1 Reyes 15 - DIOSPA QHELQACHISQ

Abián Judá suyuta kamachin

¹ Nabatpa churin Jeroboán chunka pusajniyoj watataña Israel suyupi kamachishajtin, Abián Judapi kamachiyta qallarerqa.

² Kamacherqataj Jerusalenpi kinsa watata. Mamanqa Abisalompa ususin Macá sutiyoj karqa.

³ Payqa tatanpa ruwasqan kikin juchallatataj ruwarqa, paypa sonqontaj Tata Dioswan mana cheqanchu karqa, imaynachus ñawpa tatan Davidpata karqa, jina.

⁴ Chaywanpis Tata Diosqa kamachin Davidta munakusqanrayku, paypa mirayninmanta kamachinan tiyanaman tiyaykucherqa, jinataj Jerusalén llajtata waqaycharqa.

⁵ Chayta ruwarqa imaraykuchus Davidqa Tata Diospa ñawpaqenpi cheqanta ruwasqa. Wañupunankama Tata Diospa nisqanmanta mana karunchakusqachu, manachayqa jitita Uriasta wañuchichispa, juchallikusqallan karqa.

⁶ Roboanwan, Jeroboanwanqa tukuy tiempo maqanakuspallapuni karqanku.

⁷ Jinallataj Jeroboanwan, Abianwanpis tukuy tiempo maqanakuspallapuni karqanku. Abián kamachishaspa wakin ruwasqan, tukuy ima ruwasqanpiwan, qhelqasqa kashan Judá suyumanta kuraj kamachejkunaj ruwasqankumanta willaj qhelqapi.

⁸ Abián wañupojtintaj, Davidpa llajtan nisqapi ayanta p'amparqanku, Chantá cuentanmantataj churin Asa kamacherqa.

Asa Judá suyuta kamachin

⁹ Jeroboán iskay chunka watataña Israel suyupi kamachishajtin, Judá suyupi Asa kamachiyta qallarerqa.

¹⁰ Jerusalenmantapacha tawa chunka ujniyoj watata kamacherqa. Jatun mamantaj Abisalompa ususin Macá sutiyoj karqa.

¹¹ Tata Diospa ñawpaqenpi Asaqa cheqanta ruwarqa, jatun tatan David jina.

¹² Payqa Judá suyumanta chay lantikuna yupaychana wasikunapi khuchichakoj tukuy qharita wijch'orqa. Wijch'ullarqataj ñawpa tatankunaj tukuy lanti ruwasqankuta.

¹³ Ajinallatataj jatun maman Macatapis qoya kayninmanta orqhoporqa, k'ullumanta Asera lantita ruwachisqanrayku. Asaqa chay lantita phirispa, Cedrón wayq'opi ruphaykucherqa.

¹⁴ Loma patapi altarkunataqa mana phirerqachu. Chaywanpis Asaqa wañupunankama Tata Diosta mana wasancharqachu.

¹⁵ Tatan jinataj paypis imakunatachus Tata Diospaj t'aqasqanku, chay tukuyta Tata Diospa Templonman churaykaporqa: Qorita, qolqe metalta, tukuy imaymana k'acha imakunatawan.

Asaqa Ben Adadwan uj tratota ruwan

¹⁶ Israelta kuraj kamachej Basawan Asawanqa tukuy tiempo maqanakuspallapuni karqanku.

¹⁷ Jinapi Israel suyumanta kuraj kamachej Basaqa Judáj contranpi maqanakoj jamorqa. Ramá llajtata jap'ispataj, jark'aykucherqa ama pipis Asaj kamachisqan suyuman yaykunanpaj nitaj pipis chaymanta llojsinanpaj.

¹⁸ Chay ajina kasqanta yachaytawan, Asaqa Tata Diospa Templonpi kaj qorita, qolqe metalta ima jap'ispa, Damasco llajtaman kamachinkunanejta apacherqa. Chaypi Siriamanta Tabrimonpa churin, Hezionpa allchhin kuraj kamachej Ben Adad tiyakusharqa. Chantá Ben Adadta nicherqa:

¹⁹ Qanwan, noqawan tratota ruwanachej, imaynatachus qanpa tataykiwan noqaj tataywan tratota ruwarqanku, ajinata. Qolqe metalta, qoritawan uj t'inkata jina apachimushayki Israel suyumanta kuraj kamachej Basawan ruwasqayki tratota p'akinaykipaj. Ajinamanta pay noqamanta karunchakonqa, nispa.

