1 Reyes 6 - DIOSPA QHELQACHISQ

Salomón Diospa Templonta ruwachin

¹ Israelitakuna Egipto suyumanta llojsimpusqankumanta 480 wataña kashajtin, Salomontaj Israel suyupi tawa watataña kamachishajtin, Zif nisqa iskay kaj killapi Salomonqa Tata Diospa Templonta ruwachiyta qallarerqa.

² Salomón templota Tata Diospaj ruwacherqa, chayqa kay jina karqa: Sayt'unman iskay chunka qanchisniyoj metro karqa, anchonman jisq'on metro, sayayninmantaj chunka kinsayoj metro khuskanniyoj karqa.

³ Diospa Templonpa ñawpaqenpi corredorqa anchonman jisq'on metroyoj karqa, Temploj anchon kikillantaj. Chay Temploj ñawpaqenqa anchonman tawa metro khuskanniyoj karqa.

⁴ Temploj ventanankunatataj rejillayojta ruwacherqa.

⁵ Temploj puraj lado muyuyninpi, Diosllapaj T'aqasqa Cheqapiwan wasikunata muyurisqata ruwacherqa, Temploj perqanman k'askasqata.

⁶ Ura kaj pisoqa anchonman iskay metro uj cuarta kurajniyoj karqa. Chawpi pisotaj iskay metro kinsa cuarta kurajniyoj karqa, pata kaj pisotaj kinsa metro iskay t'ajlliyoj karqa. Chayqa jawannejman juch'uyachisqa karqa, Temploj perqanta jatuchaj k'aspita churaspa ama jusk'uranankupaj.

⁷ Chay wasita ruwashajtinku, fierromanta mana ima herramientaj sonarisqallanpis uyarikorqachu, ni martillokuna, ni jachakuna, imaraykuchus chay tukuy rumikunata churaykunankupajpacha ruwasqallataña apamorqanku.

⁸ Ura kaj pisoj punkonqa Temploj paña ladonpi karqa. Chaymanta iskay kaj, jinallataj kinsa kaj pisomanpis wicharinapajqa muyu escalera karqa.

⁹ Salomonqa Temploj perqanta tukuchaytawan, chay wasi ukhoj patanta warawayojta pino tablawan qhataykorqa.

¹⁰ Ruwallarqataj wasikunata, Temploj tukuynin muyurisqata. Chay wasikunaj sayaynin iskay metro uj cuarta kurajniyoj karqa, chaykunataj pino k'aspiwan Temploj perqanman jap'ichisqa karqanku.

¹¹ Chantá Tata Diosqa Salomonta nerqa:

¹² Kay wasita ruwayta qallarisqaykirayku, kayta nisqayki: Sichus yachachisqayman jina ruwanki, nisqayman jinataj purinki, kamachisqaytataj kasuwanki chayqa, noqapis tatayki Davidman qosaj nisqayta junt'allasajtaj:

¹³ Israelitakunawan tiyakusaj, manataj Israel aylluytaqa saqerpayasajchu, nispa.

¹⁴ Ajinata Salomonqa Templota ruwayta tukucherqa.

¹⁵ Temploj ukhunta, tukuynin perqanta, pinomanta tablawan tablayaykucherqa, pampamanta patakama. Patantapis pinomanta tablawan mast'aykorqa.

¹⁶ Ajinallatataj Temploj ukhu k'uchu ladonta pino tablawan pampamanta patakama tablayaykucherqa, chaytaj jisq'on metroyoj karqa. Chayqa karqa Diosllapaj T'aqasqa Cheqa.

¹⁷ Diosllapaj T'aqasqa Cheqa sayt'unman chunka pusajniyoj metroyoj karqa.

¹⁸ Chay wasi ukhoqa pino tablawan tablayasqa, k'acha llajllasqa karqa, k'ita lakayoteman rijch'asqa, chantá t'ika muk'ituman rijch'asqa warawakunawan ima. Tukuynin pino tablawan tablayasqa kaspaqa, mana ima rumipis rikukorqachu.

¹⁹ Temploj ukhunpitaj wakicherqa Diosllapaj T'aqasqa Cheqata, Tata Diospa trato ruwasqan arcata chayman churananpaj.

