1 Reyes 8 - DIOSPA QHELQACHISQ

Salomonqa Diospa arcanta Temploman apan

¹ Chantá Salomonqa tukuynin Israelmanta kurajkunata, jatun ayllukunamanta kurajkunata, wasi ayllumanta kurajkunatawan ima Jerusalenpi tantacherqa, Davidpa llajtan Sionmanta Tata Diospa arcanta apamunankupaj.

² Tukuynin Israelmanta runakunataj qanchis kaj killa, Etanim sutiyoj killapi, kuraj kamachej Salomonwan tantakorqanku. Chaypachataj may jatun raymita ruwarqanku.

³ Israelmanta tukuynin kurajkuna chayamojtinku, sacerdotekunaqa Diospa arcanta oqharerqanku, lijrariykukuspataj aparqanku.

⁴ Dioswan Tinkukuna Toldotapis apallarqankutaj, chaypi imakunachus karqa, chaykunata ima. Apajkunaqa sacerdotekuna, levitakunawan karqanku.

⁵ Kuraj kamachej Salomón, tukuynin Israelmanta runakunapiwan Diospa arcanpa ñawpaqenpi tantasqa kasharqanku. Paykuna ovejakunata, torokunatawan ñak'aspataj, Diosman jaywasharqanku. Jaywanapaj chay chhika kasqanraykutaj mana yupana atikorqachu.

⁶ Sacerdotekunataj Tata Diospa arcanta Templo ukhuman apaykorqanku, churarqankutaj Diosllapaj T'aqasqa Cheqaman, querubinkunaj lijranku uraman.

⁷ Chay querubinkunaj lijrankoqa chay arca patapi aysarparisqa kasharqanku. Ajinamanta lijrankunawan arcata, k'aspinkunatawan pakaykorqanku.

⁸ Wantuna k'aspinkunaqa jatun kasqankurayku, Diospaj T'aqasqa Cheqamantapacha rikukorqa, mayqenchus Diosllapaj T'aqasqa Cheqaj ñawpaqenpi karqa, chaymanta. Chaywanpis aswan jawamantaqa mana rikukorqañachu. Chaypi kunankama chay wantuna k'aspikunaqa kakushan.

⁹ Arcapeqa iskay p'alta rumikunalla kasharqa, Horebpi Moisespa churasqan. Chayqa Egiptomanta llojsimushajtinku israelitakunawan Diospaj trato ruwasqan karqa.

¹⁰ Diospaj T'aqasqa Cheqamanta sacerdotekuna llojsimojtinkukama, Tata Diospa Templonman phuyu junt'aykorqa.

¹¹ Sacerdotekunataj manaña chaypi yupaychanankupaj qhepakuyta aterqankuchu phuyu kasqanrayku, imaraykuchus Tata Diospa llimphu kayninpa lliphipiynin Temploman junt'aykorqa.

Salomonqa Templota Diosman jaywapun

¹² Chantá Salomón nerqa: Qan, Tata Dios, nerqanki laqhayaypi tiyakusqaykita.

¹³ Noqataj sumaj Templota ruwapuyki, wiñaypaj chaypi tiyakunaykipaj, nispa.

¹⁴ Chantá kuraj kamachejqa tukuynin israelitakuna sayasharqanku, chaykunaman kutirikuspa, paykunata samincharqa.

¹⁵ Paytaj nerqa: Jatunchasqa kachun Israelpa Tata Diosnin, pichus tatay Davidman parlasqanta kunan junt'an kay jina nisqanta:

¹⁶ Israel aylluyta Egiptomanta orqhomorqani, chay p'unchaymantapacha tukuynin Israel ayllukunamanta ni mayqen llajtata ajllakorqanichu chaypi tiyakunaypaj templota ruwapunawankupaj. Chaywanpis Davidta Israel aylluyta kamachinanpaj ajllakorqani, nispa.

¹⁷ Tatay Davidtaj Israelpa Tata Diosninta yupaychanapaj, uj templota ruwayta sonqonpi yuyarqa.

¹⁸ Chantá Tata Diosqa tatay Davidta nerqa: Noqapaj templota ruwapuyta yuyaspaqa, allinta ruwanki.

