2 Corintios 4 - DIOSPA QHELQACHISQ

¹ Chayrayku noqayku Diospa khuyakuyninnejta paypaj ruwananman churasqa kaspa, mana q'enaqakuykuchu.

² Aswanpis pakaypi p'enqay ruwanata qhesachayku. Noqayku mana pitapis q'otiyaykuchu nitaj Diospa simi nisqanta q'ewiykuchu. Manachayqa cheqa kajta sut'inchaspa, noqayku Diospa ñawpaqenpi allinpaj qhawachikuyta munayku, ama pipis mana allin kajta noqaykumanta sonqonkupi yuyanankupaj.

³ Sichus Jesusmanta willasqayku, chay sumaj willay velowan jina pakasqallaraj kashan chayqa, chinkay ñanpi kajkunallapaj pakasqa kashan.

⁴ Kay pachapi kamachej diosninku Satanasqa Jesuspi mana atinikojkunaj yuyayninkuta laqhayachin, Jesusmanta sumaj willaypa k'anchayninta mana rikunankupaj. Chay sumaj willayqa Cristoj jatun kayninmanta willawanchej. Cristotaj Diospa jatun kayninpa lliphipiyninta rejsichiwanchej.

⁵ Noqaykoqa mana noqayku kikiykumantachu willashayku. Manachayqa Jesucristo Tukuyta Kamachej kasqanta willayku. Jinallataj noqayku qankunaj kamachiykichejkuna jina kayku, Jesusta munakusqaykurayku.

⁶ Chayqa ajina, imaraykuchus Tata Diosqa kay pachata ruwashaspa, nerqa: Laqhayajpi k'anchay k'anchachun, nispa. Jinallataj pay chay k'anchayta sonqonchejpipis k'ancharichillantaj, Diospa jatun kayninpa lliphipiyninta Jesucristoj uyanpi rejsinanchejpaj.

Ñak'ariypi kashaspa Diospi atinikuna

⁷ Kunan chay k'anchay sonqoykupi kashan. Chaywanpis noqaykoqa t'urumanta ruwasqa manka jina p'akikoj kayku, chay manka ukhupirí may valorniyoj imakuna tiyan. Ajinamanta tukuy reparanku, imatapis ruwanaykupaj chay sumaj ateyqa Diosmanta kasqanta, manataj noqaykumantachu.

⁸ Noqayku tukuy imaymana llakiykunawan ñit'isqa kayku chaypis, chay llakiykuna mana atipawaykuchu. Mana imata ruwayta atispapis, ñawpajman rillaykupuni.

⁹ Runakuna qhatiykachawayku chaypis, Dios manapuni saqerpariwaykuchu. Urmachiwayku chaypis, mana phiriwaykuchu.

¹⁰ Maymanpis rishaspa, noqayku yachayku runakuna mayk'ajllapis wañuchiyta atiwasqaykuta, imaynatachus Jesusta wañucherqanku, ajinata. Jinapis ajinamanta yachayta qoshayku Jesús noqaykunejta kawsashasqanmanta.

¹¹ Noqaykoqa kawsashaspapis, Jesusrayku wañuyman jaywasqa kashayku, ajinamanta wañoj ukhuykupi Jesuspa kawsaynin rikukunanpaj.

¹² Chay jinamanta noqayku wañuy patapipuni kashayku, qankunarí chaynejta mosoj kawsayta tarinkichej.

¹³ Diospa Qhelqachisqanpi nin: Diospi atinikorqani, chayrayku parlarqani, nispa. Noqaykupis jinallatataj Diospi atinikuyku, nisqanta jap'ikuspataj, parlayku.

¹⁴ Noqayku yachayku Tata Diosqa Tukuyta Kamachej Jesusta watej kawsarichisqanta. Jinallatataj pay noqaykutapis Jesuswan watej kawsarichiwasqayku, qankunawan khuskatataj ñawpaqenpi rikhurichiwasqayku.

¹⁵ Chayrayku chay tukuy imata ñak'ariyku qankunaj allinniykichejpaj. Ajinaqa Diospa qhasilla k'acha yanapaynin astawan ashkha runaman chayajtin, aswan ashkhallataj Diosman pachis nispa nenqanku, ajinamanta pay may jatunchasqa kananpaj.

¹⁶ Chayrayku noqayku mana llawch'iyaykuchu. Ukhuykoqa astawan machuyapushan chaypis, sonqoykoqa sapa p'unchay astawan kallpachakun.

¹⁷ Kay pachapi ñak'arisqaykoqa mana kasu ruwana jinalla, manataj unaypajchu. Chaywanpis, aswan jaqayman chay ñak'ariynejta noqaykupaj kanqa may sumaj wiñay kusiymin.

¹⁸ Chayrayku noqayku mana kay pachapi rikukoj kajtachu qhawayku, manachayqa mana rikukoj kajta. Ajinata ruwayku, kay pachapi rikukoj kajqa mana unaypajchu kasqanrayku. Mana rikukoj kajtajrí wiñaypajmin.