1 Timoteo 6 - DIOSPA QHELQACHISQ

¹ Jesucristota qhatejkunamanta wata runakuna patronninkuta jatunpaj qhawachunku, wajkuna ama Diospa sutinmanta nitaj yachachisqanchejmantapis mana allinta parlanankupaj.

² Jesucristota qhatej patronniyoj kajkunaqa patronninkuta ama pisipaj qhawachunkuchu Diosta qhatikoj masinku kasqankurayku. Aswanpis aswan allinta paykunata kasuchunku, imaraykuchus pikunaj kamachiyninpichus kashanku, chaykuna munasqa wawqenku kanku. Timoteo, kay imakunata yachachiy, chantá Jesucristota qhatejkuna kasunankuta yuyaychay.

Mana cheqanta yachachejkuna

³ Sichus pillapis waj jinata yachachin, mana Tukuyta Kamachej Jesucristoj cheqa nisqanman jina nitaj cheqan kajman jina chayqa,

⁴ chay runa mana imata yachaspalla runaykachan. Chay jina runaqa wañurin tapunakuymanta, imallamantapis churanakuymantawan. Chaykunarí chhoqonakuyta apamun, t'aqanakuyta, turiyanakuyta, chantá manakajta yuyaytapis.

⁵ Ajina kajkunaqa ch'ajwata sayarichinkupuni. Paykunaj yuyayninku manaña allinñachu kasqanrayku cheqa kajta wasanchanku. Jinallataj yuyanku Diosta kasuspa purinaqa qolqeta jap'inallapaj kasqanta.

⁶ Chaywanpis kayqa jinapuni: Yachanchej Diosta tukuy sonqo kasuspa purinaqa manchay qhapaj kanamin kasqanta, sichus tiyapullawasqanchejwan sonqo junt'asqa kanchej chayqa.

⁷ Noqanchejrí kay pachaman mana imayoj jamorqanchej, jinallataj ni imata kaymanta apayta atisunchejchu.

⁸ Chayrayku mikhunayoj, p'achayoj kaspaqa, chaywan sonqo junt'asqalla kakunanchej.

⁹ Qhapajyayta munajkunarí, tojllapi jina urmanku imaymana pierdechej wampu munapayaykunaman. Chaykunaqa runakunata mana allin kawsayman tanqaykunku, chinkaymantaj.

¹⁰ Qolqeta munakoyqa tukuy imaymana mana allin kajpa saphin. Jinataj qolqeyoj kayta anchata munasqankurayku, wakinkuna Jesucristopi atinikunamanta t'aqakorqanku, chantá tukuy imaymana llakiykunawan ñak'arerqanku.

Pabloqa Timoteota kallpachan

¹¹ Qanrí, Diospa kamachin, chay mana allin kajkunamanta karunchakuy. Aswanpis Diosta kasuspallapuni puriypi kallpakuy, Jesucristoj sumaj yachachisqan kanaykipaj. Jinallataj Diospi atinikuspallapuni kay, chantá Diosta tukuy qhatikojkunata munakuy. Sichus llakiykuna qhatirisunkiman chayqa, pacienciakuy, chantá tukuywan k'acha kay.

¹² Jesucristopi atinikuyrayku soldado jina sumajta maqanakuy. Jinataj wiñay kawsaymanta ch'ipakuy, imaraykuchus chaypajmin Dios wajyasorqa ashkha runaj ñawpaqenpi, Cristopi atinikusqaykimanta rimarishajtiyki.

¹³ Kunanqa kayta kamachiyki, pichus tukuy imaman kawsayta qoj Tata Diospa ñawpaqenpi, jinallataj Jesucristoj ñawpaqenpipis, pichus Poncio Pilatoj ñawpaqenpi Diospi atinikunamanta sut'ita willarqa, chaypa ñawpaqenpi:

¹⁴ Kay kamachisqayta sumajta junt'ay, mana k'amina kanaykipaj Tukuyta Kamachej Jesucristo jamunankama.

¹⁵ Chantá k'ata Diosqa maychus tiemponpi Jesucristota rikhurichimonqa. Paymin yupaychasqa k'ata Kuraj Kamachejqa, tukuy kuraj kamachejkunaj kamachejnin, waj kamachejkunaj Kurajninkutaj.

¹⁶ Pay k'atamin ni jayk'aj wañojqa, payllatajmin mana chimpay atina k'anchaypi tiyakojqa. Payta mana pipis rikorqachu, nitaj pipis rikuyta atinchu. Ajina kasqanrayku pay jatunchasqapuni kachun, may jatun atiynintaj wiñaypa wiñaynintinpaj kachun. Ajina kachun.

¹⁷ Timoteo, kay pachapi qhapajkunata kamachiy ama umata oqharinankuta, amataj tiyapuyninkupi atinikunankuta, imaraykuchus qhapajyayqa tukukapojlla. Manachayqa kawsaj Diospi atinikuchunku, pichus mana mich'akuspa tukuy imata qowanchej chaykunawan kusisqa kawsananchejpaj, chaymanta.

¹⁸ Chantá paykunata kamachillaytaj allin kajta ruwanankuta, allin kajta ruwanapitaj qhapaj kanankuta. Jinallataj jatun sonqoyoj kachunku, tiyapuyninkumanta mana mich'akuspa wajkunata yanaparinankupaj.

¹⁹ Ajinamanta paykuna jamoj p'unchaykunapaj qhapaj kapuyta tantakushanku, ajinapi cheqa kaj kawsaymanta misk'irichikunankupaj.

Pablo ujtawan Timoteota yuyaychan

²⁰ Timoteóy, allinta waqaychay, imatachus Dios qosorqa, chayta. Qhesachay Diosman mana kutirikojkunaj qhasi manakaj thawtisqankuta, churanakuyta ima, mayqenmantachus wakinkuna pantaspa, yuyanku cheqa yachay kasqanta, chaykunata.

²¹ Pikunachus chay jina yachachiykunata qhatejkunarí Jesucristopi atinikunamanta t'aqakorqanku. Diospa qhasilla k'acha yanapaynin tukuy qankunawan kachun.