2 Corintios 9 - DIOSPA QHELQACHISQ

Jerusalenpi pisichikoj wawqe panakunata yanapanapaj qolqe

¹ Jerusalenpi wawqe panakunata yanapanapaj qolqe tantanamanta qhelqamunayqa anchaña kanman.

² Yachaniña yanapanapaj k'acha sonqoyoj kasqaykichejta. Chayrayku qankunata jatunchaspa, noqa Macedonia jap'iymanta kajkunata nerqani: Ajaya nisqa jap'iymanta kajkuna qayna watamantapachaña yanapanapaj qolqeta qonankupaj wakichisqa kashanku, nispa. Chayrayku Macedoniapi ashkha wawqe panakunapis yanapasqaykichejmanta yachaspa, yanapanankupaj kallpachakullarqankutaj.

³ Chaywanpis Titota, chay wawqekunata ima qankunaman kachamushani, yanapanapaj qolqewan wakichisqapuni kanaykichejpaj. Ajinamanta qankunata jatunchaspa parlasqayqa mana qhasillachu kanqa.

⁴ Sichus Macedoniamanta wakin wawqekuna noqawan jamuspa, qolqeta mana wakichisqata taripasunkichejman chayqa, noqayku p'enqaypi rikhuriykuman. Qankunapis p'enqaypi rikhurillawajchejtaj, qankunamanta allinta parlasqaykurayku.

⁵ Chayrayku kay wawqekunata ñawpajta qankunaman kachamuyta yuyashani, paykuna qolqe tantayta tukuychayta yanapasunaykichejpaj, ñawpajpi nisqaykichejman jina. Ajinamanta qankuna chay qolqeta tukuy sonqo tantankichej, manataj noqayku kamachisqaykuraykullachu.

⁶ Kaymanta yuyarikuychejpuni: Pichus pisita tarpojqa pisillatataj oqharenqa. Ashkhata tarpojrí ashkhallatataj oqharenqa.

⁷ Sapa uj qolqeta churachun sonqonpi yuyaychakusqanman jina, mana llakikuspa, nitaj mat'isqa jinachu, imaraykuchus Dios munakun pichus kusiywan qojta.

⁸ Diostaj atiyniyojmin, qhasilla k'acha yanapayninnejta qankunaman ashkhamanta qosunaykichejpaj. Ajinamanta mana jayk'ajpis ni imamanta pisichikunkichejchu. Aswanpis tiyapuyniykichej kallanqapuni wajkunata yanapayta atinaykichejpaj.

⁹ Diospa Qhelqachisqanpi nin: Payqa pisichikojkunaman mana mich'akuspa tiyapuyninmanta jaywan. K'acha kaspa ruwasqantaj wiñaypaj yuyarisqa kanqa, nispa.

¹⁰ Diosqa pichus tarpojman mujuta qon, pichus mikhojmanpis t'antata qon. Payllataj qankunamanpis tukuy imata qosonqachej, chaytataj mirachenqa, ajinamanta k'acha sonqoyoj kasqaykichejrayku wajkunata ashkhamanta yanapanaykichejpaj.

¹¹ Ajinamanta tukuy imapi qhapajyachisqa kankichej, mana mich'akuspa wajkunata yanapayta atinaykichejpaj. Noqayku chay qolqeta paykunaman apajtiykutaj, paykuna chay qolqemanta tukuy sonqo Diosman pachis nenqanku.

¹² Chay yanapata wawqe panakunaman qosqaykichejrayku, iskay imakuna kanqa: Imamantachus paykuna pisichikunku, qankuna chayta churapunkichej. Paykunataj chay yanapasqaykichejmanta may kusiywan Diosman pachis nenqanku.

¹³ Paykunataj yanapata rikuspa, Diosta jatunchanqanku. Chay qolqeta paykunapaj, tukuypajpis tukuy sonqo qosqaykichejmanta, paykuna reparanqanku Cristomanta sumaj willayta kasusqaykichejta.

¹⁴ Chantapis paykuna Dioswan parlarikuspa tukuy sonqo mañapusonqachej, Diospa qhasilla k'acha yanapaynin qankunapi kasqanrayku.

¹⁵ Tukuychanapaj Diosta pachis ninachej mana niy atina may sumaj qowasqanchejmanta.