1 Reyes 22 - DIOSPA QHELQACHISQ

Micaías nin Ajab atipachikunanta

¹ Israelitakunawan siriokunawanqa kinsa watata mana maqanakorqankuchu.

² Jinataj kinsa watanman, Judamanta kuraj kamachej Josafatqa Israelpa kuraj kamachejnin Ajabta watukoj rerqa.

³ Israelmanta kuraj kamachejtaj yanapajninkunata nerqa: Manachu yachankichej Galaadmanta Ramotqa noqanchejpata kasqanta? Noqanchejtajrí mana imatapis ruwashanchejchu siriokunamanta qhechukapunanchejpaj, nispa.

⁴ Chantá Ajabqa Josafatta taporqa: Galaadmanta Ramotpa contranpi maqanakoj riysiwankimanchu? nispa. Josafattaj kuticherqa: Qanwan noqawanqa llajta masintin kanchej. Soldadoykunawan, caballoykunawan ima, qanwan khuska maqanakoj risqayku, nispa.

⁵ Chaywanpis Josafatqa Ajabta nillarqapuni: Manaraj maqanakoj rishaspa, Tata Diosta ñawpajta tapuriwaj, nispa.

⁶ Chantá Israelpa kuraj kamachejnenqa Diosmanta sut'inchajkunata tawa pachajta jina tantaykorqa, chantá paykunata taporqa: Galaadmanta Ramotpa contranpi maqanakoj risajchu, amachu? nispa. Paykunataj nerqanku: Rillay, imaraykuchus Tata Diosqa chay llajtata jap'inaykipaj yanapasonqa, nispa.

⁷ Josafattajrí nerqa: Kaypi Tata Diosmanta sut'inchaj waj kanmanrajchu paynejta tapurichinapaj? nispa.

⁸ Chantá Ajab kuticherqa: Arí, uj kanraj, paynejta Tata Diosta tapurinapaj, Imlaj churin Micaías sutiyoj. Chaywanpis payta noqa chejnini, manapuni jayk'aj allin kajta sut'inchawasqanrayku, nispa. Josafattaj nerqa: Ama jinata parlaychu, nispa.

⁹ Chantá Israelmanta kuraj kamachejqa ujnin kamachinta wajyaspa, nerqa: Imlaj churin Micaiasta usqhayllata pusamuway, nispa.

¹⁰ Israelmanta kuraj kamachej Ajabwan, Judamanta kuraj kamachej Josafatwan ima kamachinanku tiyanakunapi tiyasharqanku, kuraj kamachejkuna jina p'achallisqa Samaria llajtaman yaykuna plazapi. Diosmanta tukuy sut'inchajkunataj paykunaj ñawpaqenkupi sut'inchasharqanku.

¹¹ Chaypacha Quenanáj churin Sedequiasqa fierromanta wajrakunata ruwakusqa, chantá nerqa: Tata Dios ajinata nin: Kaykunawan siriokunata wajraspa wañurachinki, nispa.

¹² Diosmanta chay waj sut'inchajkunapis kikillantataj sut'inchasharqanku: Galaadmanta Ramotman riy, imaraykuchus Tata Diosqa yanapasonqa maqanakuspa chay llajtata jap'inaykipaj, nispa.

¹³ Pichus Micaiasta wajyaj risqa, chay kachaqa Micaiasta nerqa: Chay tukuy Diosmanta sut'inchajkunaqa Ajab atipananta uj similla ninku. Qanpis paykuna jinallataj allin kajta parlay ari, nispa.

¹⁴ Micaiastajrí nerqa: Tata Diospa sutinrayku tiluni: Imatachá pay niwanqa, chayllata noqaqa nisaj, nispa.

¹⁵ Micaías kuraj kamachejman jamojtintaj, Ajab taporqa: Micaías, Galaadmanta Ramot llajtaj contranpi maqanakoj risqaykuchu, amachu? nispa. Micaiastaj kutichispa, nerqa: Rillay, maqanakuspa chay llajtata jap'inki, imaraykuchus Tata Diosqa atipanaykipaj yanapasonqa, nispa.

¹⁶ Ajabtajrí payta nerqa: Mashkha kutitataj nisqayki Tata Diospa sutinpi cheqanta ninawaykitari? nispa.

¹⁷ Chantá Micaías nerqa: Noqaqa israelitakunata rikorqani orqo cheqanejpi ch'eqerasqata, mana michejniyoj ovejakuna jina. Tata Diostaj nerqa: Kaykunaqa mana michejniyoj kanku. Sapa ujninku wasinkuman allillanta ripuchunku, nispa.

