1 Reyes 13 - DIOSPA QHELQACHISQ

Diosmanta sut'inchajqa Jeroboanta k'amin

¹ Jeroboanqa chay altarpi inciensota q'oshñichinan kashajtin, Tata Diospa kachamusqan sut'inchaj uj runa Judá suyumanta Betelman chayamorqa.

² Paytaj Tata Diospa kamachisqanrayku altarpa contranpi qhaparerqa: Altar, altar, Tata Dios ajinata nin: Davidpa mirayninmanta uj wawa Josías sutiyoj paqarikonqa. Orqo patapi kaj yupaychana wasikunapi sacerdotekuna kayman jamuspa, pataykipi inciensota q'oshñichinku. Chay Josiasrí qanpa pataykipi paykunata ñak'aspa, tullunkukunata chaypi ruphachillanqataj, nispa.

³ Chaypachallataj Diosmanta sut'inchajqa nerqa: Tata Dios cheqantapuni parlasqanmanta kaymin señal kanqa: Kay altarqa thuñikonqa, patanpi ushphapis qhallikonqa, nispa.

⁴ Diosmanta sut'inchaj Betelpi altarpa contranta parlasqanta uyarispa, kuraj kamachej Jeroboanqa altarmantapacha makinta oqharispa, kamacherqa: Payta presochaychej, nispa. Chantá sut'inchajpa contranpi Jeroboán makinta oqharishajtin, makenqa kikinpi ch'akiykorqa, manañataj oqharikusqanmanta makinta aysayta aterqachu.

⁵ Jinallapi altarpis thuñikullarqataj, patanpi ushphapis qhallikorqa. Tata Diosmanta sut'inchaj runaj nisqanman jina chay junt'akorqa.

⁶ Chantá kuraj kamachej Jeroboanqa Diosmanta sut'inchajta nerqa: Mañakuyki Tata Diosniykimanta mañapunawaykita kay makiy qhaliyapunanpaj, nispa. Diosmanta sut'inchajtaj Tata Diosmanta mañarqa, kuraj kamachejpa makintaj qhaliyaporqa.

⁷ Chantá kuraj kamachejqa Diosmanta sut'inchajta nillarqataj: Jaku wasiyman mikhumunaykipaj, noqataj uj t'inkata qosqayki, nispa.

⁸ Diosmanta sut'inchajrí kuticherqa: Wasikiykipi kajmanta khuskanninta qowankiman chaypis, manapuni qanwanqa riymanchu. Kay cheqapeqa mana t'antata mikhusajchu nitaj yakutapis ujyasajchu,

⁹ imaraykuchus Tata Diosqa ajinata kamachiwarqa: Ama chaypi mikhunkichu, nitaj yakutapis ujyankichu, nitaj risqayki, chay ñanllatataj kutimpunkichu, nispa.

¹⁰ Jinataj Diosmanta sut'inchajqa waj ñannejta kutiporqa, manataj Betel llajtaman jamusqan ñannejtachu.

¹¹ Chaypachaqa Betel llajtapi uj machu runa Diosmanta sut'inchaj tiyakorqa, churinkunataj payman willarqanku, Judá suyumanta Diosmanta sut'inchaj runa Betel llajtapi imatachus ruwasqanta. Willallarqankutaj imakunatachus kuraj kamachejman nisqantapis.

¹² Tatankutaj nerqa: Mayqen ñannejtataj ripunri? nispa. Churinkunataj rikucherqanku, Judá suyumanta Diosmanta sut'inchaj mayqen ñantachus ripusqanta.

¹³ Jinapi payqa churinkunata nerqa: Burrota caronapuwaychej, nispa. Paykunataj uj burrota caronaykorqanku. Paytaj lloq'aykuytawan,

¹⁴ Diosmanta sut'inchajpa qhepanta kachaykukorqa. Chantá uj encina nisqa sach'a urapi tiyashajta taripaspa, nerqa: Qanchu kanki Judamanta jamoj Diosmanta sut'inchajqa? nispa. Paytaj nerqa: Arí, noqa kani, nispa.

¹⁵ Chantá Betel llajtamanta Diosmanta sut'inchajqa nerqa: Jaku wasiyman, imallatapis mikhurimunki, nispa.

¹⁶ Judá suyumanta Diosmanta sut'inchajrí nerqa: Qanwan kutiytaqa mana atiymanchu, nitaj kay cheqapeqa imatapis mikhuymanchu, nitaj yakutapis ujyaymanchu.

