1 Reyes 21 - DIOSPA QHELQACHISQ

Nabotpa huertan

¹ Jezrel llajtayoj Nabotpata Samariapi uj huertan tiyaporqa. Chay huerta karqa kuraj kamachej Ajabpa kamachinan wasi qayllapi.

² Uj kuti Ajabqa Nabotta nerqa: Wasiy qayllapi kasqanrayku, uva huertaykita qopuway chaypi tarpukunaypaj. Noqataj wajnejpi kay huertaykimanta aswan sumaj huertata qopusqayki. Munajtiykeqa, huertaj valorninta qolqeta pagapusqayki, nispa.

³ Nabottajrí Ajabman kuticherqa: Amapuni Tata Dios munachunchu tataypa qowasqan chayaqe huertata qanman qopusunaytaqa, nispa.

⁴ Chantá Ajabqa wasinman llakisqa, phiñasqataj riporqa, Jezrelmanta Nabot kay jinata payman nisqanmanta: Tataypa qowasqan huertaytaqa mana qanman qoykimanchu, nispa. Jinapi puñunanman perqa ladoman qhawarisqa siriykukorqa, manataj mikhuytapis munarqachu.

⁵ Chantá Jezabel warmenqa Ajabman qayllaykuspa, taporqa: Imamantataj chay jina llakisqa kashanki, nitaj mikhuytapis munankichuri? nispa.

⁶ Ajabtaj kuticherqa: Jezrelmanta Nabotwan parlarqani, nerqanitaj uva huertanta qopunawanta qolqepipis, chayrí munajtenqa, wajnejpi uj sumaj huertata qonayta. Paytajrí kutichiwarqa: Mana atiymanchu huertayta qopusuytaqa, nispa.

⁷ Jezabeltaj nerqa: Manachu qanqa kuraj kamachej kanki, imataj? Jatarikuy, mikhumuy, noqataj Jezrelmanta Nabotpa huertanta qosqayki, nispa.

⁸ Chantá Jezabelqa Ajabpa sutinpi cartakunata qhelqarqa, Ajabpa anillonwan sellaykuspataj, apacherqa, Nabotpa llajtanpi tiyajkunaj tukuynin kurajkunaman, kamachejkunamanwan ima.

⁹ Chay cartapi kay jinata nerqa: Ayunanapaj kamachiychej. Chantá Nabotta tukuy runaj ñawpaqenman tiyachiychej.

¹⁰ Chantá iskay runakunata mask'aychej paypa contranpi llullakuspa, ch'ataykunankupaj: Qanqa Diospa contranpi sajrata parlanki, kuraj kamachejpa contranpi ima, nispa. Chantá jawaman orqhoytawan, rumiwan ch'anqaykuspa, wañuchiychej, nispa.

¹¹ Chantá Nabotpa llajtanpi kurajkuna, kamachejkunapiwan Jezabelpa chay cartapi kamachisqanman jina ruwarqanku.

¹² Ayunaspa, chantá tantakuspa, Nabotta runakunaj ñawpaqenman tiyaykucherqanku.

¹³ Chaymantataj iskay millay runakuna jamorqanku, Nabotpa ñawpaqenpitaj tiyaykukuspa, tukuy runaj ñawpaqenpi llullakuspa Nabotta ch'ataykorqanku: Payqa Diospa contranta parlarqa, kuraj kamachejpa contrantawan, nispa. Llajtamanta jawaman aysaytawantaj, paykuna rumiwan ch'anqaspa, Nabotta wañucherqanku.

¹⁴ Chantá Jezabelman willajta kacharqanku: Nabotqa rumiwan ch'anqasqa wañun, nispa.

¹⁵ Jezabelqa Nabotpa wañusqanta uyarispa, Ajabman nerqa: Riy, Jezrelmanta Nabotpa huertanta jap'ikampuy, pay mana vendesuyta munarqachu, chayta. Imaraykuchus Nabot wañunña, nispa.

¹⁶ Ajabtaj Jezrelmanta Nabot wañusqanta yachaspa, Nabotpa uva huertanta jap'ikapoj rerqa.

¹⁷ Chantá Tata Dios Tisbemanta Eliasta nerqa:

¹⁸ Samariapi Israelmanta kuraj kamachej Ajabman riy. Payqa Nabotpa uva huertanpi kashan, chay huertata jap'ikapunanpaj rin.

¹⁹ Paytataj ninki: Tata Dios nisunki: Nabotta wañuchichispa uva huertanta qhechusqaykirayku, maynejpichus Nabotpa yawarninta alqokuna llajwarqanku, chayllapitaj yawarniykitapis alqokuna llajwanqanku, nispa.

²⁰ Eliasqa Ajabman chimpaykojtin, Ajab nerqa: Awqay kashaspapis, jamullankiñatajchu? nispa. Eliastaj kuticherqa: Arí, noqa mask'ashayki, imaraykuchus Tata Diospa ñawpaqenpi qanqa millayta ruwaspa purinki.

²¹ Chayrayku Tata Dios nisunki: Jatun llakiyta qanman chayachimusqayki, tukuy aylluykitataj chinkachisaj. Mirayniykimanta qhari kajkunata tukuchisaj Israel ukhumanta.

²² Israelitakunata juchallichispa phiñachiwasqaykirayku, qanwan ruwasaj imaynatachus ruwarqani Nabatpa churin Jeroboanpa mirayninta, Ajiaspa churin Basáj miraynintawan, ajina, nispa.

²³ Warmiyki Jezabelmantapis Tata Dios nin: Jezabelpa ayantaqa Jezrelpi alqokuna mikhonqanku.

²⁴ Qanpa aylluykimanta pikunachus llajtapi wañojkunataqa alqokuna mikhullanqankutaj, pikunachus campopi wañojkunatataj suwintukuna mikhuranqanku, nispa.

²⁵ Mana ujpis karqachu Ajab jina Tata Diospa ñawpaqenpi millay ruwanaman qokojqa, imaraykuchus Jezabel warmin paytaqa chayman tanqaykorqa.

²⁶ Payqa millaytapuni ruwarqa, amorreokuna jina lantikunata yupaychaspa. Paykunata Tata Diosqa israelitakunaj ñawpaqenkumanta wijch'usqa.

²⁷ Kuraj kamachej Ajabrí Diosmanta sut'inchajpa nisqanta jap'ikorqa. Chayrayku sinch'i llakisqa kasqanmanta yachayta qospa, p'achanta llik'ikorqa, qhashqa p'achata churakuspataj, mana imatapis mikhorqachu. Ajina qhashqa p'achayoj puñorqa, phutisqataj purerqa.

²⁸ Chantá Tata Diosqa Tisbemanta Eliasta nerqa:

²⁹ Rikunkichu Ajabqa k'umuykamuwasqanta? Mana allinta ruwasqanmanta noqaman kutirikamuwasqanrayku, kawsanankama mana nisqay llakiyta apachimusajchu. Manachayqa churin kuraj kamachej kajtin, chay llakiyta tukuy mirayninman apachimusaj, nispa.