¹⁹ Chaywanpis mana qanchu ruwanki, manachayqa churiyki noqapaj templotaqa ruwapuwanqa, nispa.

²⁰ Tata Diosqa kunan nisqanta junt'an, imaraykuchus noqa tatay Davidpa cuentanpi Israelpa kamachinan tiyanapi kashani, Tata Diospa nisqanman jina. Jinataj uj templota Israelpa Tata Diosninpaj ruwapuni.

²¹ Chaypitaj Tata Diospa arcanpaj uj cheqata wakichini, Egiptomanta llojsimushajtinku Diosqa ñawpa tatanchejkunawan trato ruwasqan, chay arcapaj.

²² Chantá tukuynin israelitakuna rikushajtinku, Salomonqa Tata Diospa altarninpa ñawpaqenpi sayarikorqa, makinta janaj pachaman oqharispataj, nerqa:

²³ Israelpa Tata Diosnin, mana qan jina Diosqa janaj pachapi kanchu, nitaj kay pachapipis. Qanqa tratoykita junt'anki, khuyakuyniykitapis kamachiykunaman rikuchinki, qanta tukuy sonqo kasuspa purejkunaman.

²⁴ Kamachiyki tatay Davidman nisqaykita junt'arqanki, nisqaykiman jina kunan ruwaspa.

²⁵ Israelpa Tata Diosnin, junt'allaytaj kay imatachus tatay Davidman nisqaykita: Noqaj ñawpaqeypi kallanqapuni mirayniykimanta uj runa Israelpa kamachinan tiyanapi tiyaykojqa. Ajina kanqa sichus churiykikuna kamachisqayta junt'anqanku, allintataj kawsanqanku chayqa, imaynatachus qanpis noqaj ñawpaqeypi purerqanki, ajinata, nispa.

²⁶ Kunantaj, Israelpa Diosnin, kamachiyki tatay Davidman chay nisqaykita junt'ay ari.

²⁷ Chaywanpis cheqapunichu Diosqa kay pachapi tiyakunman? Janaj, aswan patapi janaj pachakunapis mana wakisuyta atishajtin, imaynatataj kay wasita ruwapususqaypi tiyakuyta atiwajri?

²⁸ Chay tukuywanpis, qanqa mañakusqaytaqa uyarillawaypuni ari. Tata Diosníy, noqa kamachiyki qhaparikususpa mañakususqaytapis uyariway ari.

²⁹ Tuta p'unchay kay wasita qhawarillaypuni, imaraykuchus qanqa nerqanki: Noqa chaypi kasaj, nispa. Kaypi mañakususqayta uyariway ari.

³⁰ Kay Templo qhawarisqa, noqa kamachiykej mañakusqayta, Israel aylluykej mañakusqantapis uyariy ari. Janaj pachapi tiyakunki, chaymantapacha uyariwayku, juchaykutataj pampachay.

³¹ Pillapis runa masinpa contranpi juchallikojtin, sichus tiluchinkuman kay Temploj altarninpa ñawpaqenpi chayqa,

³² qanqa janaj pachamantapacha uyarimuspa, kamachiykipaj justiciata ruwanki. Juchayojtaqa juchanman jina jasut'inki, juchanpis payllamantaj urmanqa. Mana juchayojmantajrí allin ruwasqanman jina qopunki.

³³ Ichapis aylluyki awqankukunawan atipachikunkuman contraykipi juchallikusqankurayku. Chantá qanman kutirikuspa, sutiykita jatunchaspa oqharinkuman, kay wasipitaj tukuy sonqo mañakusunkuman.

³⁴ Jina chayqa, qan janaj pachamanta uyarimuspa, Israel aylluykej juchankuta pampachanki, ñawpa tatankuman jallp'a qosqaykimantaj paykunata kutichimpunki.

³⁵ Qanpa contraykipi juchallikusqankurayku, ichapis mana paramunmanchu. Sichus Templo qhawarisqa mañakusunkuman qan llakichisqaykirayku, juchankumanta kutirikuspataj, chantá sutiykita yupaychaspa mañakusunkuman chayqa,

³⁶ janaj pachamanta uyarimuspa, kamachiykikunaj juchankuta pampachay. Chantá paykunata yachachiy allinta purinankuta. Paratapis parachimuy, aylluykiman chayaqenkupaj qorqanki, chay jallp'aman.