²⁰ Diosllapaj T'aqasqa Cheqaqa sayayninman, anchonman, sayt'unmanpis jisq'on metroyoj karqa. Chaypa ñawpaqenpitaj Salomonqa pinomanta uj altarta ruwarqa, chaytataj sumaj qoriwan lluch'iykorqa.

²¹ Ajinata Salomonqa Temploj tukuy ukhunta qoriwan lluch'iykorqa. Diosllapaj T'aqasqa Cheqaj ñawpaqenmantaj qorimanta cadenawan telaykorqa.

²² Tukuynin Templota patamanta urakama qoriwan lluch'iykorqa. Ajinallatataj ruwarqa Diosllapaj T'aqasqa Cheqaj ñawpaqenpi kaj altartapis.

²³ Diosllapaj T'aqasqa Cheqapaj ruwachillarqataj iskay querubín nisqa lijrayojkunata olivo k'aspimanta, sapa ujtaj sayayninman tawa metro khuskanniyoj karqa.

²⁴ Querubinpa sapa uj lijrantaj iskay metro cuarta kurajniyoj karqa. Ajinamanta lijranqa ujnin kaj puntanmanta ujnin kajpa puntankamaqa tawa metro khuskanniyoj karqa.

²⁵ Ajinallatataj chay ujnin kaj querubinpis tawa metro khuskanniyoj karqa. Chaykunapis kikinkamallataj ruwasqa karqanku.

²⁶ Ajinaqa iskaynin querubinpa sayaynin tawa metro khuskanniyoj karqa.

²⁷ Chaykunata Diosllapaj T'aqasqa Cheqa ukhuman churarqa. Lijrankunataj sapa ujninpata aysarparisqa karqanku. Ujninpata uj lado lijranqa perqaman chayarqa, chay ujninpa lijrantaj uj lado perqaman. Ajinamanta iskayninkoj lijrankunaqa khuskan wasipi tinkunakorqanku lijrapura.

²⁸ Chay querubinkunataqa qorillawantaj lluch'iykorqa.

²⁹ Chay tukuy perqakunapi muyurisqata t'illmirarqa querubinkunata, palmerakunata, t'ika muk'ukunatawan. Ukhu kaj wasipi, jawa kaj wasipipis ajinallatataj ruwarqa.

³⁰ Temploj pampantataj qoriwan lluch'erqa jawanta, ukhuntapis.

³¹ Diosllapaj T'aqasqa Cheqapajqa olivo k'aspimanta punkunta ruwarqa. Punku pata k'aspinkuna, sayantankunapis phishqa esquinayoj karqa.

³² Iskaynin punkoqa olivo maderamanta karqa, chay punkukunapitaj t'illmerqa querubinkunaman rijch'akojta, palmerakunata, t'ikakunatawan, chay tukuynintataj qoriwan lluch'iykorqa.

³³ Jinallatataj olivo k'aspimanta tawa esquinayoj sayantata Temploj punkunman yaykunapaj ruwacherqa.

³⁴ Chantá iskaynin punkukuna pino maderamanta karqanku, chay punkukunataj kikillanpi muyurinanpaj kijuyoj karqa mayqen ladomanpis muyunanpaj.

³⁵ Kikin punkukunapitaj t'illmerqa querubinkunaman rijch'akojta, palmerakunata, t'ika muk'ukunatawan, chaykunatapis sillp'a qoriwan lluch'iykorqa.

³⁶ Ukhu patiopi uj perqata kinsa sinruta ch'eqosqa rumikunawan ruwallarqataj, chay patanmantaj uj sinruta pino tablawan muyuykucherqa.

³⁷ Tawa watataña Salomón kamachishajtin, Zif nisqa chay killapi, Tata Diospa Temploj ñawpaj kaj cimientonkunata churayta qallarerqanku.

³⁸ Chunka ujniyoj watataña kamachishajtintaj, Bul nisqa pusaj kaj killapi, tukuy imanta ruwayta tukorqanku. Salomonqa qanchis watapi chay Templota ruwacherqa.