1 Timoteo 5 - DIOSPA QHELQACHISQ

Iglesiapi kajkunata imaynatachus qhawana

¹ Kuraj runataqa ama k'arajta k'amiykuychu, manachayqa tataykita jina parlapayay. Waynakunawanpis wawqeykikunapis kankuman jina parlay.

² Jatun mamakunatapis mamaykita jina qhaway, sipaskunatapis jatun respetowan panaykikunapis kankuman jina qhaway.

³ Warmisapakunatapis respetowan qhawaspa yanapay, pikunajtachus mana pi yanaparej kanchu, chaykunata.

⁴ Chaywanpis, sichus mayqen warmisapa wawakunayoj, chayrí, allchhikunayoj kanman chayqa, paykuna chay warmisapata yanapaspa, imachus ruwanankuta junt'achunku. Ajinata ruwaspa, tata mamanku paykunata uywasqankumanta allin kajwan kutichiponqanku, imaraykuchus chayqa sumajmin, Diosta kusichintaj.

⁵ Sichus mayqen warmisapa mana piniyoj qhepakun chayqa, Diospi tukuy sonqo atinikun. Chantá tuta p'unchay Dioswan parlarikuspa, yanaparinanta mañakun.

⁶ Chaywanpis sichus uj warmisapa sonqonpa munasqanta ruwaspalla purin chayqa, chay warmisapaqa kawsashaspapis, wañusqa jina kashan.

⁷ Chayrayku, Timoteo, iglesiata kamachiy imatachus nisqayta ruwanankupaj, ajinamanta mana pipis iglesiaj contranta rimayta atinankupaj.

⁸ Sapa wawqe pana ayllunpaj, astawanraj wasi ayllunpaj kawsanapaj imatachus necesitanku, chayta apamunan tiyan. Ajinata mana ruwanchu chayqa, chay runa Diosmanta karunchakapun, paytaj Diosman mana kutirikojmantapis aswan millayrajmin.

⁹ Uj warmisapa iglesiamanta yanapata jap'inanpaj listasqa kananpajqa sojta chunkayoj watayojmanta jaqayman kanan tiyan, jinataj pichus sapan qosayojlla karqa, chay.

¹⁰ Chantá pay allin kajta ruwasqanrayku tukuypaj sumaj respetowan qhawana kachun. Kallachuntaj wawankunata allinta uywaj, wajkunata wasinman wajyarikuyta yachaj, Jesucristota qhatikojkunaj chakinkuta mayllaj, llakiyniyojkunata khuyaspa yanaparej, chantá tukuy allin kajta ruwayta yachaj ima.

¹¹ Sipasllaraj warmisapakunatarí ama listankichu, imaraykuchus paykuna sonqonkoj munasqanwan atipachikuspa, Cristoman imatachus nisqankuta qonqapunkuman. Jinaspataj, ujtawan casarakuyta munankuman.

¹² Ajinata ruwaspa, Cristoman imatachus nisqankuta mana junt'asqankurayku juchachasqa kankuman.

¹³ Chay jawa wasimanta wasi purispa, qhella kayman yachaykukunku. Chantá mana qhellallachu kanku, astawanqa cuentota apanku. Jinallataj wajkunaj kawsayninkuman sat'ikuspa, imamantachus mana parlanankuta parlanku.

¹⁴ Chayrayku sipasllaraj warmisapakunata yuyaychani watej casarakunankuta, wawakunayoj kanankuta, wasinkutapis allinta qhawanankuta ima. Ajinata ruwajtinku, contranchejpi kajkuna mana millayta parlanqankuchu.

¹⁵ Wakin warmisapakunarí qhepaman kutirinkuña, Kuraj Supayta kasunankupaj.

¹⁶ Sichus iglesiamanta mayqen panaj ayllunpi uj warmisapa kanman chayqa, chay panaqa payta yanapanan tiyan, manataj iglesia yanapananta saqenanchu tiyan. Ajinamanta iglesiaqa mana piniyoj warmisapakunallata yanapayta atenqa.

¹⁷ Iglesiata pusarejkuna imachus ruwanankuta sumajta ruwajtinku, paykuna kawsanankupaj iglesia uj jinatawan qonanku tiyan, astawanqa pikunachus Diospa simi nisqanta willanku, yachachinkutaj, chaykunaman.

¹⁸ Diospa Qhelqachisqanpi nin: Erapi trillaj bueymanqa ama ñukuta churankichu, nispa. Jinallataj nin: Pichus llank'ajqa llank'asqanmanta pagota jap'inan tiyan, nispa.

¹⁹ Uj runalla iglesiata pusarejta ch'ataykunman chayqa, ama nisqanta uyariychu. Manachayqa, iskay, chayrí kinsa rikojkuna kajtillan, nisqankuta uyariy.

²⁰ Jinallataj iglesiata pusarejkunamanta juchallispallapuni puriyta munajkunataqa tukuy iglesiaj ñawpaqenpi k'amiy, wajkunapis manchachikunankupaj.

²¹ Noqaqa Diospa ñawpaqenpi, Tukuyta Kamachej Jesucristoj ñawpaqenpipis, chantá ajllasqa angelkunaj ñawpaqenpiwan ima kamachiyki kay kamachisqata junt'anaykita ama pitapis qhawaraspa, nitaj pimanpis uyata orqhospa.

²² Chantá, ama pitapis usqhay usqhayta iglesiata pusarej kananpaj churallaychu, pantaykojtin, ama ruwaysikoj jina rikhurinaykipaj. Manachayqa qan kikiyki mana allin kajmanta t'aqakuy.

²³ Wijsaykimanta sapa kuti onqosqaykirayku amaña yakullata ujyaychu, manachayrí uj chhika vinota ujyay.

²⁴ Wakinkunaj juchankoqa sut'i yachakun, manaraj juzgasqa kashajtinku. Wakinkunajtarí qhepamanraj yachakun juzgasqa kasqankumantaña.

²⁵ Ajinallatataj wakinkunajta allin ruwasqankupis sut'i yachakun. Allin ruwasqanku pakasqa jinalla kanman chaypis, mana wiñaypaj pakasqallapuni kayta atinchu.