1 Samuel 16 - DIOSPA QHELQACHISQ

David kuraj kamachej kananpaj ajllasqa

¹ Uj kuti Tata Dios Samuelta nerqa: Mayk'ajkamataj Saulmanta llakikunkiri? Noqaqa Israel suyupi kuraj kamachej kananmanta wijch'upuniña. Ajinaqa aceite apaykachanayki wajraman aceiteta churaspa, Belén llajtapi Yeséj wasinman riy, imaraykuchus ujnin kaj churinta kuraj kamachej kananpaj ajllaniña, nispa.

² Samueltajrí taporqa: Imaynatataj riymanri? Saúl risqayta yachaspaqa, wañuchiwanqa, nispa. Chantá Tata Dios kuticherqa: Uj malta wakata aysariykukuspa, niy: Tata Diosman uywata ñak'aspa q'olachinata jaywaj jamuni, nispa.

³ Chantá uywa ñak'asqata q'olachispa jaywanaman Yeseta wajyay, noqataj nisqayki imatachus ruwanaykita. Kuraj kamachej kananpaj pitachus ajllasqayta qan aceitewan jawinki, nispa.

⁴ Samueltaj Tata Diospa kamachisqanta kikinta ruwarqa. Belenman chayashajtinñaqa, chay llajtamanta kurajkuna uj chhika mancharisqa taripaj llojsimuspa, Samuelta taporqanku: Allin sonqowanchu jamushawayku? nispa.

⁵ Samueltaj kuticherqa: Arí. Tata Diosman uywa ñak'asqata q'olachispa jaywaj jamushani. Wakichikuychej Diospa ñawpaqenpi llimphupaj qhawasqa kanaykichejpaj. Chantá noqawan khuska jamuychej Tata Diosman q'olachinata jaywaj, nispa. Chaymanta Samuelqa Yeseta, churinkunatawan llimphupaj qhawasqa kanankupaj ruwaytawan, Tata Diospaj q'olachinaman paykunatapis wajyallarqataj.

⁶ Chayamojtinkutaj, Samuelqa Eliabta rikuspa, sonqonpi nerqa: Kaychá kanqa Tata Diospa ajllasqan kuraj kamachejqa, nispa.

⁷ Tata Diostajrí nerqa: Ama allin rijch'ayninta qhawaychu, nitaj sayaynintapis. Mana noqaqa payta ajllakunichu. Noqaqa mana runa jinachu qhawani. Runaqa ñawinpa rikusqallanta qhawan, noqarí sonqota qhawani, nispa.

⁸ Chantá Yeseqa sullk'a kaj Abinadabta wajyaspa, Samuelman pusarqa. Samueltajrí nerqa: Nillataj paytapis Tata Diosqa ajllanchu, nispa.

⁹ Chaymanta Yeseqa Samatañataj pusarqa. Samueltajrí nerqa: Manallataj paytapis Tata Diosqa ajllanchu, nispa.

¹⁰ Yeseqa qanchis churinkunata Samuelman pusarqa, Samueltaj nerqa ni mayqenta Tata Dios ajllasqanta.

¹¹ Chantá Samuelqa ujtawan tapullarqataj: Manachu astawan churiykikuna tiyan? nispa. Yesetaj kuticherqa: Uj aswan sullk'a kaj kanraj. Payqa ovejakunata michishan, nispa. Samueltaj nerqa: Payta pusachimuy. Pay mana chayamunankamaqa mana mikhoj tiyaykusunchu, nispa.

¹² Chantá Yeseqa payta wajyachimorqa. Chay waynaqa alajitu karqa, k'acha ñawiyoj, allin rijch'ayniyojtaj. Chantá Tata Diosqa Samuelta nerqa: Kaymá chay ajllasqayqa. Kuraj kamachej kananpaj aceiteta paypa umanman jich'aykuy, nispa.

¹³ Chaypacha Samuelqa aceiteyoj wajrata jap'ispa, wawqenkunaj rikunanta Davidpa umanman jich'aspa jawiykorqa. Chaymantapachataj Tata Diospa Espíritun Davidman jamorqa. Chantá Samuelqa Ramá llajtaman kutiporqa.

David Saulpaj arpata tocaripun

¹⁴ Chaypacha Tata Diospa Espíritun Saulmanta karunchakorqa, Tata Diospa kachamusqan uj millay espiritutaj payta ñak'arichisharqa.

¹⁵ Saulpa kamachinkunataj nerqanku: Wiraqochíy, Diospa kachamusqan uj millay espíritu qanta ñak'arichishasunki.

¹⁶ Chayrayku noqaykuta kachawayku, arpa tocayta yachajta mask'amunaykuta. Ajinamanta chay millay espíritu ñak'arichisojtin, arpata waqachispa sonqoykita tiyaykuchinman, nispa.

¹⁷ Saultaj kamachinkunata nerqa: Mask'apuwaychej ari pillatapis sumajta arpa tocayta yachajta, pusampuwaychejtaj, nispa.

¹⁸ Chantá ujnin kamachin nerqa: Noqa yachani Belén llajtapi Yeséj ujnin churin arpata sumajta tocayta yachasqanta. Payqa maqanakunapajpis wapu, maychus kajta parlaj, allin rijch'ayniyoj, Tata Diostaj paywan kashan, nispa.

¹⁹ Chaypacha Saulqa Yeseman kacharqa kay jinata ninankupaj: Ovejata michej churiyki Davidta kachamuway, nispa.

²⁰ Yesetaj churin Davidta Saulman kacharqa. Chantá t'antata, uj bota vinota, uj chivota ima burroman chajnaykuspa, apachillarqataj.

²¹ Ajinata Davidqa Saulpa kamachinan wasiman chayarqa, chaypitaj Saulpa kamachin karqa. Saulqa maytapuni Davidta munakorqa, paytataj churarqa armanta apaykachapojnin kananpaj.

²² Chantá Saulqa Yeseman willacherqa: David kaypi qhepakuchun, noqata sirvinawanpaj, imaraykuchus manchay allinmin rijch'awan, nispa.

²³ Ajinaqa Diospa kachamusqan millay espíritu Saulman jamojtinkama, Davidqa arpanta tocapoj. Arpata tocapojtintaj, Saulqa yuyayninman kutirej, walejyajtaj. Chay millay espiritutaj paymanta karunchakoj.