1 Reyes 12 - DIOSPA QHELQACHISQ

Israel suyoqa iskayman t'aqakun

¹ Roboanqa Sichem llajtaman rerqa, tukuynin israelitakunataj payta kuraj kamachejta jina churanankupaj, chay llajtaman tantakorqanku.

² Nabatpa churin Jeroboanrí Egiptopi kashaspa, chayta yuyarerqa. Payqa Salomonmanta ayqekuspa chaypi tiyakushasqa.

³ Tukuy israelitakuna Jeroboanman sayasqa kajkunaqa payta wajyachimorqanku, jinataj paywan tantaykukuspa, Roboanwan kay jinata parlaj rerqanku:

⁴ Tataykeqa sinch'i ruwanaman churawarqayku. Kunanqa qan pisiyarichiy ari chay jina sinch'i ruwanata, chay chhika llasa yugota jina pataykuman churawasqaykumanta, noqaykutaj qanpa kamachiykipi kasqayku, nispa.

⁵ Chantá Roboanqa paykunata nerqa: Kunanqa ripullaychej, kaymanta kinsa p'unchaymantaj kutimunkichej, nispa. Chantá paykunaqa riporqanku.

⁶ Chaymanta kuraj kamachej Roboanqa, pikunachus tatan Salomonta yanaparqanku, chay kurajkunata tapurerqa: Imaynatataj qankuna yuyaychawankichejman kay runakunaman kutichinaypaj? nispa.

⁷ Paykunataj kay jinata kuticherqanku: Sichus k'acha kuraj kamachej jina paykunata yanapawaj, k'achatataj parlaykuwaj chayqa, paykunaqa wiñaypaj qanpa kamachiykipi kanqanku, nispa.

⁸ Chaywanpis Roboanqa kurajkunaj umachasqankuta mana kasorqachu. Aswanpis payqa, pikunachus paywan khuska wiñarqanku, paytataj yanaparqanku, chay waynuchukunata umachanankuta mañakorqa:

⁹ Imaynatataj yuyaychawankichej kay runakunaman kutichinaytari? Paykunaqa kay jinata niwanku: Pisiyachiy ari, tatayki chay chhika llasa yugota jina noqaykuman churawasqaykuta, nispa.

¹⁰ Chantá chay paywan khuska wiñaj waynuchukunaqa kuticherqanku: Pikunachus nisunku: Tataykeqa noqaykuman anchata yapaykuwarqayku ashkha ruwanata llasa yugota jina, qantaj pisiyarichiy ari, nispa, chaykunaman kay jinata ninki: Makiypa sullk'a ruk'ananqa tataypa ñañu wasanmanta aswan rakhuraj.

¹¹ Tatayqa llasa yugota jina churasorqachej. Noqatajrí astawanraj yapaykusqaykichej. Sichus tatay seq'onawan seq'osorqachej chayqa, noqaqa puntanpi titi bolayoj seq'onawan seq'osqaykichej, nispa.

¹² Israelitakunaqa imaynatachus kuraj kamachej Roboán nisqanman jina, kinsa p'unchayman kutimorqanku, Jeroboanpis paykunawan khuska kutimullarqataj.

¹³ Kuraj kamachejtaj kurajkunaj yuyaychasqankuta qhesachaspa, sinch'i simiwan israelitakunaman kuticherqa.

¹⁴ Imaynatachus chay waynuchukuna umachasqankuman jina kuticherqa: Tatayqa sinch'i ruwanaman churasorqachej, noqatajrí astawanraj yapaykusqaykichej. Tatayqa seq'onawan seq'osorqachej, noqatajrí puntanpi titi bolayoj seq'onawan seq'osqaykichej, nispa.

¹⁵ Ajinamanta kuraj kamachej Roboanqa runakunaj mañakusqankuta mana uyarerqachu, imaraykuchus Tata Diospuni ajina kananta nisqa, Tata Dios Silomanta Ajiasnejta Nabatpa churin Jeroboanman imatachus nisqan junt'akunanpaj.

¹⁶ Tukuy runaqa kuraj kamachej paykunata mana uyariyta munasqanta reparaspa, nerqanku: Davidwan mana imapis ruwananchej kanchu. Yeséj churinwanqa mana ima chayaqenchejpis kanchu. Israelitakuna, wasiykichejman ripuychej. Davidpa ayllonqa ayllullanpi kamachichun, nispa. Jinaspa, israelitakunaqa wasinkuman riraporqanku.

