2 Reyes 22 - DIOSPA QHELQACHISQ

Josías Judá suyuta kamachin

¹ Josías kamachiyta qallarishaspa, pusaj watayojllaraj karqa. Jerusalenmantapachataj kinsa chunka ujniyoj watata kamacherqa. Mamantaj Yedidá sutiyoj karqa. Payqa Boscat llajtamanta Adaiaspa ususin karqa.

² Josiasqa Tata Diospa munasqanman jina cheqanta ruwarqa, imajtinchus tukuy imata ñawpa tatan David jina ruwaspa purerqa.

Diospa kamachisqanmanta qhelqasqata tarinku

³ Josías chunka pusajniyoj watataña kamachishaspa, Mesulanpa allchhin, Azalíaj churin Safanta Tata Diospa Templonman kacharqa. Payqa kamachejpata qhelqerin karqa. Chantá nerqa:

⁴ Kuraj kaj sacerdote Hilciasman rispa, ninki: Runakuna mashkha qolqetachus Tata Diospa Templonman apamuspa, punkuta qhawajkunaman qosqanku, chay tukuyta tantay.

⁵ Chantá Tata Diospa Templonta allinchachejkunaman chay qolqeta jayway, Templota allinchajkunaman paganankupaj.

⁶ Jinallataj k'aspi llajllajkunaman, albañilkunaman, waj imakunata ruwajkunaman ima pagachunku. Chantá Tata Diospa Templonta allinchanankupaj kurkuta, ch'eqosqa rumitawan chay qolqewan rantichunku, nispa.

⁷ Hilciasman nillankitaj: Chay qolqemanta ama cuentata mañankichu, imaraykuchus paykunaqa mana suwakuyta yachankuchu, nispa.

⁸ Chantá kuraj kaj sacerdote Hilcías qhelqeri Safanta nerqa: Tata Diospa Templonpi Diospa kamachisqanmanta qhelqata tarini, nispa. Chantá Hilciasqa chay qhelqata Safanman jaywarqa, paytaj ñawirerqa.

⁹ Chaymantataj qhelqeri Safán rispa, tukuy ima ruwasqanmanta kuraj kamachejman willarqa: Kamachiykikunaqa Tata Diospa Templonpi tukuynin qolqe tantasqankuta Templota allinchajkunaman qonkuña, nispa.

¹⁰ Chantá qhelqeri Safán nillarqataj: Kuraj kaj sacerdote Hilcías kay qhelqata jaywawarqa, nispa. Chantá Safanqa kuraj kamachej uyarinanta ñawirerqa.

¹¹ Kuraj kamachej Josiasqa chay tarisqanku qhelqasqa imatachus nisqanta uyarispa, p'achanta llik'irakorqa.

¹² Jinaytawantaj, pay sacerdote Hilciasta, Safanpata churin Ajicanta, Micaiaspa churin Acborta, qhelqeri Safanta, chantá kamachin Asaiastawan ima kay jinata kamacherqa:

¹³ Rispa, noqarayku, runakunarayku, chantá tukuynin Judá suyurayku ima kay tarisqa qhelqapi imatachus nisqanmanta Tata Diosta tapuriychej, imaraykuchus Tata Diosqa contranchejpi sinch'i phiñasqa kashan. Ñawpa tatanchejkunaqa manamin kay qhelqapi imatachus nisqanta kasorqankuchu, noqanchejpis manallataj chayman jina ruwashanchejchu, nispa.

¹⁴ Chantá sacerdote Hilcías Ajicanwan, Acborwan, Safanwan, Asaiaswan ima Diospa sut'inchajnin Julda sutiyoj warmita watukoj rerqanku. Payqa Salunpata warmin karqa, Saluntaj Ticvaj churin karqa, Jarjaspa allchhintaj. Jarjasqa Diospa Templonpi sacerdotekuna churakunanku p'achata jallch'ananpaj churasqa karqa. Juldaqa Jerusalenpi mosoj wasikuna tiyan, chaynejpi tiyakorqa. Chantá paywan parlarqanku.

¹⁵ Juldataj paykunata nerqa: Israelitakunaj Tata Diosnin ajinata nin: Rispa, kachamusorqachej chay runaman kay jinata willamuychej.

¹⁶ Ajinata Tata Dios nin: Judá suyuta kuraj kamachej chay qhelqapi ñak'ariykunamanta imatachus ñawirisqaykita kay llajtaman, jinataj kaypi tiyakojkunaman apachimusaj.

¹⁷ Paykunaqa noqata qhesachawaspa waj dioskunaman inciensota q'oshñicherqanku. Tukuy imaymanata ruwaspataj noqata phiñachiwarqanku. Phiñakuyneyqa kaypi tiyakojkunaj contranpi k'ajarenqa, manataj thasnusqachu kanqa.

¹⁸ Chaywanpis pichus Tata Diosta tapojta kachamusoj Judá suyuta kuraj kamachejman kay jinata ninkichej: Israelitakunaj Tata Diosnin ajinata nisunki: Qhelqapi imatachus nisqayta tukuy sonqo uyarerqanki.

¹⁹ Chantá kay llajta jinataj chaypi tiyakojkuna maldicisqa kanankuta, chantá ch'inman tukuchisqa kanankuta nisqayrayku, sonqoykita wawayachispa ñawpaqeypi k'umuykorqanki, jinallataj p'achaykita llik'irakuspa waqarqanki. Chayta noqa uyariyki, nispa Tata Diosqa nisunki.

²⁰ Chayrayku Tata Dios nillantaj: Kawsanaykikama kay llajtata sinch'i llakiywan ñak'arichisqayta mana rikunkichu, nispa. Paykunataj kutispa, kuraj kamachejman kikinta willamorqanku.