2 Pedro 1 - DIOSPA QHELQACHISQ

Pedro napaykun

¹ Noqa Simón Pedroqa, Jesucristoj wata runan kani, chantá kuraj kachan ima. Kay cartata qankunaman apachimuykichej, pikunachus noqayku jina Jesucristopi atinikorqankichej, chaykunaman. Jesucristopi atinikusqaykichejqa may jina sumajmin. Paypitaj atinikorqankichej Qhespichej Jesucristo Diosninchej cheqan kasqanrayku.

² Kunantaj napaykuykichej: Diosqa qhasilla k'acha yanapayninta, chantá sonqo tiyaykusqa kayta ima astawan astawan qankunaman qosuchun, Tata Diosta, Tukuyta Kamachej Jesucristota ima rejsisqaykichejnejta.

Diosqa k'achata kawsananchejta munan

³ Diosqa may sumaj atiyninnejta tukuy ima necesitasqanchejta qowarqanchej, cheqanta ruwaspa kawsananchejpaj. Chaytataj jap'inchej Diosta rejsisqanchejrayku, pichus mana ni imapi pantaj kayninnejta, tukuy atiyniyoj kayninnejta ima wajyawarqanchej, chay Diosrayku.

⁴ Chaykunanejtataj Diosqa nisqanman jina may sumaj, chantá may jina valorniyoj imakunata qowarqanchej munasqanman jina puriyta yanapanawanchejpaj. Ajinamanta qankuna, imaynachus Dios kasqan, ajinallataj kankichej. Chantá kay pachapi millay ruwaykunamanta ayqeyta atillankichejtaj, mayqenkunachus runa millay ruwayta munasqanmanta jamun, chaymanta.

⁵ Chayrayku qankunaqa atisqaykichejta ruwaychej Diospi atinikusqaykichejman yapanaykichejpaj allin kawsayta, allin kawsaymantaj Diosmanta astawan yachayta.

⁶ Chay yachaymantaj yapaychej sonqoykichejpa munasqanwan mana atipachikuyta, chaymantaj yapaychej ñak'ariypi pacienciakuyta. Chaymantaj yapaychej Diosman k'askasqa kawsakuyta.

⁷ Chaymantaj yapaychej Diosta qhatejkunapura allinta kawsakuyta, chaymantaj tukuyta munakuspa kawsayta yapaychej.

⁸ Sichus qankunajta kay imakuna may chhika tiyapusunkichej, chantá ruwashankichej chayqa, mana jinalla kakunkichejchu, Tukuyta Kamachej Jesucristota rejsisqaykichejpis manallataj qhasichu kanqa.

⁹ Sichus pipis kaykunata mana ruwashanchu chayrí, chay runaqa pisi ñawiyoj jina mana rikuyta atinchu, jinataj ñawpa juchallisqanmanta llimphuchasqa kasqanta qonqapun.

¹⁰ Chayrayku wawqe panakuna, sonqota churaychej cheqapuni Diospa wajyasqan, chantá ajllasqan kasqaykichejta rikuchinaykichejpaj. Ajinata ruwankichej chayqa, mana Jesucristomanta karunchakapunkichejchu.

¹¹ Chantá Tukuyta Kamachej Jesucristo Qhespichejninchejpa wiñay kamachiyninman qankuna yaykushajtiykichej, Diosqa may jina kusiywan jap'isonqachej.

¹² Qankuna chayta allinta yachankichej, chantá cheqa kajmanta yachasqaykichejpi sinch'ita sayashankichej. Chaywanpis noqa mana sayk'uspa chaykunamanta yuyarichillasqaykichejpuni.

¹³ Kay pachapi kawsanaykama noqaj ruwanayqa kay tukuymanta qankunata yuyarichinay kashan.

¹⁴ Chayta niykichej, imaraykuchus Tukuyta Kamachej Jesucristo sut'inchawanña kay pachamanta mana unaymanchu ripunayta.

¹⁵ Chayrayku noqa atisqayta ruwallasajpuni, wañupusqaymanta qhepaman qankuna imatachus yuyaychasqaymanta sapa kuti yuyarikunaykichejpaj.

Cristoj jatun kayninpa lliphipiyninta rikojkuna

¹⁶ Tukuyta Kamachej Jesucristoj atiyninmanta, chantá kutimunanmanta ima qankunaman willasqaykoqa mana runaj sumaj wakichisqan cuentoman jinallachu karqa. Manachayqa paypa jatun kayninpa lliphipiyninta noqayku kikin ñawiykuwan rikorqayku.

¹⁷ Tata Diosqa Jesucristota jatuncharqa, may patamantaj oqharerqa, maypachachus Tukuy Atiyniyoj Jatunchasqa Kamachej nimorqa: Kaymin munasqa Chureyqa. Paywan sonqo junt'asqa kani, nispa, chaypacha.

¹⁸ Noqaykupis janaj pachamanta parlamojta uyarerqayku, maypachachus Diospa ajllakusqan orqopi Jesuswan khuska kasharqayku, chaypacha.

¹⁹ Chayta uyarispa, noqayku repararqayku Diosmanta sut'inchajkunaj willasqanku jinapuni kasqanta. Qankunataj chay nisqankuta kasuta ruwaspa, allinta ruwankichej. Chay nisqankoqa laqhapi lámpara jina k'ancharin. Jinallataj k'anchanqapuni, sut'iyay ch'aska llojsimuspa, sonqoykichejpi k'anchanankama.

²⁰ Chaywanpis tukuy imamanta astawanqa kayta yachaychej: Diospa Qhelqachisqanpi Diosmanta sut'inchajkunaj sut'inchasqankoqa mana paykunaj yuyasqankuman jinachu karqa,

²¹ imaraykuchus Diosmanta sut'inchajkuna mana jayk'ajpis runaj munasqanman jinachu sut'incharqanku. Manachayqa Santo Espiritumin Diosmanta sut'inchajkunata yuyaycharqa, paykunataj Diospa sutinpi parlarqanku.