2 Reyes 24 - DIOSPA QHELQACHISQ

¹ Joacín kamachishajtin, Babilonia suyuta kuraj kamachej Nabucodonosor Judá suyoj contranpi maqanakoj jamuspa, Joacinta atipaykorqa. Jinataj Judá suyoqa kinsa watata kuraj kamachej Nabucodonosorpa makinpi karqa. Chay kinsa wata pasaytataj Joacín kuraj kamachej Nabucodonosorpa contranpi oqharikorqa.

² Chantá Tata Diosqa Joacinpa contranta suwa runakunata kachaykamorqa caldeokunamanta, siriokunamanta, moabitakunamanta, amonitakunamantawan ima. Chaykunata Judá suyuta tukuchinankupaj kachamorqa, Diosqa paymanta sut'inchajkunanejta nisqanman jina junt'ananpaj.

³ Judá suyuta ajina llakiykuna qhatirerqa, Tata Diospuni ajina kananta nisqanrayku. Tata Diosqa Judá suyuta ñawpaqenmanta wijch'uyta munarqa, kuraj kamachej Manasés tukuy imaymanata ruwaspa juchallisqanrayku.

⁴ Chayrayku Tata Diosqa Judá suyuta manapuni qhespichiyta munarqachu, Jerusalenpi ashkha mana juchayojkunata Manasés wañuchichisqanrayku.

⁵ Joacín kamachishaspa imatachus ruwasqan, waj imakunata ruwasqanpiwan Judá suyuta kuraj kamachejkunaj ruwasqankumanta willaj qhelqapi qhelqasqa kashan.

⁶ Joacín wañupojtintaj, churin Joaquín paypa cuentanmanta kamacherqa.

⁷ Chaymantapacha faraonqa Egiptomanta manaña ujtawan llojsimorqachu, imaraykuchus Babiloniata kuraj kamachejqa faraonpa jallp'anta Egipto mayumantapacha Éufrates mayukama jap'ikapusqa.

Joaquín Judá suyuta kamachin

⁸ Joaquín chunka pusajniyoj watayoj kashaspa, Judá suyuta kamachiyta qallarerqa. Jerusalenmantapachataj kinsa killallata kamacherqa. Mamanqa Jerusalenmanta Elnatanpa ususin Nejustá sutiyoj karqa.

⁹ Joaquinqa manapuni Tata Diospa munasqanman jinachu ruwarqa, manachayqa tatan jinallataj mana allin kajta ruwarqa.

¹⁰ Pay kamachishajtin, Babilonia suyuta kuraj kamachej Nabucodonosorpa soldadonkuna Jerusalén llajtata jap'inankupaj muyuykorqanku.

¹¹ Chantá soldadokuna Jerusalén llajtata jap'inankupaj muyuykusqankutawan, Babiloniata kuraj kamachej Nabucodonosor chayamorqa.

¹² Jinapi Judá suyuta kuraj kamachej Joaquín mamanwan, kurajninkunawan, soldadokunata kamachejkunawan ima Nabucodonosorman k'umuykorqanku. Babilonia suyuta kuraj kamachejtaj paykunata presocharqa. Chay karqa Nabucodonosor Babilonia suyuta pusaj watataña kamachishajtin.

¹³ Nabucodonosorqa Tata Diospa Templonmanta, chantá kuraj kamachejpa wasinmanta ima valorniyoj imakunata orqhospa, apakaporqa. Jinallataj Salomón Templopaj imatachus qorimanta ruwachisqanta p'akirarqa. Ajinata Tata Diospa nisqan junt'akorqa.

¹⁴ Chantá Jerusalén llajtapi tukuy tiyakojkunata, kurajkunata, wapu soldadokunata, fierro takayta yachajkunata, tukuy imata ruwayta yachajkunata jap'ispa, presota jina aparqa. Tukuyninpi 10.000 runakunata aparqa. Judá suyupeqa sinch'i wajcha runakunallata saqerqa.

¹⁵ Jinallataj Nabucodonosorqa Jerusalenmanta Babiloniaman Joaquinta, mamantawan, warminkunatawan, soldadonkunata kamachejkunatawan, chantá manchay respetowan qhawasqa runakunatawan ima jap'ispa, aparqa.

¹⁶ Babilonia kuraj kamachejqa maqanakupaj 7.000 wapu soldadokunata apallarqataj, tukuy imata ruwayta yachajkunata, fierrota takayta yachajkunatawan ima, waranqata apallarqataj.

¹⁷ Chantá Babilonia kuraj kamachej Nabucodonosor Joaquinpa cuentanmanta tion Mataniasta Judá suyuta kamachinanpaj churarqa, paytataj suticharqa Sedequías sutiwan nispa.

Sedequías Judá suyuta kamachin

¹⁸ Sedequías kamachiyta qallarishaspa, iskay chunka ujniyoj watayoj karqa. Jerusalenmantapachataj chunka ujniyoj watata kamacherqa. Mamanqa Libnamanta Jeremiaspa ususin Jamutal sutiyoj karqa.

¹⁹ Sedequiasrí manapuni Tata Diospa munasqanman jinachu ruwarqa, aswanpis tatan Joacín jina, mana allin kajta ruwarqa.

²⁰ Chayrayku Tata Diosqa Jerusalenpa chantá Judá suyoj contranpi ima phiñakorqa. Paypa ñawpaqenmantataj paykunata wijch'orqa. Chantá kuraj kamachej Sedequiasqa Babiloniata kuraj kamachejpa contranpi oqharikorqa.