²⁰ Ben Adadqa kuraj kamachej Asaj nisqanta uyarikorqa, Israel suyoj contranpitaj soldadokunaj kamachejninkunata kacharqa. Paykunataj maqanakuspa, kay llajtakunata jap'erqanku: Iyonta, Danta, Abel Betmacatawan, tukuynin Cineretta, tukuynin Neftalí jatun aylloj jap'iynintawan.

²¹ Basataj chayta yachaspa, Ramá llajtata manaña perqacherqañachu, Tirsamantaj kutiporqa.

²² Chantá kuraj kamachej Asaqa Judá suyumanta tukuy runata wajyacherqa, Ramaman riytawantaj, phaskaraspa rumikunata, k'aspikunatawan apakamporqanku, imawanchus Basaqa Ramá llajtata perqachisharqa, chay tukuyta. Asataj chaykunawan Benjaminpi Geba llajtata, Mispatawan sayacherqa.

Asa wañupun

²³ Asa kamachishaspa wakin ruwasqan, tukuy atiynin, imatachus ruwasqan, llajtakunata ruwachisqan imaqa Judá suyumanta kuraj kamachejkunaj ruwasqankumanta willaj qhelqapi qhelqasqa kashan. Machuyayninpitaj chakinmanta onqoykorqa.

²⁴ Chantá Asa wañuporqa, runankunataj ayanta ñawpa tatan Davidpa llajtan nisqapitaj p'amparqanku. Chaymantataj churin Josafat cuentanmanta kamacherqa.

Nadab Israel suyuta kamachin

²⁵ Judá suyupi kuraj kamachej Asa iskay watataña kamachishajtin, Jeroboanpa churin Nadabqa Israel suyupi kamachiyta qallarerqa, iskay watataj kamacherqa.

²⁶ Payqa mana Tata Diospa munasqanman jinachu ruwarqa. Tatan jina juchallikuspa israelitakunatapis juchallicherqa.

²⁷ Chantá Isacar jatun ayllumanta Ajiaspa churin Basaqa Nadabpa contranpi oqharikorqa, Basataj Gibetonpi Nadabta wañucherqa. Chayqa filisteokunaj llajtanku karqa, Nadabtaj tukuynin israelitakunawan Gibetonta muyuykusqanku.

²⁸ Judá suyumanta kuraj kamachej Asa kinsa watataña kamachishajtin, Basaqa Nadabta wañucherqa. Chantá paypa qhepanpi kamacherqa.

²⁹ Kamachiyta qallarishaspa, Basaqa Jeroboanpa ayllunmanta kajkunata tukuyninkuta wañuracherqa, Diosmanta sut'inchaj Silomanta Ajiasnejta Tata Diospa parlasqanman jina.

³⁰ Chay karqa, Jeroboán juchallisqanrayku, chantá israelitakunata juchallichisqanrayku. Ajinamanta Jeroboanqa Israelpa Tata Diosninta phiñachisqa.

³¹ Nadab kamachishaspa wakin ruwasqan, tukuy ima ruwasqanpiwan qhelqasqa kashan Israel suyumanta kuraj kamachejkunaj ruwasqankumanta willaj qhelqapi.

³² Asawan, Israelta kuraj kamachej Basawanqa tukuy tiempo maqanakullapipuni karqanku.

Basá Israel suyuta kamachin

³³ Judá suyumanta kuraj kamachej Asa kinsa watataña kamachishajtin, Ajiaspa churin Basaqa Tirsa llajtapi tukuynin Israel suyuta kamachiyta qallarerqa, iskay chunka tawayoj watatataj kamacherqa.

³⁴ Payqa mana Tata Diospa munayninman jinachu ruwarqa. Jeroboanpa millay ruwasqan jinallataj ruwaspa, israelitakunata juchallicherqa.