2 Corintios 5 - DIOSPA QHELQACHISQ

¹ Noqanchej yachanchej kay pachapi ukhunchejqa toldo jinalla kasqanta. Chantá wañupojtinchej, chay toldo phaskarasqa kanqa. Chaywanpis, janaj pachapi Diospa ruwasqan uj wasi wiñaypaj tiyapuwanchej. Chaytaj mana runaj ruwasqanchu.

² Chayrayku kay pachapi kaj toldonchejpi kawsashasparaj, mayta ayqonchej, janaj pachapi kaj wasiman ripuytaña munaspa.

³ Chaypachaqa mana almallachu kasunchej, manachayqa almanchejqa ukhuyoj kanqa.

⁴ Kay pachapi toldopi jina kawsashaspaqa, llakikuspa mayta ayqonchej. Chaywanpis mana wañuyta munanchejchu ajinamanta almalla kananchejpaj. Manachayqa mosoj ukhuyoj kayta munanchej, ajinamanta kay wañoj ukhunchejqa wiñay kawsayman yaykunanpaj jina tukuchisqa kananpaj.

⁵ Chay jina kananchejpaj Diosmin wakichiwarqanchej, nisqanta junt'ananpajtaj Santo Espiritutapis señata jina qowarqanchej.

⁶ Ajinaqa noqanchej tukuy sonqo Diospi atinikuspa kawsanchej. Yachanchej ukhunchejpiraj kashaspaqa, manaraj Tukuyta Kamachej Jesucristowan khuskachu kawsashasqanchejta.

⁷ Kunanqa noqanchej Diospi atinikusqanchejrayku purinchej, manataj payta rikusqanchejraykuchu.

⁸ Arí, noqanchej tukuy sonqo Diospi atinikunchej. Chayrayku kay ukhunchejta saqespa, Tukuyta Kamachej Jesucristowan khuska kayta munasunman.

⁹ Chayrayku kay pachapi kawsashaspapis, chayrí manaña kaypi kashaspapis, Jesucristota kusichiyta munanchej.

¹⁰ Chayqa ajina, imaraykuchus tukuyninchej Cristoj ñawpaqenpi juzganawanchejpaj rikhurinanchejpuni tiyan. Ajinamanta sapa uj jap'isunchej, kawsashaspa imachus allin kajta, chayrí mana allin kajtapis ruwasqanchejman jina.

Dioswan allinyakunamanta willana

¹¹ Chayrayku noqayku Tukuyta Kamachej Diosta manchachikuna kasqanta yachaspa, runakunaman tukuy sonqo entiendechiyta munayku Diosman kutirikuna kasqanta. Tata Dios imaynachus kasqaykuta sumajta yachan, jinallataj suyayku qankunapis sonqoykichejpi imaynachus kasqaykuta yachanaykichejta.

¹² Noqaykoqa mana ujtawan allin kasqaykumanta parlayta munashaykuchu. Aswanpis suyashayku qankuna noqaykumanta sonqo junt'asqa kanaykichejta. Ajinamanta kutichiyta atinkichej, pikunachus may kasqankuta yuyajkunaman, manataj sonqonku ukhupi cheqanchu kanku, chaykunaman.

¹³ Sichus mana noqaykupichu kashayku chayqa, Diospa munasqanta ruwayta munasqaykurayku ajina kayku. Sichus yuyayniykupi kashayku chayrí, qankunaj allinniykichejpaj ajina kayku.

¹⁴ Cristoj munakuynin ajinata ruwanaykupaj sinch'ita kallpachawayku, imaraykuchus allinta yachayku Cristo tukuy noqanchejrayku wañusqanta, chayraykutaj noqanchejpis ñawpa kawsayninchejpaj wañusqanchejta.

¹⁵ Jinallataj Cristoqa tukuy runarayku wañorqa, kunan pikunachus kawsashanchej, chaykuna amaña munasqanchejta ruwaspa kawsananchejpaj, manachayqa Jesucristoj munasqallantaña ruwaspa kawsananchejpaj. Paymin noqanchejrayku wañorqa, chantapis kawsarimporqa kawsayta qonawanchejpaj.

¹⁶ Chayrayku kunanmanta ñawpajmanqa manaña pitapis qhawaykuchu Diosman mana kutirikojkunaj yuyasqankuman jina. Arí, ñawpajta Cristotapis Diosman mana kutirikojkuna jina qhawaj kayku. Kunanrí payta manaña jinatachu qhawayku.

¹⁷ Cristoman ujchasqa kajqa mosoj runaman tukuchisqañamin. Ñawpa kawsaynin tukukapun, mosoj kawsaytaj qallarin.

¹⁸ Chay tukuy imaqa Diosmanta jamun, pichus Cristonejta paywan allinyachiwarqayku, chaywan. Chantapis kamachiwarqayku paywan allinyachisqa kanamanta wajkunaman willanaykuta.

¹⁹ Kaytaj niyta munan Diosqa Cristonejta tukuy runata paywan allinyachisqanta, juchankuta qonqayman churaspa. Chantá pay kamachiwarqayku Dioswan allinyakunamanta wajkunaman willanaykuta.

²⁰ Ajina chayqa, Cristoj sutinpi parlanaykupaj kachasqa kayku. Dios kikinpis noqaykunejta parlashanman jina, Cristoj sutinpi mañarikuyku: Dioswan allinyakuychej, nispa.

²¹ Cristoqa mana jayk'ajpis juchallerqachu. Chaywanpis Diosqa noqanchejrayku Cristoman tukuy juchanchejta q'epiricherqa juchanpis kanman jinata, ajinamanta noqanchej Cristoman ujchasqa kaspa, Diospa ñawpaqenpi cheqan runapaj qhawasqa kananchejpaj.