pay amaña paykunawan khuska maqanakuman llojsinanta, jinamanta Israelpa kuraj kamachejnin ama wañuchisqa kananpaj.

Jatunkaray runakunawan maqanaku

¹⁸ Chaymanta Gob llajtapi filisteokunawan uj maqanaku kallarqataj. Chay kutipeqa Sibecay husatitaqa Saf sutiyoj runata wañurparicherqa. Chayqa jatunkaray runaj mirayninkumanta karqa.

¹⁹ Waj maqanaku filisteokunawan Gob llajtapi kallarqataj, chaypachataj Belenmanta Yaredpa churin Eljananqa Gatmanta Goliatta wañucherqa. Goliatpa lanzanqa manchay jatun karqa, jap'inantaj awana k'aspi chhikanpuni karqa.

²⁰ Gatpipis waj maqanaku kallarqataj. Chaypi kallarqataj uj jatunkaray runa. Ruk'ananqa iskay chunka tawayoj karqa, sojtakama sapa chakinpi, jinallataj sojtakama sapa makinpi. Chay runapis jatunkaray ayllullamantataj karqa.

²¹ Payqa israelitakunaj contrankuta sayaykojtin, Davidpa wawqen Simeaj churin Jonatanqa payta wañucherqa.

²² Tawa jatunkaray runakunaqa chay Gat llajtamanta, Refaj mirayninmanta karqanku, chaykunatataj Davidwan, yanapajninkunawan wañucherqanku.