¹⁸ Chantá Israelta kuraj kamachej Ajabqa Josafatta nerqa: Uyarinkichu? Kay runaqa mana jayk'ajpis allin kajta sut'inchawanchu, manachayqa mana allin kajllatapuni, nispa.

¹⁹ Chantá Micaías nillarqataj: Chayta nisqaykirayku Tata Diospa nisqanta uyariy ari: Noqaqa Tata Diosta rikorqani kamachinan tiyanapi tiyasqata, paña ladonpi, lloq'e ladonpiwan angelkunata ima.

²⁰ Tata Diostaj nerqa: Pitaj Ajabta ch'awkiyaspa pusanman, Galaadpi Ramot llajtaman rispa, maqanakupi wañuchisqa kananpaj? nispa. Angelkunamantataj ujnin uj jinata nerqa, ujkunataj waj jinata nerqanku.

²¹ Chantá uj espíritu Tata Diosman qayllaykuspa, nerqa: Noqa payta pusarisaj, nispa. Tata Diostaj tapurerqa: Imaynatataj chayta ruwankiri? nispa.

²² Chay espiritutaj nerqa: Noqaqa rispa, kuraj kamachejpa tukuynin sut'inchajninkunata llullata parlachisaj, nispa. Tata Diostaj nerqa: Rispa, nisqaykiman jina Ajabta q'otiyamuy. Chayta ruwaspa, pusayta atinki, nispa.

²³ Chayrayku Tata Diosqa sut'inchajniykikunata llullakunankuta nin. Paytaj ninña maqanakupi mana allin risunanta, nispa.

²⁴ Chantaqa Quenanáj churin Sedequiasqa chimpaykuytawan, Micaiasta uyanpi laq'aspa, nerqa: Maynintataj Tata Diospa Espíritun noqamanta llojserqa qanman parlasunanpajri? nispa.

²⁵ Micaiastaj kuticherqa: Maypachachus wasimanta wasi pakakuspa ayqekushanki, chaypacha yachanki, nispa.

²⁶ Chantá Israelmanta kuraj kamachejqa kamacherqa: Micaiasta jap'ispa, llajtata kamachej Amonpaman, chantá churiy Joaspamanwan presota apaychej.

²⁷ Paykunata niychej: Ajabqa kamachisunkichej kay runata carcelman wisq'aykunaykichejta, chaypitaj uj chhika t'antallawan, pisi yakullawan ima kachinaykichejta, asiriokunawan maqanakumanta atipaspa kutimunaykama, nispa.

²⁸ Micaiastajrí nerqa: Sichus maqanakupi atipaspa kutimunki chayqa, sut'i kanqa Tata Diosqa manamin noqaj simiynejtachu parlarqa, nispa.

Ajab wañun

²⁹ Chantá Israelmanta kuraj kamachej Ajabqa Judamanta kuraj kamachej Josafatwan khuska rerqanku Galaadpi Ramot llajtaj contranpi maqanakoj.

³⁰ Ajabtaj Josafatta nerqa: Noqaqa waj p'achata churakuspa maqanakoj yaykusaj. Qantajrí kikin kuraj kamachej jina p'achallaykiwan yaykuy, nispa. Chay jinaqa Israelpa kuraj kamachejnenqa waj p'achata churaykukuspa, maqanakoj yaykorqa.

³¹ Chaypacha Siriamanta kuraj kamachejqa kinsa chunka iskayniyoj carretapi purej soldadokunaj kamachejninkukunata nisqa: Ama piwanpis maqanakunkichejchu, manachayqa Israelta kuraj kamachejpa contrallanpi, nispa.

³² Chayrayku carretawan maqanakojkunaj kamachejninkukunaqa Josafatta rikuspa, nerqanku: Israelta kuraj kamachejqa kaypunichá, nispa. Chayrayku payta muyuykorqanku. Chantá Josafatqa qhaparikorqa.

³³ Chay carretawan maqanakojkunaj kamachejninkoqa mana Israelpa kuraj kamachejninchu kasqanta reparaspa, waj ladoman riporqanku.

³⁴ Siriamanta kaj uj soldadorí arcowan wayrallaman flechata kacharerqa, chaytaj Israelta kuraj kamachejpa pecheranpa tinkuyninta yaykorqa. Ajabtaj, carretanta purichejta nerqa: Kutirichiway, kaymantataj orqhoway, imaraykuchus wañuy patapiña kashani, nispa.

