1 Timoteo 3 - DIOSPA QHELQACHISQ

Iglesiata pusarejkuna imaynachus kananku

¹ Kay nisqayqa ajinapuni: Pichus iglesiata pusarej kayta munajqa sumaj ruwanata ruwayta munan.

² Chayrayku payqa mana k'amina kanan tiyan, uj k'ata warmiyoj, sonqonpa munasqanwan mana atipachikoj, allinpaj qhawasqa, sumaj yuyayniyoj, wasinman wajyarikuyta yachaj, chantá yachachinanpaj sumaj wakichisqa.

³ Jinallataj mana machakojchu kanan tiyan, nitaj maqanakuta mask'ajchu, manachayqa llamp'u sonqoyoj, k'acha runa. Manallataj qolqemanta wañusqachu kanan tiyan.

⁴ Chantá wasinpi ayllunta allinta qhawanan tiyan wawankunata payta kasunankuta yachachispa, chantá respetaspa.

⁵ Chayqa ajina, imaraykuchus pichus wasi ayllunta mana allinta qhawayta atejqa manallataj Diospa Iglesiantapis allinta qhawayta atenqachu.

⁶ Jinallataj iglesiata pusarejqa mana kunallanraj Jesucristopi atinikojchu kanan tiyan, imajtinchus runaykachayta qallarinman. Chantataj, Kuraj Supay imamantachus juchachasqa karqa, chayllamantaj urmaykunman.

⁷ Jinallataj iglesiata pusarejqa Diosman mana kutirikojkunapajpis allinpaj qhawasqa kanan tiyan, ama p'enqaypi rikhurinanpaj, nitaj Supaypa tojlla churasqanman urmananpaj.

Iglesiapi diaconokuna imaynachus kananku

⁸ Ajinallataj iglesiapi diaconokunapis allinpaj qhawasqa kananku tiyan, mana iskayta parlaj, manataj machakojkuna, nitaj mana allinta ruwaspa qolqe jap'iymanta wañusqa.

⁹ Jinallataj diaconokunaqa Diospa pakasqa yachayninta sut'inchasqanman k'askasqapuni kananku tiyan, chantá sonqonku mana juchachananpaj jina purinanku tiyan.

¹⁰ Manaraj paykuna iglesiapi imachus ruwanankuman churasqa kashajtinku, ñawpajta allintaraj qhawaychej chaypaj jinachus manachus kasqankuta. Chaymantataj sichus mana k'amina kanku chayqa, diácono kanankupaj churasqa kachunku.

¹¹ Warmi diaconokunapis jinallataj allinpaj qhawasqa kachunku, ama simi apajkuna, nitaj sonqonkoj munasqanwan atipachikojkuna, manachayqa tukuy imapi maychus kajta junt'ajkuna.

¹² Diaconokunaqa uj warmiyojlla kachunku, jinataj wawankukunata, chantá wasinkupi kajkunata ima allinta qhawananku tiyan.

¹³ Diaconokuna imachus ruwanankuta allinta junt'aspa, allinpaj qhawasqa kayta tarinku. Jinataj paykuna Cristo Jesuspi atinikusqankumanta mana manchachikuspa parlayta atenqanku.

Jesuspi atinikunamanta sut'inchasqa kaj

¹⁴ Noqa usqhayllata qanman jamuyta munashani chaypis, kunan kaykunata nispa qhelqamuyki.

¹⁵ Ajinamanta sichus kaypi qhepakullasajraj chayqa, yachanki imaynatachus Diospa ayllun ukhupi purinayki kasqanta. Chay aylloqa kawsashaj Diospa Iglesian, mayqenchus cheqa kajta waqaychan, sinch'itataj sayachin, chay.

¹⁶ Kayta tukuy sonqo niyki: Jesucristopi atinikunamanta pakasqa yachayta sut'inchawasqanchejqa may jina t'ukunamin: Cristoqa runaman tukuspa, kay pachaman jamorqa. Santo Espiritutaj Cristo mana juchayoj kasqanta sut'incharqa. Angelkunapis Cristota rikorqanku. Jinataj payta qhatejkuna tukuy runaman paymanta willarqanku. Runakunataj tukuynejpi paypi atinikorqanku. Chaymantataj janaj pachapi jatun k'anchaypa lliphipiyninman oqharisqa karqa.