1 Tesalonicenses 4 - DIOSPA QHELQACHISQ

Diospa munasqanman jina kawsana

¹ Kunanqa wawqe panakuna, Tukuyta Kamachej Jesuspa sutinpi mañarikuyku, Diospa munasqanman jina kawsakunaykichejta. Diosta qhatejkuna jina imaynatachus kawsanata ña yachacherqaykuña, qankunataj ajinata kawsashankichejña. Chaywanpis qankunata mayta niyku ajinallatapuni kawsanaykichejpaj kallpakunaykichejta.

² Qankuna yachankichejña Tukuyta Kamachej Jesuspa sutinpi noqayku imatachus ruwanaykichejta yachachisqaykuta.

³ Dios munan, qankuna juchamanta t'aqasqa kajkuna jina allinta purinaykichejta. Munallantaj khuchichakuspa purinamanta karunchakunaykichejta.

⁴ Sapa ujniykichej warmiykichejwan llimphu sonqowan kawsakuychej, payta respetakuspa.

⁵ Amataj Diosta mana qhatejkuna jina millay ch'ichi kajta ruwayta munapayaspa kawsaychejchu.

⁶ Ama pipis kaykunata ruwaspa Diosta qhatikoj masinpa contranta imatapis ruwachunchu, nillataj q'otiyachunchu, imaraykuchus Tukuyta Kamachej Jesusqa chayta ruwajkunata sinch'ita jasut'enqa. Chaymanta qankunata mayta k'amerqaykuña.

⁷ Diosqa mana millayta ruwaspa purinapajchu wajyawarqanchej, manachayqa juchamanta t'aqasqa kaspa, Diospa munasqanman jina kawsananchejpaj.

⁸ Ajinaqa, pichus kay yachachisqaykuta pisipaj qhawajqa mana runatachu pisipaj qhawan, manachayqa Diosta, pichus Santo Espirituta qowarqanchej, chayta.

⁹ Diosta qhatejkunapura munakunamanta manaña imatapis ninayku kanchu, imaraykuchus Dios kikinmin qankunapura munakunaykichejta yachachisunkichej.

¹⁰ Qankuna ajinata ruwashankichej, imajtinchus Macedoniapi tukuy Diosta qhatejkunata munakunkichej. Chaywanpis wawqe panakuna, tukuy sonqo mañarikuyku qankuna astawanraj paykunata munakunaykichejta.

¹¹ Jinallataj allinpi kawsakunaykichejpaj atisqaykichejta ruwaychej. Imachus ruwakunaykichejta ruwaspa kaychej, ñawpajta yachachisqaykuman jina.

¹² Ajinata kawsajtiykichej, Diosta mana qhatejkuna qankunata respetowan qhawasonqachej, nitaj wajkunaj uyanta qhawaspa kankichejchu.

Tukuyta Kamachej Jesús kutimonqa

¹³ Munasqa wawqe panakuna, yachanaykichejta munayku, Diosta qhatejkunamanta pikunachus wañupojkunawan imachus kananmanta. Chayta yachaspa, mana llakikunkichejchu, pikunachus mana ni ima allin kajtapis suyashankuchu, chaykuna jina.

¹⁴ Noqanchejqa Jesús wañusqanta, chantá kawsarimpusqanta creenchej. Ajinallataj creenchej Dios kawsarichinanta, Jesuspi atinikojkunamanta pikunachus wañupunkuña, chaykunata.

¹⁵ Kayta Tukuyta Kamachej Jesuspa yachachisqanman jina niyku: Noqanchej, pikunachus Tukuyta Kamachej Jesús kutimunankama kawsashajkunaqa paywan tinkunanchejpaj mana ñawpaykusunchu, pikunachus wañupunkuña, chaykunata.

¹⁶ Chaypacha Tukuyta Kamachej Jesús jatunmanta kamachenqa, arcangeltaj qhaparenqa, jinataj uj ángel Diospa trompetanta waqachenqa. Chantá janaj pachamanta kikin Tukuyta Kamachej Jesús urayk'amonqa. Chaymantataj Cristopi atinikoj wañojkuna ñawpajta kawsarimponqanku.

¹⁷ Chantá noqanchejpis, pikunachus chaykama kawsashajkunaqa paykunawan khuska phuyukunapi oqharisqa kasunchej, Tukuyta Kamachej Jesuswan tinkunanchejpaj. Chaymantapachataj Tukuyta Kamachej Jesuswan wiñaypaj kasunchej.

¹⁸ Chayrayku, ajinata yachachisqaywan purajmanta sonqochanakuychej.