2 Juan 1 - DIOSPA QHELQACHISQ

Cheqa munakuy

¹ Noqa iglesiapi kuraj kaj jina kay cartata ajllasqa mamaman, chantá wawankunaman ima qhelqaspa apachini, pikunatachus cheqatapuni munakuni, chaykunaman. Mana noqallachu paykunata munakuni, manachayqa cheqa kajta tukuy jap'ikojkunapis munakullankutaj.

² Qankunata munakuykichej, chay cheqa kaj willayrayku, mayqenchus sonqonchejpi kashan, wiñaypajtaj noqanchejwan kanqa, chayrayku.

³ Tata Diosmanta, paypa Churin Jesucristomantawan qhasilla k'acha yanapaynin, khuyakuynin, chantá sonqo tiyaykuynin ima qankunawan kachun. Ajina kachun, pikunachus cheqa kajman jina munakuspataj kawsakushankichej, chaykunawan.

⁴ Noqaqa maytapuni kusikorqani, wakin wawaykikuna cheqa kajman jina kawsashasqankuta yachaspa. Paykunaqa Tata Dios kamachiwasqanchejman jina kawsashanku.

⁵ Kunanqa wawqe panakuna, tukuy sonqo mañarikuykichej ujkuna ujkuna munakuspa kawsakunata. Chayta nispa, mana mosoj kamachisqatachu qhelqamushani, manachayqa qallariymantapacha kamachisqaña karqa, chayta.

⁶ Pichus cheqatapuni Diosta munakojqa Diospa kamachisqanta kasuspa kawsan. Tata Diostaj ujkuna ujkuna munakuspa kawsananchejta kamachiwarqanchej, imaynatachus qankuna qallariymantapacha uyarerqankichej, chaymanta.

Mana cheqanta yachachejkunamanta allinta qhawakuna

⁷ Ashkha q'otiyajkuna tukuynejpi purishanku, paykunataj ninku Jesucristo mana runaman tukuspachu kay pachaman jamusqanta. Pichus ajinata nejqa llullamin, Cristoj contranpi sayarejtaj.

⁸ Qankunarí allinta qhawakuychej, Diospaj ruwasqaykichej ama qhasi kananpaj, aswanpis junt'asqa t'inkaykichejta jap'inaykichejpaj.

⁹ Pichus pantaykuspa, mana Cristoj yachachisqanpi sayanchu chayqa, Dios mana paywanchu kashan. Pichus Cristoj yachachisqanpi sayajrí Tata Dioswan, chantá Churinwan ima ujchasqa kashan.

¹⁰ Sichus pipis qankunaman jamuspa, mana kay jinatachu yachachinman chayqa, ama chay runata wasiykichejpi jap'ikuychejchu, nitaj napaykullaychejpischu.

¹¹ Pichus chay runata: Walejta jamunki, nispa nejrí, mana allin kajta ruwasqanpi ruwaysikoj kashan.

Waj kutikama nispa cartata tukuychan

¹² Qankunaman imatachus ninayqa ashkharaj tiyan. Chaywanpis chaymanta cartallapi qhelqamuyta mana munanichu. Aswanpis noqa kikiy qankunata waturikuyta munani uyapura parlarikunanchejpaj. Chaypacha mayta kusikuspa, sonqo junt'asqa kasunchej.

¹³ Diospa ajllasqan ñañaykej wawankunapis napaykamusunku. Ajina kachun.