¹⁷ Tata Dios niwarqa: Jaqaypeqa ama t'antata mikhunkichu, nitaj yakutapis ujyankichu, nillataj kutimunkichu risqayki ñanllatatajqa, nispa.

¹⁸ Machu runatajrí nerqa: Noqapis qan jina Diosmanta sut'inchajllataj kani, Tata Diospa uj angelnintaj kamachiwan: Rispa, Diosmanta sut'inchajta wasiykiman pusamuy mikhunanpaj, ujyananpaj, nispa. Chaywanpis machu runaqa llullakushasqa.

¹⁹ Chantá paywan khuska wasinman kutimuspa, Judá suyumanta Diosmanta sut'inchajqa t'antata mikhorqa, yakutapis ujyarqa.

²⁰ Ajinallapi paykuna mikhushajtinku, Tata Diosqa pichus kutichimorqa, chay sut'inchaj machu runaman uj willayta nerqa.

²¹ Chantá Judamanta Diosmanta sut'inchaj machu runaqa jatunmanta qhaparispa, nerqa: Qanqa Tata Diospa kamachisqanta mana kasorqankichu nitaj junt'arqankichu.

²² Manachayqa kutirispa, t'antata mikhorqanki, yakutapis ujyarqanki, Tata Dios may cheqapichus mana mikhunaykita nitaj ujyanaykitapis nisorqa, chaypi. Chayrayku kunanqa ayaykipis mana tataykikunaj covachanpichu p'ampasqa kanqa, nispa.

²³ Judá suyumanta Diosmanta sut'inchaj mikhuyta, ujyaytapis tukojtin, chay machu runaqa burronta caronaykaporqa.

²⁴ Chantá Judá suyumanta sut'inchaj purirerqa. Ñanpi purishajtintaj, uj león wañurparicherqa. Ayanqa ñan patapi wijch'urayasharqa, burrowan, leonwantaj ayaj ladonpi kasharqanku.

²⁵ Jinapi ñanta purejkunaqa ayata wijch'usqata rikorqanku, leontapis wañusqaj ladonpi kashajta. Jinataj, maypichus Diosmanta sut'inchaj tiyakorqa, chay llajtaman chayaspa, rikusqankuta willarqanku.

²⁶ Ñanmanta kutichimojtaj chay jinata uyarispa, nerqa: Chayqa Judá suyumanta mana kasukoj Tata Diosmanta sut'inchaj. Tata Diosqa leonman jaywaykorqa payta wañuchinanpaj. Ajinata Tata Diospa nisqan junt'akorqa, nispa.

²⁷ Chantá machu runaqa churinkunata nerqa: Uj burrota caronaykapuwaychej, nispa. Paykunataj burrota caronaykorqanku.

²⁸ Rispataj, payqa ñanpi chay uj sut'inchajpa ayanta wijch'urashajta tariparqa. Leonwan, burrowantaj chay ayaj qayllanpi kasharqanku, manataj leonqa wañusqata mikhusqachu, nillataj burrotapis imanasqachu.

²⁹ Chantá Judá suyumanta jamoj Diosmanta sut'inchajpa ayanta burropi Betel llajtaman apamorqa, mayta waqarikuspa p'ampananpaj.

³⁰ Ayata covachaman p'ampaykuspataj, waqarqa: Ay, wawqéy, nispa.

³¹ Chay wañusqata p'ampaykojtinku, Diosmanta sut'inchaj machu runaqa churinkunata nerqa: Noqa wañupojteyqa, maypichus p'ampasqa kashan Judá suyumanta Diosmanta sut'inchaj, chayllamantaj p'ampaykuwankichej, tulluytapis paypa tulluntawan khuska churapuwankichej.

³² Paynejta Tata Diospa Betel llajtapi altarpa contranta nisqanqa junt'akunpuni. Jinallataj Samaria llajtapi loma patapi yupaychana wasikunaj contranpiwan nisqanqa junt'akullanqataj, nispa.

³³ Chay tukuywanpis Jeroboanqa mana allin ruwanata mana saqerqachu. Astawanpis watejmanta mana levitakunallamanta sacerdotekunata churallarqataj. Chay loma pata altarkunapaj, pitachus munasqallanta sacerdote kanankupaj churarqa.

³⁴ Ajinata ruwaspa Jeroboanqa mirayninta juchallicherqa, chayraykutaj aswan qhepaman tukuy ayllun wañuchisqa karqanku.