2 Reyes 23 - DIOSPA QHELQACHISQ

¹ Chantá kuraj kamachej Josías Judá suyumanta, Jerusalenmantawan tukuy kurajkunata kamacherqa paywan tantakunankuta.

² Chaymantataj kuraj kamachejqa Judamanta runakunawan, Jerusalenpi tiyakojkunawan, Diosmanta sut'inchajkunawan, sacerdotekunawan, jinallataj tukuy israelitakuna, wawakunapis, machu runakunapis Tata Diospa Templonman rerqanku. Chaypitaj kuraj kamachej Josiasqa paykunaj uyarinankuta, Templopi tarisqanku trato ruwasqamanta qhelqata ñawirerqa.

³ Chantá kuraj kamachejqa sayanta qayllapi sayaspa, Tata Diospa uyarinanta tratota ruwarqa, tukuy sonqomanta Tata Diosta kasuspa purinankupaj, kamachisqanta junt'anankupaj, nisqanta ruwanankupaj ima. Chantá tukuy runakuna chay tratota junt'anankuta nerqanku.

Josías Templota allinchan

⁴ Chantá kuraj kamachej Josías kuraj kaj sacerdote Hilciasta, paypa kamachiyninpi kaj sacerdotekunata, punkuta qhawajkunata ima kamacherqa Baalta, Aseraj lantinta chantá ch'askakunata yupaychanapaj imachus karqa, chaykunata Tata Diospa Templonmanta orqhonankuta. Chantá chaykunata Jerusalenmanta jawaman orqhospa, Cedrón vallepi ruphaykucherqa, ushphatataj Betelman apacherqa.

⁵ Chantá Judá suyuta kuraj kamachejkuna, pikunachus orqopi inciensota q'oshñichinankupaj churasqanku, chay sacerdotekunata wijch'orqa. Orqo patapi altarkuna karqa Judá suyumanta tukuy llajtapi, Jerusalenpi, chantá muyuyninpi ima. Jinallataj Baalman, intiman, killaman, ch'askakunaman, janajpi kaj chhika ch'askakunaman ima inciensota q'oshñichej sacerdotekunatapis wijch'ullarqataj.

⁶ Jinaytawantaj, Josías Tata Diospa Templonmanta Aseraj lantintapis Jerusalenmanta jawaman, Cedrón wayq'oman wijch'ucherqa. Chaypitaj ushphaman tukunankama ruphaykucherqa, ushphatataj wajcha runakunaj ayanta p'ampana cheqaman qhallirpayacherqa.

⁷ Tata Diospa Templonpi lantita yupaychaspa qharipura khuchichakojkunaj wasinkutapis urmacherqa. Chaypipis warmikunaqa Asera lantipaj p'achakunata awallajtaj kanku.

⁸ Chantá kuraj kamachej Josiasqa Judá suyumanta tukuynin sacerdotekunata wajyacherqa. Jinallataj Gebamantapacha Bersebakama orqo patapi tukuy altarkunata thuñiykorqa, maypichus sacerdotekuna inciensota q'oshñichej kanku, chaykunata. Urmachillarqataj llajtata kamachej Josuéj wasin punkupi kaj altarkunata. Chay kamachina waseqa llajtaman yaykunamanta lloq'ennejpi karqa.

⁹ Pikunachus orqokunapi inciensota q'oshñichej kanku, chay sacerdotekuna Jerusalenpi Tata Diospa altarninman manaña chimpayta aterqankuchu. Chaywanpis sacerdote masinkunawan mana levadurayoj t'antata mikhullaj kanku.

¹⁰ Jinallatataj kuraj kamachej Josiasqa Ben Jinón vallepi jaywanata q'olachina cheqata millachikunaman tukuchillarqataj, amaña pipis qhari wawanta, chayrí warmi wawanta chaypi q'olachispa Moloc nisqaj lantinman jaywananpaj.

¹¹ Chantá Judá suyuta kuraj kamachejkuna intita yupaychanapaj t'aqasqanku caballokunatapis wijch'ullarqataj. Chaykunaqa Tata Diospa Templonman yaykunapi karqanku Natán Melecpa wasin chaynejpi. Jinallataj kuraj kamachej Josiasqa intipaj t'aqasqa carretakunatapis ruphaykuchillarqataj.

