2 Crónicas 4 - DIOSPA QHELQACHISQ

Temploj tukuy imankuna

¹ Jiranqa broncemanta uj altarta ruwachillarqataj, chaytaj sayt'unman jisq'on metroyoj karqa, anchonmantaj jisq'onllataj, sayayninmanrí tawa metro khuskanniyoj karqa.

² Chantá ruwachillarqataj broncemanta jatun ch'illamita. Chayqa muyu karqa. Uj kantunmanta ujnin kantunkamaqa tawa metro khuskanniyoj karqa, ukhunmantaj iskay metro khuskanniyoj karqa. Tukuynin muyuynintaj chunka kinsayoj metro khuskanniyoj karqa.

³ Chay jatun ch'illamej simin uranejpi, muyuynintinpi iskay sinrupi torokunaman rijch'asqa warawakuna karqa. Sapa khuskan metropi chunkakama karqanku, chaykunataj jatun ch'illamiwan ujlla karqanku.

⁴ Chay jatun ch'illameqa chunka iskayniyoj broncemanta ruwasqa torokuna patapi churasqa kasharqa. Chay chunka iskayniyoj torokunamantaqa qhawasharqanku kinsa wichaynejman, kinsataj uranejman, kinsataj inti llojsimuynejman, kinsataj inti yaykuynejman. Qhepa chakinkoqa ukhunejman karqa, chay ch'illamitaj torokunaj patanpi churasqa karqa.

⁵ Chay ch'illameqa phatunman uj t'ajllayoj karqa. Patanqa lirio t'ikaj laphin jina q'empisqa karqanku. Chay ch'illamitaj 66.000 litro yaku yaykunanpaj jina ruwasqa karqa.

⁶ Jirán ruwachillarqataj mayllanapaj chunka juch'uy ch'illamikunata, phishqata pañanejman churarqa, phishqatataj lloq'eman. Chaykunapi q'olachinapaj uywa ñak'asqata mayllaj kanku. Chay jatun ch'illamipitajrí sacerdotekuna mayllakoj kanku.

⁷ Tata Diospa kamachisqanman jina Jirán ruwachillarqataj qorimanta chunka k'ancha churanata, Templomantaj churarqa phishqata pañanman, phishqatataj lloq'enman.

⁸ Chay jawaqa chunka mesata ruwachillarqataj, chaykunatataj Diospa Templonman churarqa phishqata pañanman, phishqatataj lloq'enman. Chantá qorimanta pachaj jatuchaj vasokunata ruwachillarqataj.

⁹ Jinallataj sacerdotekunapaj patiota ruwacherqa, jatun patiotapis, punkunkunatawan, chaykunatataj tukuyninta broncewan lluch'iykucherqa.

¹⁰ Chay jatun ch'illamita Temploj pañannejman, inti llojsimuynejman churarqa.

¹¹ Jiranqa ruwallarqataj mankakunata, lampakunata, jatuchaj vasokunata ima. Jinamanta Diospa Templonpaj Salomonpa kamachisqanman jina, ruwayta tukorqa.

¹² Payqa kay tukuyta ruwarqa: Iskaynin sayantata, patanpi kasharqanku chay muyu pillu kirpanatawan, chantá chay kirpanaman muyuykuchisqa cadenakunatawan.

¹³ Chay iskaynin cadenakunapaj 400 granadaman rijch'akojta ruwarqa. Sapa cadenapaj iskay sinruta churarqa, chaykunawantaj sayantakunaj kirpananta muyuykucherqa.

¹⁴ Chunka chukutapis ruwallarqataj, chaykunaj patanmantaj juch'uy ch'illamikunata churarqa.

¹⁵ Ruwallarqataj jatun ch'illamita, uranpi kasharqanku, chay chunka iskayniyoj torokunatawan.

¹⁶ Chantá ruwallarqataj mankakunata, lampakunata, trinchekunatawan ima. Chay yachaj Jiranqa Salomonpa nisqanman jina chay tukuy imata sumaj broncemanta ruwarqa Tata Diospa Templonpaj.

¹⁷ Chaykunata kuraj kamachejqa bronceta unuyachispa, llink'i t'urumanta ruwasqa moldepi jich'acherqa. Chayta ruwarqanku Jordán mayu pampanejpi, Sucot llajtamanta Seredata llajtaman rinapi.

¹⁸ Salomonqa chay tukuy imata broncemanta ruwachisqanman mashkhachus bronce yaykusqanta mana tupuchiyta aterqankuchu.

¹⁹ Salomonqa Diospa Templonpaj kay imakunata ruwachillarqataj: Qorimanta altarta, mesakunatapis chay patapi Tata Diospaj t'aqasqa t'antata churanankupaj,

²⁰ jinallataj sumaj qorimanta k'ancha churanata, lamparantinta. Chaykunataj Diosllapaj T'aqasqa nisqa cheqaj ñawpaqenpi churasqa karqanku, kamachisqa kasqanman jina k'anchachinankupaj.

²¹ Jinallataj t'ikakunata, lamparakunata, tenazakunatapis sumaj qorillamantapuni ruwacherqa.

²² Pábilo k'utunata, jatuchaj vasokunata, mama wisllakunata, incienso q'oshñichinapis sumaj qorillamantataj karqanku. Chantá qorillamantataj karqanku Temploman yaykuna punku, Diosllapaj T'aqasqa nisqa cheqaman yaykuna punku, jinataj Temploman yaykuna punkupis.