¹⁷ Roboantaj Judá suyupi tiyakoj israelitakunallata kamacherqa.

¹⁸ Chaymantataj kuraj kamachej Roboanqa mit'api ruwajkunata qhawaj Adoranta Israel suyuman kacharqa. Chaypi tiyakoj israelitakunarí rumiwan ch'anqaykuspa, payta wañucherqanku. Chayta uyariytawan, Roboanqa carretanman wicharispa, usqhayllata Jerusalenman ayqekorqa.

¹⁹ Ajinamanta Israelqa Davidpa mirayninmanta t'aqakaporqa kunankama.

²⁰ Chantá tukuynin israelitakunaqa Jeroboán kutimusqanta yachaytawan, tantaykukorqanku, chayman payta wajyachimuspataj, Israel suyupi kamachinanpaj churarqanku. Ni uj ayllupis Davidpa ayllunta qhatejqa karqachu, manachayqa Judá jatun ayllumanta kajkunalla.

²¹ Roboantajrí Jerusalenman jamuspa, Judá jatun ayllumanta, Benjamín jatun ayllumantawan 180.000 runakunata ajllaspa, maqanakunanpaj tantaykorqa. Paykunaqa Israel suyoj contranpi maqanakoj riyta yuyarqanku, ajinamanta tukuynin suyuta Salomonpa churin Roboanman kutichimunankupaj.

²² Chantá Tata Diosqa nisqanta willaj runa Semaiasta nerqa:

²³ Judáj kuraj kamachej Salomonpa churin Roboanman, Judamanta Benjaminpamanta kajkunamanwan, chantá chay wakin runakunamanwan kay jinata niy:

²⁴ Tata Dios ajinata nisunkichej: Ama israelita wawqeykichejkunaj contrankupi maqanakoj riychejchu. Sapa ujniykichej wasiykichejman kutipuychej, imaraykuchus kaytaqa noqapuni ruwani, nispa. Paykunataj Tata Diospa nisqanta kasuspa, wasinkuman kutiporqanku.

Jeroboán lantikunata ruwachin

²⁵ Israelta kuraj kamachej Jeroboanqa Efraín orqopi Sichem llajtata watejmanta sayacherqa, chaypitaj tiyakorqa. Chaymanta Penuel llajtatañataj watejmanta sayachillarqataj.

²⁶ Jeroboantaj sonqonpi nerqa: Davidpa ayllunmanta kajkunaqa watej kamachina suyuta jap'inkuman,

²⁷ sichus sapa kuti kay kamachisqay runakuna Jerusalenpi Tata Diospa Templonpi uywa ñak'asqata Tata Diosman jaywamoj renqanku chayqa. Jinapi kay runakunaqa Judamanta kuraj kamachej Roboanman k'askapunkuman, noqata wañuchiwaspataj, kuraj kamachej Roboanman kutiripunkuman, nispa.

²⁸ Chayrayku yuyaychajninkunawan parlarikuspa, qorimanta iskay waka uña lantikunata ruwacherqa. Chantá israelitakunata nerqa: Ashkha kutitaña qankuna Jerusalenman rinkichej. Kaykunamin Egiptomanta orqhomoj diosniykichejkunaqa, nispa.

²⁹ Chantá ujnin waka uñata Betel llajtaman churarqa, ujtataj Dan llajtaman.

³⁰ Chay jawa israelitakunaqa Betelkama chantá Dankama chay lantita yupaychaj rispa, Diospa contranpi juchallerqanku.

³¹ Jeroboán ruwachillarqataj loma patapi yupaychana wasikunata, chantá mana levitakuna kajkunamanta sacerdotekunatapis churallarqataj.

³² Chantá Jeroboanqa pusaj kaj killapi, chunka phishqayoj p'unchay kajpi kamacherqa Betelpi uj raymita ruwanankuta, imaynatachus jatun raymita Judapi ruwaj kanku, ajinata. Jinataj altar patapi waka uña lanti ruwasqaman uywa ñak'asqata jaywarqa. Kamachillarqataj loma patapi yupaychana wasikunata ruwachisqanpaj sacerdote kanankuta.

³³ Pusaj kaj killapi, chunka phishqayoj p'unchayta, Betelpi altarta ruwachisqa, chay patapitaj uywa ñak'asqata jaywarqa. Payllamanta qhawarispa, chay killapi israelitakunapaj raymita ruwarqa, pay kikintaj altarpi inciensota q'oshñicherqa.