1 Reyes 19 - DIOSPA QHELQACHISQ

Eliasqa Horebman ayqekun

¹ Ajabqa warmin Jezabelman Eliaspa tukuy ima ruwasqanta, chantá imaynatachus Baalpa tukuy sut'inchajninkunata wañurachisqanta ima willarqa.

² Chantá Jezabelqa Eliaspaman ujnin kamachinta kachaspa, nicherqa: Qanqa Baalpa sut'inchajninkunata wañucherqanki. Chayrayku sichus q'aya kunanta jina, mana qanta wañuchiyki chayqa, diosniykuna noqata wañuchiwachunku, nispa.

³ Chayta uyarispa, Eliasqa manchachikorqa, wañuchinankuta yuyaspataj ayqekorqa. Judá suyupi Berseba llajtakama chayaspataj, chaypi kamachinta saqerqa.

⁴ Chantá ch'innejman ripuspa, uj p'unchay puriyta jina rerqa. Chaypitaj retama sach'a uraman tiyaykukuytawan, wañupuyta munaspa, nerqa: Kaykamalla kachun, Tata Dios, pusakapullawayña. Noqaqa mana ñawpa tataykunamanta aswan allinchu kani, nispa.

⁵ Chantá Eliasqa retama sach'a urapi winkuspa, puñurparerqa. Chaymantataj Tata Diospa uj angelnin chimpaykuspa, nerqa: Rijch'ariy, mikhuytaj, nispa.

⁶ Eliasqa muyuyninta qhawarispa, uman qayllapi uj t'antata nina k'ajaypi chayasqata, uj yurupi yakutawan rikorqa. Mikhuykuspa, ujyaykuspataj, watej puñukapullarqataj.

⁷ Tata Diospa angelnin ujtawan kutimuspataj, nerqa: Rijch'arispa mikhuy, imaraykuchus karuraj rinaykeqa, nispa.

⁸ Puñusqanmanta rijch'ariytawantaj, Elías mikhorqa, ujyarqataj. Jinapi chay mikhusqanwan kallpachakuspa, tawa chunka p'unchayta, tawa chunka tutatawan purerqa, Diospa orqon Horebman chayanankama.

⁹ Chaypi uj chhanka jusk'uman yaykuspa, chay tuta puñorqa. Chantá Tata Dios nerqa: Elías, imata kaypi ruwashankiri? nispa.

Tata Diosqa Eliaswan parlan

¹⁰ Paytaj kuticherqa: Tukuy Atiyniyoj Tata Diosníy, noqaqa anchatapuni qanmanta sienteni, imaraykuchus israelitakunaqa paykunawan tratota ruwasqaykita wasanchaspa, altarniykita urmarachinku. Qanmanta sut'inchajkunatapis wañurachinku. Noqallaña qhepakuni. Chaywanpis noqatapis wañuchinawankupaj mask'ashawanku, nispa.

¹¹ Tata Diostaj nerqa: Llojsimuy jawaman, kay orqo patapitaj ñawpaqeypi sayay, nispa. Chantá chaypacha Tata Diosqa chaynejta pasarqa. Uj sinch'i wayra orqokunata lajraspa, chhankata urmaracherqa. Tata Diostajrí mana chay wayrapichu kasharqa. Chay wayraj qhepantataj jallp'a ikhakuy karqa. Tata Diostajrí manallataj chay jallp'a ikhakuypichu kasharqa.

¹² Chay jallp'a ikhakuypa qhepantataj nina lawrayñataj karqa. Tata Diostajrí manallataj chay nina lawraypichu karqa. Chay nina lawraj qhepantataj alliysitullamanta wayrasqan uyarikorqa.

¹³ Eliasqa chayta uyarispa, ponchon jina qhatananwan uyanta pakaykukorqa. Chay chhanka jusk'umanta llojsimuspataj, punkupi sayarqa. Chaypitaj payman parlajta uyarerqa: Elías, imata kaypi ruwashankiri? nispa.

¹⁴ Eliastaj kuticherqa: Tukuy Atiyniyoj Tata Diosníy, noqaqa anchatapuni qanmanta sienteni, imaraykuchus israelitakunaqa paykunawan trato ruwasqaykita saqerparinku. Altarniykita urmachinku, qanmanta sut'inchajkunatapis wañurachinku. Noqallaña qhepakuni. Chaywanpis noqatapis wañuchinawankupaj mask'ashawanku, nispa.

¹⁵ Chantá Tata Diosqa Eliasta nerqa: Maynintachus jamusqaykita kutirispa, Damasco ch'innejman riy. Chayman chayaspataj, Jazael sutiyoj runata Siria suyuta kamachinanpaj churanki.

¹⁶ Jinallataj Nimsij allchhin Jehutapis Israel suyuta kamachinanpaj churanki. Abel Meholamanta Safatpa churin Eliseotataj qanpa cuentaykipi Diosmanta sut'inchaj kananpaj churallankitaj.

¹⁷ Pichus Jazaelpa wañuchinanmanta ayqekojtaqa Jehú wañuchenqa, Jehúj wañuchinanmanta ayqekojtataj Eliseo wañuchenqa.

¹⁸ Chaywanpis noqaqa Israel suyupi 7.000 runakunata puchuchisaj, pikunachus Baal lantiman mana qonqorikorqankuchu, nitaj much'arqankuchu, chaykunata, nispa.

Diosqa Eliseota wajyan

¹⁹ Eliasqa chaymanta ripuspa, Safatpa churin Eliseota tarerqa. Payqa chunka iskayniyoj yuntawan llank'achisharqa, chaykunamanta ujnin yuntawantaj qhepallata risharqa. Jinallapi Eliasqa ponchon jina qhatananta Eliseoj patanman choqaykorqa.

²⁰ Chantá Eliseo chay yuntata saqerparerqa, Eliaspa qhepanta usqhayta rispataj, nerqa: Mañarikuyki ari, tatayta, mamayta saqeykamojta kacharinawaykita, chantataj qanta qhatisqayki, nispa. Eliastaj payta nerqa: Rillay, amataj qonqaychu imatachus qanwan ruwasqayta, nispa.

²¹ Chaymanta wasinman kutispataj, Eliseoqa iskay bueykunata ñak'arqa, llank'anan aradowantaj chay aychata kankaspa, tukuy runaman mikhunankupaj qorqa. Chantá Eliaswan puriyta qallarerqa, paypa kamachintaj karqa.