¹² Jinallataj payqa Judá suyuta kuraj kamachejkuna Ajazpa wasin patapi ruwasqanku altarkunatapis phirillarqataj. Tata Diospa Templonpa iskaynin pationkunapi kuraj kamachej Manasés altarkunata ruwasqantapis ñut'uta kutarparichispa, Cedrón wayq'oman wijch'uchimorqa.

¹³ Ajinallatataj kuraj kamachej Josiasqa Jerusalén llajtaj chimpanpi orqo patapi altarkunatapis millachikunaman tukuchillarqataj. Chantá Olivoyoj orqoj pañannejpi kaj altarkunapis millachikunaman tukuchillarqataj. Chay altarkunata Israelta kuraj kamachej Salomonqa millay lantikunata yupaychanapaj ruwachisqa, sidoniokunaj lantinku Astoretpaj, moabitakunaj lantinku Quemospaj, chantá amonitakunaj lantinku Milconpajwan ima.

¹⁴ Aseraj lantinkunatapis phirerqa, jinaspataj, chay lantikuna maypichus karqanku, chayman runa tulluta junt'aykucherqa.

¹⁵ Jinallataj Josiasqa Betelpi kasharqa, chay altartapis phirispa ruphaykuchillarqataj, chantá Aseraj lantintapis ruphaykuchillarqataj. Chay altarkunata Nabatpa churin Jeroboán ruwaspa, israelitakunata juchallichisqa.

¹⁶ Josías Betelmanta kutimushaspa, orqo patapi covachakunata rikorqa. Chantá chayman runata kachaspa, runa tulluta orqhochimorqa. Altarkuna millachikunapaj qhawasqa kananpaj chay patapi runa tulluta ruphaykucherqa. Ajinata Diospa sut'inchajninpa parlasqan junt'akorqa.

¹⁷ Chantá Josías taporqa: Rikushani chay, pejpa covachantajri? nispa. Llajtayojkunataj kuticherqanku: Kay covachaqa Diospata sut'inchajnin pichus Judamanta jamusqa, chaypata. Betelpi altar patapi imatachus ruwasqaykita, pay nerqaña, nispa.

¹⁸ Chantá Josías kamacherqa: Saqellaychej, ama Diospata sut'inchajninpa tullunta t'ojpiychejchu, nispa. Ajinapi, Judamanta jamoj Diospata sut'inchajninpa tullunta, jinataj Samariamanta jamojpa tulluntapis mana orqhorqankuchu.

¹⁹ Jinallataj kuraj kamachej Josiasqa Samariapi, tukuy orqo patapi kaj altarkunata thuñillarqataj. Imaynatachus Betelpi altarkunata thuñerqa, ajinallatataj thuñiykorqa. Israel suyuta kuraj kamachejkunaqa waj dioskunata yupaychanankupaj chay altarkunata ruwaspa, Tata Diosta phiñachisqanku.

²⁰ Chantá Josías orqo patapi altarkunamanta sacerdotekunata chay altarllapitaj wañuchicherqa. Chay altarkuna patallapitaj runa tullutapis ruphaykucherqa. Chaymantataj Jerusalenman kutiporqa.

Josías Pascua raymita ruwan

²¹ Chantá kuraj kamachej Josías tukuy israelitakunata kamacherqa: Tata Diosniykichejpa sutinpi Pascua raymita ruwaychej, kay trato ruwasqa qhelqapi nisqanman jina, nispa.

²² Israel suyuta juezkuna kamachisqanku chaymantapacha mana ujtapis kay jina Pascuata ruwasqankuchu, ni Israel suyuta kuraj kamachejkuna kamachishajtinku, nitaj Judá suyuta kuraj kamachejkuna kamachishajtinkupis.

²³ Kuraj kamachej Josías chunka pusajniyoj watataña kamachishajtin, Tata Diospa sutinpi Pascua raymita Jerusalenpi ruwarqanku.