³⁵ Chay p'unchayqa may sinch'itapuni maqanakorqanku. Ajabrí carretanpi sayasqallapuni karqa soldadonkunawan siriokunawan maqanakushanankukama. Jinapis yawarnenqa carretanpa pampanman sut'urerqa, ch'isiyaykuynejtataj wañorqa.

³⁶ Inti yaykuytataj Israelpa soldadokuna ukhupi yachakorqa kuraj kamachej wañupusqan, chayrayku ninakorqanku: Sapa uj llajtaykichejman, wasiykichejman ima ripuychej.

³⁷ Kuraj kamachejninchejqa wañupunña, nispa. Chantá Samariaman Ajabpa ayanta apakapuspa, chaypi p'amparqanku.

³⁸ Chantá carretanta Samaria qochapi mayllarqanku, maypichus khuchi warmikuna mayllakoj kanku, chaypi, yawarnintataj alqokuna llajwarqanku Tata Diospa nisqanman jina.

³⁹ Ajab kamachishaspa tukuy imata ruwasqan, marfilmanta wasita ruwachikusqan, tukuy llajtata ruwachisqanpiwan qhelqasqa kashan Israel suyumanta kuraj kamachejkunaj ruwasqankumanta willaj qhelqapi.

⁴⁰ Ajab wañupojtintaj, churin Ocozías kamacherqa.

Josafat Judá suyuta kamachin

⁴¹ Kuraj kamachej Ajabqa Israelpi tawa watataña kamachishajtin, Asaj churin Josafatqa Judapi kamachiyta qallarerqa.

⁴² Josafat kamachiyta qallarishaspa, kinsa chunka phishqayoj watayoj karqa, Jerusalenmantapacha iskay chunka phishqayoj watata kamacherqa. Mamanqa Siljíj ususin Azura karqa.

⁴³ 43 (44) Payqa tatan Asa jina allinta purerqa, Tata Diospa ñawpaqenpi cheqanta ruwaspa. Chay tukuywanpis orqo patapi yupaychana wasikunata mana thuñicherqachu. Runakunaqa chaypi uywa ñak'asqata jaywajraj kanku, inciensotapis q'oshñichejraj kanku.

⁴⁴ 44 (45) Israelmanta kuraj kamachej Ajabwan Josafatqa uj tratota ruwarqa allinta kawsanankupaj.

⁴⁵ 45 (46) Josafat kamachishaspa tukuy ima ruwasqan, waj suyukunawan chay chhika maqanakusqan ima qhelqasqa kashan Judá suyumanta kuraj kamachejkunaj ruwasqankumanta willaj qhelqapi.

⁴⁶ 46 (47) Jinallatataj Judá suyumanta qharqorqa lanti wasikunapi khuchichakoj qharikunata, tatan Asaj tiemponmantapacha qhepakusqanku, chaykunata.

⁴⁷ 47 (48) Chaypacha Edompi mana kuraj kamachej karqachu, uj llajta kamachejlla karqa.

⁴⁸ 48 (49) Josafattaj jatuchaj barcokunata ruwacherqa Ofirman rispa qorita apamunanpaj. Chaywanpis Ezión Gueberpi chay barcokuna phirikusqankurayku, mana rerqankuchu.

⁴⁹ 49 (50) Ñawpajta Ajabpa churin Ocoziasqa Josafatta nisqa: Manachu munawaj noqaj barco purichej runaykunawan qanpa runaykikunawan khuska rinankuta? nispa. Josafattajrí mana munarqachu.

⁵⁰ 50 (51) Josafat wañupojtin, ñawpa tatan Davidpa llajtan nisqapi ayanta p'amparqanku, paypa qhepantataj churin Jorán kamacherqa.

Ocozías Israel suyuta kamachin

⁵¹ 51 (52) Judamanta kuraj kamachej Josafat chunka qanchisniyoj watataña kamachishajtin, Ajabpa churin Ocoziasqa Israel suyuta kamachiyta qallarerqa. Samaria llajtamantapacha iskay watata kamacherqa.

⁵² 52 (53) Ocoziasqa manapuni Tata Diospa munayninman jinachu ruwarqa. Tatanpa mamanpa mana allin ruwasqankuta ruwaspa, israelitakunata juchallicherqa. Nabatpa churin Jeroboanpa ruwasqantapis ruwallarqataj.

⁵³ 53 (54) Baal lantita yupaycharqa, ajinamanta Israelpa Tata Diosninta phiñachispa, imaynatachus tatanpis ruwarqa, ajinata.