1 Timoteo 2 - DIOSPA QHELQACHISQ

Imaynatachus Dioswan parlarikuna

¹ Ñawpajta yuyaychayki, Dioswan parlarikuspa, tukuy runarayku mañapunaykita. Tata Dios paykunata yanapananta mañapuy, chantá paykunamanta Diosta pachis niy.

² Astawanqa kuraj kamachejkunarayku Diosmanta mañapuy, chantá tukuy kamachejkunapaj ima. Ajinamanta allin kawsakuypi kawsakusunchej, mana ni ima ch'ajwapi, Diosta kasuspa, chantá cheqanta ruwaspa ima.

³ Ajinata mañapuna allin, qhespichejninchej Diostataj kusichin.

⁴ Pay munan tukuy runakuna qhespichisqa kanankuta, jinataj cheqan kaj yachachiyta rejsinankuta.

⁵ Uj k'atalla Dios tiyan, jinallataj Dioswan runakunata allinyachiyta atej runapis uj k'atalla, chaytaj Cristo Jesús.

⁶ Pay kikinmin wañunanpaj jaywaykukorqa, ajinamanta tukuy runata qhespichinanpaj. Chaymantataj Dios maychus tiemponpi tukuy runaman willacherqa.

⁷ Noqataj chaymanta willanaypaj Jesuspa kuraj kachan churasqa kani, jinallataj mana judío kajkunaman Jesuspi atinikunamanta, chantá cheqa kajmanta ima yachachinaypaj. Ajinata nispaqa, cheqanta nini, manataj llullakushanichu.

⁸ Chayrayku tukuynejpi yupaychanapaj tantakuypi qharikunaqa Dioswan parlarikunankupaj allin puriyniyoj kachunku, mana piwan siminakuspa, nitaj piwan phiñanakuspa, nillataj imamantapis piwan churanakuspa.

⁹ Ajinallatataj warmikunapis maychus kajllata p'achallikuchunku, k'achanchakuspapis maychus chayllata k'achanchakuchunku. Chujchankutapis maychus chayllata simp'akuchunku. Jinallataj qorimanta chayrí perlamanta ruwasqa walqawan ama anchata k'achanchakuchunkuchu, nillataj ashkha precioyoj p'achata churakuchunkuchu.

¹⁰ Manachayqa, Diosta jatunchayta munajkuna jina warmikunaqa allin kajta ruwasqankuwan k'achanchakuchunku.

¹¹ Jinallataj Diosta yupaychanapaj tantakuypi warmikuna yachachejta ch'inllamanta uyarichunku k'umuykukoj sonqowan.

¹² Mana munanichu warmikunaqa Diosta yupaychanapaj tantakuypi yachachinankuta, nitaj qharikunata kamachinankuta. Manachayqa Diosta yupaychanapaj tantakuypi ch'inlla kachunku.

¹³ Chayta nini, imaraykuchus Diosqa Adantaraj ñawpajta ruwarqa, chaymantataj Evata.

¹⁴ Manataj Adanchu Supaynejta q'otiyasqa karqa, manachayqa warmi q'otiyachikuspa, juchallerqa.

¹⁵ Chay tukuywanpis warmeqa chaymanta qhespichisqa kanqa, sichus mama jina imachus ruwananta junt'anqa chayqa. Jinallataj pay Diospi atinikuspa, munakuypi, llimphu kawsaypi ima purinan tiyan.