1 Timoteo 4 - DIOSPA QHELQACHISQ

Mana cheqanta yachachejkuna rikhurimonqanku

¹ Santo Espiritoqa sut'ita nin qhepanejman wakinkunaqa cheqan ñanmanta pantaykuspa Diosta qhatiyta saqepunankuta. Paykuna pantachej espiritukunata kasonqanku, supaykunaj yachachisqankutataj jap'ikonqanku.

² Chay yachachejkunaqa puraj uya, llullataj kanku. Sonqonku thaluyasqa kasqanrayku, mana allin ruwasqankumanta sonqonku manaña nananchu.

³ Paykunaqa casarana mana walejchu kasqanta nenqanku, nillanqankutaj wakin mikhunata mana mikhunachu kasqanta. Diosrí chay mikhunata churarqa, pikunachus paypi atinikojkuna, chantá cheqa kajta rejsejkuna Diosta pachis nispa mikhunankupaj.

⁴ Diospa tukuy ruwasqanqa sumajmin, manataj imapis qhesachanapaj jinachu, sichus pachis nispa mikhusun chayqa.

⁵ Ajinaqa chaykunata mikhuyta atinchej, imajtinchus Dios mikhunapaj kasqanta nin. Noqanchejtaj Diosta pachis nispa, chaykunata mikhunchej.

Jesucristota kasuspa allinta ruwaj kamachi

⁶ Timoteo, chaykunatachus wawqe panakunaman yachachinki chayqa, Cristo Jesuspa sumaj kamachin kanki. Jinallataj mikhunawan jina sumaj kallpachasqa kanki Diospi atinikunamanta yachachisqawan, mayqentachus kunankama qhatishanki, chaywan.

⁷ Chaywanpis Diosman mana kutirikojkunaj parlasqankuta, chantá ñawpa cuentokunatapis qhesachay. Chaykunata uyarinaykitaqa, Diosta kasuspa purinaykipaj yachakuy.

⁸ Ukhunchejta kuyuchinaqa ukhunchej qhalilla kananpaj yanapan. Chaywanpis Diosta kasuspa purinapaj yachakunaqa aswan sumajraj, imaraykuchus chayqa kay kawsaypaj, jinataj jamoj kawsaypajpis allinninchejpaj kashan.

⁹ Chay nisqaqa cheqamin, tukuyninchejtaj chayta jap'ikunanchej tiyan.

¹⁰ Chayrayku tukuy sonqo sinch'ita llank'anchej, jinataj mayta kallpakushallanchejpuni, imaraykuchus kawsaj Diospi atinikuspa yanapanawanchejta suyakushanchej. Diosqa tukuy runata qhespichiyta munan, astawanqa pikunachus paypi atinikunku, chaykunata.

¹¹ Chay imakunamanta yachachiy, chantá kutin kutinta niy tukuy kasunankuta.

¹² Ama saqeychu wajkuna pisipaj qhawasunankuta wayna kasqaykirayku. Aswanpis Diosta qhatikojkunaj ñawpaqenkupi allinta puriy, paykunapis qan jina puriyta munanankupaj. Allinta puriy, rikunankupaj imaynatachus parlasqaykita, imaynatachus kawsasqaykita, imaynatachus wajkunata munakusqaykita ima. Rikullachunkutaj Diospi imaynatachus atinikusqaykita, chantá mana imamanta k'amina kawsasqaykita ima.

¹³ Jinallataj qanta watukusoj jamunaykamaqa Diospa Qhelqachisqanta tukuypa uyarinanta ñawirispallapuni kay. Chantá wawqe panakunaj sonqonkuta oqhariy, yachachiytaj.

¹⁴ Ama qonqapuychu ruwanapaj atiy qanman qosqa karqa, chayta ruwanamanta. Chay atiy Diospa sut'inchasqanman jina qanman qosqa karqa, maypachachus iglesiamanta kurajkuna makinkuta umayki pataman churarqanku, chaypacha.

¹⁵ Chaykunata allinta ruwanaykipaj sonqoykita churay. Ajinata ruwajtiyki tukuy rikonqanku Diospi atinikunapi maykamachus wiñasqaykita.

¹⁶ Qan imaynatachus purisqaykita allinta qhawakuy, jinallataj wajkunaman imatachus yachachisqaykitapis. Chantá imachus cheqan kajpi sinch'ita sayay qhespichisqa kasqaykej allinninpaj, jinallataj uyarisojkunapis qhespichisqa kanankupaj.