³⁷ Ichapis kay jallp'api yarqhay, onqoy kanman, chajrapi phinki phinki, t'una khuru, piki pikipis kanman. Chayrí ichapis awqanku llajtankukunata muyuykuspa sayaykunkuman, jinataj ima llakiypis, onqoypis rikhurinman.

³⁸ Sichus mayqen israelitallapis, chayrí tukuynin Israel aylluyki mañakusunkuman, sapa uj sonqonpi phutisqa kasqanman jina, makinkutataj kay Templo cheqanejman oqharinkuman chayqa,

³⁹ qan janaj pachamanta uyariy, maypichus tiyakunki, chaymantapacha. Chantá juchankuta pampachay sapa ujninkuman ruwasqankuman jina qospa, imaraykuchus qanllamin tukuy runaj sonqonkuta, tukuy yuyasqankutapis rejsinki.

⁴⁰ Ajinamanta qanllata jatunchasonqanku, ima jallp'atachus ñawpa tataykukunaman qorqanki, chaypi kawsanankukama.

⁴¹ Ajinallatataj ichapis waj llajtayoj mana israelita runapis sutiykimanta uyarispa, karu suyumanta jamunman,

⁴² imaraykuchus uyarenqanku sutiyki, atiyniykipis manchay jatun kasqanta. Sichus kay Temploykiman mañakusoj jamusunkuman chayqa,

⁴³ qanqa janaj pachamanta uyarimuy, maypichus tiyakunki, chaymantapacha, ruwaytaj karu llajtayojpa mañakususqanta. Chay jinamanta tukuy suyu rejsisonqanku, sutiykitataj manchachikonqanku Israel aylluyki jina. Ajinamanta yachanqanku kay ruwapususqay Templopi sutiyki may oqharisqa kasqanta.

⁴⁴ Ichapis aylluyki maqanakuman llojsinkuman awqankunaj contranpi, mayllamanpis kachawaj, chaypi. Sichus qanmanta mañakusunkuman kay ajllakusqayki llajta qhawarisqa, jinataj ruwapususqay Templo qhawarisqa chayqa,

⁴⁵ qanqa janaj pachamantapacha may llakiywan mañakusqankuta uyarispa, paykunata khuyarikuy, yanaparillaytaj.

⁴⁶ Mana kanchu uj runallapis mana juchallejqa. Chayrayku ichapis contraykipi juchallikunkuman, qantaj paykunaj contranpi phiñakuspa, karuman chayrí qayllamanpis awqankoj makinman jaywaykuwaj, presota waj suyuman apanankupaj.

⁴⁷ Paykunataj maypichus preso kashaspa, yuyayninkuman churakunkuman, chantá qanman kutirikamuspa, chaypitaj mañakuspa nisunkuman: Noqayku juchalliyku, mana allin kajta ruwaspa. Juchayojpuni kayku, nispa.

⁴⁸ Paykuna tukuy sonqonkuwan, tukuy almankuwan qanman kutirikamusunkuman, maymanchus awqanku presota aparqa, chaypi. Sichus qanmanta mañakamusunkuman, ñawpa tatankunaman qorqanki, kay jallp'aman qhawarisqa, ajllakorqanki kay llajtaman, sutiykipi noqa ruwaporqayki kay Templo cheqanejman qhawarisqa chayqa,

⁴⁹ qanqa janaj pachamanta uyarimuy chay mañakusqankuta, maypichus tiyakunki, chaymantapacha, jinataj paykunamanta kutisqa kay.

⁵⁰ Chantá qanpa contraykita aylluyki juchallikusqanta, tukuy imaymana pantasqankuta ima pampachay. Jinataj, pikunachus presota apajkunaj sonqonkuman churay aylluykita khuyarinankupaj.

⁵¹ Chayta ruwanki, imaraykuchus paykunaqa aylluyki kanku, chayaqeykitaj. Paykunataqa Egiptomanta, fierro unuyachina hornomanta jina orqhomorqanki.

