2 Pedro 3 - DIOSPA QHELQACHISQ

Jesucristoj kutimunan p'unchay qayllamushanña

¹ Munasqa wawqe panaykuna, kaywanqa iskay cartataña qankunaman apachimuykichej. Iskaynin cartapi yuyarichiyta munarqaykichej, llimphu sonqowan yuyayta yachanaykichejta.

² Noqa munani Diospa ajllasqan ñawpa sut'inchajkunaj nisqankumanta yuyarikunaykichejta, jinallataj Qhespichej Tukuyta Kamachej Jesuspa kamachisqanmanta ima, mayqenkunatachus Jesuspa kuraj kachankuna kamachisorqachej, chaymanta.

³ Ñawpajta kayta yachaychej: Qhepanejman cheqa kajmanta alqorakojkuna rikhurimonqanku, paykunataj sonqonkoj millay ruwayta munasqanman jina purenqanku.

⁴ Paykuna nenqanku: Cristo kutimunanta nerqa. Maytaj kutimusqanri? Ñawpa tataykupis wañupunkuña, kunankamataj tukuy ima, qallariypi jina imaynachus karqa, jinallapuni kakushan, nispa.

⁵ Chaywanpis paykuna yachashaspa, mana yachajman tukunku. Paykuna qonqapunku qallariypi janajpis, kay pachapis Diospa nisqannejta ruwasqa kasqanta, maypachachus Dios kay pachata yaku ukhumanta rikhuricherqa, yakuwantaj muyuykucherqa, chaypacha.

⁶ Chay yakullawantaj chaypacha tiyakojkuna yakoj p'ampasqan chinkachisqa karqanku.

⁷ Kunan kashaj janajpis, kay pachapisrí Diospa nisqannejta ninapi q'olachisqa kanankupaj waqaychasqa kashanku Diospa juzganan p'unchaykama. Chaypachallataj Diosqa paywan churanakojkunata juzgaspa, chinkarparichenqa.

⁸ Munasqa wawqe panaykuna, kayta ama qonqaychejchu: Tukuyta Kamachej Jesucristopaj uj p'unchayqa waranqa wata jina, waranqa watataj uj p'unchay jinalla.

⁹ Chantá Tukuyta Kamachej Jesucristoqa kutimusaj nisqanta mana qonqanchu, imaynatachus wakin qonqapusqanta yuyanku, ajinata. Manachayqa Dios tukuy qankunawan pacienciakun, manataj munanchu pipis chinkananta. Aswanpis Dios munan tukuy runakuna payman kutirikunankuta.

¹⁰ Tukuyta Kamachej Jesucristoj kutimunan chay p'unchayqa suwa jina chayamonqa. Chaypachataj, janajpis manchayta t'ojyaspa chinkarenqa, tukuy kaj chhikataj ninawan q'olaykusqa kanqa. Jinallataj kay pachapis, tukuy imantin kantumanta tukuchisqa kanqa.

¹¹ Ajinata tukuy ima ninawan tukuchisqa kananta yachaspa, qankuna astawanraj juchamanta t'aqasqa, chantá Diosta kasuspa kawsanaykichej tiyan.

¹² Ajinata Diospa juzganan p'unchayta suyaspa, chay p'unchayta aswan usqhayta chayachimunkichej. Chay p'unchaypi janajqa nina lawraypi tukukonqa, jinataj tukuy ima chay jina sinch'i k'ajaypi unuyaponqa.

¹³ Noqanchejrí Diospa nisqanman jina mosoj janajta, mosoj jallp'atawan suyashanchej, maypichus Dios justiciata ruwaspapuni kamachenqa, chayta.

¹⁴ Chayrayku munasqa wawqe panaykuna, chay imakunata suyaspaqa, atisqaykichejta kallpakuychej Dios taripasunaykichejta mana juchayojta, mana k'aminata, paywan allinpi purishajta ima.

¹⁵ Chantá yuyarikuychej, Tukuyta Kamachej Jesucristonchejpa paciencianqa tukuy runakuna qhespichisqa kananchejpaj kasqanta. Chayllatataj nispa, munasqa wawqenchej Pablopis cartata apachimusorqachej, Dios payman yachayta qosqanman jina.

¹⁶ Sapa carta apachimusqanpi Pablo chay imakunamanta parlan. Chay parlasqanmanta wakinkunaqa mana entiendey atina jinallachu kanku. Chayrayku chaymanta pisita yachajkuna, chantá Diospi atinikuypi pisi kallpayojkuna q'ewinku. Jinallatataj Diospa Qhelqachisqanpi waj imakunatapis q'ewinku, chaymantataj paykuna chinkachisqa kanankupaj.

¹⁷ Chayrayku munasqa wawqe panaykuna, chaykunata ñawpajmanta yachaspaña, allinta qhawakuychej. Pajtataj millayta ruwaspa purejkunaj pantayninkuwan aysachikushawajchej, sinch'i sayasqa kasqaykichejmanta urmanaykichejpaj.

¹⁸ Manachayqa astawan astawan Tukuyta Kamachej Jesucristota rejsinaykichejpaj kallpakuychej, jinallataj Diospa qhasilla k'acha yanapayninpi astawan atinikuychej. Jesucristo may jatunchasqa kachun kunanpis, wiñaypajpis. Ajina kachun.