²⁴ Jinallataj Josiasqa layqakunata, aysirikunata wijch'ullarqataj. Chantá Judá suyupi, Jerusalenpiwan ima wasi lantikunata, tukuy imaymana millay yupaychana imakunatawan chinkacherqa. Ajinata ruwarqa sacerdote Hilcías Tata Diospa Templonpi tarisqan qhelqapi nisqanta junt'ananpaj.

²⁵ Kuraj kamachejkunamanta Tata Diosman tukuy sonqowan, tukuy almawan, tukuy kallpanwan ima kutirikojqa mana ujpis pay jina karqachu. Josiasqa Moisespa tukuy kamachisqanta junt'arqa.

²⁶ Chay tukuywanpis, Tata Diosqa Judá suyupaj phiñasqallapuni kasharqa, kuraj kamachej Manasés millayta ruwaspa payta phiñachisqanrayku.

²⁷ Chayrayku Tata Dios nerqa: Judá suyumanta kajkunata ñawpaqeymanta wijch'usajpuni, imaynatachus israelitakunata wijch'orqani, ajinata. Ajllakusqay Jerusalén llajtatapis qhesachasaj, jinallataj Temploytapis qhesachallasajtaj. Noqa chay Templomanta nerqani: Kay wasipi sutiy yupaychasqa kanqa, nispa.

Josías wañupun

²⁸ Josías kamachishaspa imatachus ruwasqan, waj imakunata ruwasqanwan ima Judá suyuta kuraj kamachejkunaj ruwasqankumanta willaj qhelqapi qhelqasqa kashan.

²⁹ Josías kamachishajtin chaypachataj, Egipto suyuta kuraj kamachej faraón Necao Éufrates mayu qayllaman llojsimorqa Asiria suyuta kuraj kamachejta yanapananpaj. Kuraj kamachej Josiastajrí paywan maqanakoj Meguidoman rerqa. Necaotaj Josiaswan tinkuytawankama, wañucherqa.

³⁰ Josiaspa soldadonkunata kamachejkunataj jina wañusqata carretapi Meguidomantapacha Jerusalenman aparqanku, chaypitaj kuraj kamachejkunaj covachankupi ayanta p'ampaykorqanku. Judá suyumanta kajkunataj Josiaspa churin Joacazta aceitewan jawispa tatanpa cuentanmanta kamachinanpaj tiyaykucherqanku.

Joacaz Judá suyuta kamachin

³¹ Joacaz kamachiyta qallarishaspa, iskay chunka kinsayoj watayoj karqa, Jerusalenmantapachataj kinsa killallata kamacherqa. Mamanpa sutenqa Jamutal karqa, paytaj Libnamanta Jeremiaspata ususin karqa.

³² Joacazrí ñawpa tatankuna jina mana Tata Diospa munasqanman jinachu ruwarqa.

³³ Chantá faraón Necao Jamat jap'iypi, Ribla llajtapi Joacazta presocharqa, amaña Jerusalenpi kamachinanpaj. Faraón Necao kamachillarqataj Judá suyumanta kajkuna impuestota payman paganankuta, 3.300 kilo qolqe metalta, kinsa chunka kinsayoj kilo qorita ima.

³⁴ Chay jawa faraón Necaoqa Josiaspa churin Eliaquinta Joacazpa cuentanmanta kamachinanpaj churarqa. Chantá payta Joacín sutiwan suticharqa. Joacaztatajrí Egiptoman aparqa, jaqaypitaj Joacaz wañorqa.

³⁵ Joacinqa faraón nisqanman jina qolqeta, qoritawan pagarqa. Pagananpajtaj jallp'ata tasacherqa, chayman jina qolqe metalta, qoritawan orqhonanpaj sapa ujmanta jallp'anman jina, faraón Necaoman qonanpaj.

Joacín Judá suyuta kamachin

³⁶ Joacín kamachiyta qallarishaspa iskay chunka phishqayoj watayoj karqa. Jerusalenmantapachataj chunka ujniyoj watata kamacherqa. Mamanqa Rumamanta Pedaiaspa ususin Zebuda sutiyoj karqa.

³⁷ Joacinrí manapuni Tata Diosta kasuspachu purerqa, manachayqa ñawpa tatankuna jinallataj ruwarqa.