⁵² Uyarillaway noqaj mañakusqayta, jinallataj Israel aylluykej mañakusqankutapis. Uyarillawayku qhaparispa qanmanta mañakusqaykutapis.

⁵³ Qanqa tukuy suyu ukhumanta, chayaqeyki kananpaj Israel aylluykita ajllakorqanki. Ajinata kamachiyki Moisesnejta ñawpa tataykunata Egiptomanta orqhomuspa nerqanki, nispa. Ajinata kuraj kamachej Salomonqa Dioswan parlarqa.

⁵⁴ Salomonqa altarpa ñawpaqenpi Tata Diosman mañakuyta tukuspa, janaj pachaman makinta oqharisqa qonqorikusqanmanta sayarikorqa.

⁵⁵ Chantá tukuynin tantasqa israelitakunata jatunmanta parlaspa, paykunata samincharqa:

⁵⁶ Tata Diosqa yupaychasqa kachun Moisesnejta nisqanman jina allin kawsayta Israel ayllunman qosqanmanta. Imatachus nisqanmanta mana ujpis mana junt'asqanqa kanchu.

⁵⁷ Tata Diosninchejqa noqanchejwanpuni kachun, imaynatachus ñawpa tatanchejkunawan karqa, ajinata. Payqa manapuni saqerpariwasunchu nitaj qhesachawasunchu.

⁵⁸ Tata Diosqa kasukoj sonqoyoj kananchejta ruwachun, munayninta ruwananchejpaj, kamachisqanta chantá nisqanta ima kasunanchejpaj, ñawpa tatanchejkunaman kamacherqa, chaykunata.

⁵⁹ Kunan kay mañakusqayta Tata Diosqa tuta p'unchay ama qonqachunchu, noqa kamachintapis, Israel aylluntapis qhawarinawanchejpaj, pisichikusqanchejman jina yanapanawanchejpaj.

⁶⁰ Ajinamanta kay pachapi tukuy suyu yachanqanku Tata Dioslla cheqa kaj Dios kasqanta, manataj waj kasqanta.

⁶¹ Tata Diosninchejwan sonqoykichej cheqanpuni kachun, nisqanpi purispa, kunan jina tukuy kamachisqanta kasuspa, nispa.

⁶² Chantá kuraj kamachejqa, tukuynin israelitakunapiwan uywa ñak'asqakunata Tata Diosman jaywarqanku.

⁶³ Salomontaj Tata Diosman allinyakuy jaywanakunatapis qollarqataj, 22.000 torokunata, 120.000 ovejakunatawan. Ajinata kuraj kamachejqa, tukuy israelitakunapiwan Templota Tata Diosman jaywaporqanku.

⁶⁴ Chaypacha kuraj kamachejqa Tata Diospa Templonpa ñawpaqenpi kasharqa, chay patiota Tata Diospaj t'aqarqa, imaraykuchus chaypi uywa ñak'asqata q'olachispa jaywarqa, ch'aki mikhuy jaywanakunatawan, allinyakuy jaywana wirakunatawan. Chay q'olachinakunawan, ch'aki mikhuy jaywanakunawan, allinyakuy jaywanakunawan ima may chhika kasqanrayku Diospa ñawpaqenpi broncemanta chay altarqa mana tukuyninpaj wakerqachu.

⁶⁵ Chaypacha Salomonqa tukuynin israelitakunawan khuska jatun raymita ruwarqanku. Ashkhapuni tantakamorqanku, Jamat chaymantapacha Egipto mayu chaynejkama. Chay raymita Tata Diospa ñawpaqenpi qanchis p'unchayta ruwarqanku, chantá uj qanchis p'unchaytawanraj ruwallarqankutaj. Tukuyninpi chunka tawayoj p'unchayta ruwarqanku.

⁶⁶ Q'ayantintaj kuraj kamachejqa tukuy runata kacharpayaporqa. Paykunataj kuraj kamachejta saminchaspa, manchay kusisqa, sonqo junt'asqataj wasinkuman riporqanku, Tata Diosqa kamachin Davidta, Israel aylluntawan saminchasqanmanta.