1 Timoteo 1 - DIOSPA QHELQACHISQ

Pabloqa Timoteota napaykun

¹ Noqa Pablo Jesuspa kuraj kachan kani, qhespichiwajninchej Diospa kamachisqanrayku chantá Cristo Jesuspa kamachisqanraykutaj. Paynejtamin Dios yanapanawanchejta suyakunchej.

² Timoteo, kay cartata qhelqaspa, qanman apachimuyki, imaraykuchus qanqa Diosta qhatikuypi waway jina kanki. Tata Diosninchej, chantá Tukuyta Kamachej Cristo Jesusninchej ima qhasilla k'acha yanapayninkuta, khuyakuyninkuta, chantá sonqo tiyaykuyninkuta ima qanman qosuchunku.

Mana cheqanta yachachejkunamanta qhawakuna

³ Éfeso llajtapi mana cheqanta yachachejkuna kashanku. Noqataj Macedoniaman rishaspa, chaypi qheparikunaykita nerqayki, chay yachachejkunata kamachinaykipaj amaña waj jinata yachachinankuta.

⁴ Chantá wawqe panakunata nillaytaj qhasi manakaj cuentokunamanta ama watunankuta, nillataj ñawpa tatakunaj mana tukukuyniyoj listasqa sutinkuta kasu ruwanankuta. Chay qhasi manakaj imakunaqa runakunata churanachin, manataj paykunata yanapanchu Diospi atinikuspa kawsakunankupaj.

⁵ Kayta kamachiyki munaspa Diosta tukuy qhatikojkunapura tukuy sonqowan munakunaykichejpaj, llimphu sonqowan, chantá Diospi tukuy sonqo atinikuspa ima.

⁶ Wakinkunarí chay jinata munakuspa kawsakunamanta karunchakuspa, qhasi manakaj thawtinaman qokunku.

⁷ Paykuna Diospa kamachisqanmanta yachachejkuna kayta munaspa, ni yachallankupischu imatachus parlasqankuta, nitaj imatachus yachachisqankutapis.

⁸ Yachanchej Diospa kamachisqanqa allin kasqanta, sichus imapajchus churasqa kasqanman jina apaykachanchej chayqa.

⁹ Yachallanchejtaj Diospa kamachisqan mana cheqanta ruwajkunapajchu churasqa kasqanta. Manachayqa kay jinata ruwajkunapaj churasqa karqa: Kamachisqata mana uyarikuyta munajkunapaj, mana kasukojkunapaj, Dioswan churanakojkunapaj, juchasapakunapaj, pikunachus tatankuta, chayrí mamankuta wañuchejkunapaj, runa wañuchejkunapaj ima.

¹⁰ Jinallataj Diospa kamachisqan churasqa karqa: Khuchichakuspa purejkunapaj, qharipura khuchichakojkunapaj, runata suwajkunapaj, llullakojkunapaj, Diospa sutinta qhasita oqharejkunapaj, jinallataj cheqan yachachiypa contranpi sayaykojkunapaj ima.

¹¹ Chay cheqan yachachiyta willanaypaj may yupaychasqa Diosninchej noqata churawarqa, Jesucristomanta jatunchasqa sumaj willayman jina.

Pabloqa Diosta pachis nin

¹² Tukuyta Kamachej Cristo Jesusninchejta pachis nini, pichus kallpachawarqa, chayta. Payqa noqapi atinikunanpaj jina kasqayta qhawawaspa, paypa ruwananpi ruwaysikunaypaj churawarqa.

¹³ Ñawpajta Cristoj contranta rimaj kani. Jinataj payta chejnispa qhatiykachaj kani, paypajtaj millayta parlaj kani. Chaywanpis pay khuyarikuwarqa, imaraykuchus noqa manaraj Cristomanta jap'ikushaspa, imatachus ruwashasqayta mana yacharqanichu.

¹⁴ Chantá Tukuyta Kamachej Diosninchej qhasilla k'acha yanapayninwan may jinatapuni yanapawarqa. Jinallataj Cristo Jesusnejta paymanta jap'ikuyta, jinataj munakuyta ima Dios yanapallawarqataj.

¹⁵ Kay willayqa cheqamin, jap'ikunapaj jinataj, ajinaqa tukuy jap'ikunanchej: Cristo Jesús kay pachaman jamorqa juchasapakunata qhespichinanpaj. Chay juchasapakunamantataj noqa aswan millay juchasapa kani.

¹⁶ Ajina kashajtiypis, Dios khuyarikuwarqa, ajinamanta Jesucristo noqapiraj jatun paciencianta rikuchinanpaj. Ajinata ruwarqa, pikunachus aswan qhepanejman paymanta jap'ikuspa wiñay kawsayniyoj kananku karqa, chaykunapaj.

¹⁷ Chayrayku wiñaypaj Kuraj Kamachej Dios yupaychasqa, jatunchasqataj kachun. Payqa mana jayk'aj wañunchu, mana rikukoj, uj k'ata Dios wiñay wiñaynintinpaj. Ajina kachun.

¹⁸ Timoteo wawáy, kayta ruwanaykita kamachiyki, imaynatachus ñawpajta qanmanta sut'incharqanku, chayman jina, ajinamanta sumaj soldado jina sumajta maqanakunaykipaj:

¹⁹ Cristopi atinikusqaykimanta sinch'ita ch'ipakuy, sonqoykitapis llimphuta waqaychay. Wakinkunaqa sonqonkoj nisqanta mana kasusqankurayku, Diosllapi jap'ikunamanta karunchakuspa, chinkarqanku.

²⁰ Chaykunamanta Himeneo, chantá Alejandro ima kanku. Noqatajrí paykunata Supay Satanaspa makinman jaywaykorqani, ama Diospa contranta rimayta yachanankupaj.