2 Corintios 13 - DIOSPA QHELQACHISQ

Pablo wawqe panakunata yuyaychan

¹ Kaywanqa kinsa kutitaña qankunata watukoj jamusqaykichej. Chaypachataj Diospa Qhelqachisqanpi nin jina, tukuy ima sut'inchakonqa iskay, chayrí kinsa testigokunaj nisqankuwan.

² Ñawpajta juchallikojkunata noqa nerqani, kunanpis tukuyta nillanitaj chaypipis kashayman jina: Ujtawan jamuspaqa, manaña qankunamanta khuyakusajchu, nispa.

³ Qankuna imatapis rikuyta munankichej Cristo noqanejta parlasqanta yachanaykichejpaj. Kunantaj chayta rikuchisqaykichej. Cristoqa qankunata k'amispa, kasuchikunanpaj jinapuni k'amisunkichej, ajinamanta qankuna ukhupi atiyninta rikuchinanpaj.

⁴ Arí, pisi kallpayoj jina cruzpi chakatasqa karqa, kunantajrí Diospa atiyninrayku kawsashan. Ajinallatataj ari, noqaykupis pisi kallpayoj kayku, imaynachus Cristo karqa, ajina. Chaywanpis paywan ujchasqa kawsashayku Diospa atiyninrayku qankunata yanapanaykupaj.

⁵ Qankuna kikiykichej qhawarikuychej, cheqatapunichus Cristopi atinikorqankichej manachus, chayta yachanaykichejpaj. Manachu reparankichej Jesucristo qankunapi kasqanta? Manachus jina chayqa, ichapis Cristopi mana atinikorqankichejchu.

⁶ Ajinata sonqoykichejta qhawarikuspa, yachallankichejtaj noqaykoqa cheqatapuni Jesuspa kuraj kachankuna kasqaykuta.

⁷ Dioswan parlarikuspa, mañarikuyku qankuna k'amisqaykuta qhesachaspa, mana allin kajta mana ruwanaykichejpaj. Noqayku chayamuspa, kasuchikunaykupaj atiyniyoj kasqaykuta mana rikuchiyta munaykuchu. Manachayqa munayku qankuna allin kajta ruwanaykichejta, noqayku atiyniykuta mana rikuchejtiykupis.

⁸ Noqayku mana imatapis cheqa kajpa contranta ruwayta atiykuchu. Aswanpis cheqa kajman sayakuspa imatapis ruwanayku tiyan.

⁹ Chayrayku noqayku pisi kallpa kasqaykumanta kusikuyku, sichus qankuna chaynejta kallpachasqa kankichej chayqa. Jinallatataj noqayku Dioswan parlarikuspa, mañarikuyku qankuna wiñay tukusqa kanaman chayanaykichejpaj.

¹⁰ Manaraj qankunaman jamushaspa, noqa kay cartata ruwaspa apachimushaykichej, chaypi kashaspa, qankunata ama k'arajta k'amisunaykichejpaj. Tata Dios atiyta qowarqa, mana sonqoykichejta p'akiykunaypajchu, manachayqa Jesucristopi atinikusqaykichejpi kallpachasunaykichejpaj.

¹¹ Munasqa wawqe panakuna, kay jinata nispa tukuychani: Qankuna kusisqa kawsakuychej. Wiñay tukusqa kanaykichejkama wiñallaychejpuni. Ujkuna ujkuna sonqochanakuychej. Uj sonqolla kaychej, qankunapurataj allinta kawsakuychej. Chantá munakuyta, sonqo tiyaykuytawan qoj Dios qankunawan kanqa.

¹² Sapa uj tukuy sonqo napaykunakuychej.

¹³ Kaypi kaj wawqe panakunapis napaykamusunkichej.

¹⁴ Tukuyta Kamachej Jesucristoj qhasilla k'acha yanapaynin, Tata Diospa munakuynin, chantá Santo Espiritumanta jamoj k'acha kawsakuy ima tukuy qankunawan kachun. Ajina kachun.