1 Pedro 5 - DIOSPA QHELQACHISQ

Iglesiapi kurajkunapaj yuyaychaykuna

¹ Kunanqa iglesiapi kurajkunata yuyaychariyta munani, paykuna jina noqapis iglesiapi kurajllataj kashaspa. Noqaqa Cristo imaynatachus ñak'arisqanta rikorqani, jinataj Cristoj jatun kaynin tukuy kay pachapi rikuchikojtin, noqapis chaypi qankunawan kasaj.

² Qankuna tropata michiychej, pikunatachus Dios qhawanaykichejpaj makiykichejman churarqa, chaykunata. Tukuy sonqomanta paykunata qhawaychej, imaynatachus Dios munasqanman jina, ama tanqasqa jinallachu. Amataj qolqeta mask'aspachu paykunata qhawaychej, manachayqa Tukuyta Kamachej Jesucristoj kamachisqanta ruwayta munasqaykichejrayku.

³ Qhawanaykichejpaj churasqa kashanku, chaykunataqa ama qankunajtapis kankuman jinachu qhawaychej. Manachayqa qankuna k'achata kawsaychej, qankuna jinallataj paykunapis k'achata kawsanankupaj.

⁴ Chantá Kuraj Kaj Michej kutimuspa, payqa wiñaypaj jatunchasqa kanata pilluta jina qosonqachej.

⁵ Jinallataj waynakuna, qankunapis iglesiapi kurajkunawan k'umuykukoj sonqo kaychej. Chantá tukuy wawqe panakuna purajmanta kasunakuspa, llamp'u sonqo kaychej, imaraykuchus Diospa Qhelqachisqanpi nin: Diosqa runaykachajkunaman sayaykun, llamp'u sonqoyojkunatataj k'acha kayninwan yanapan, nispa.

⁶ Chayrayku Tukuy Atiyniyoj Diospa makinpi kaspa k'umuykuychej, paytaj qankunata jatunchana p'unchay chayamojtin, qankunata jatunchaspa pataman oqharisonqachej.

⁷ Imamantachus phutikushankichej, tukuy chayta Diosman saqepuychej, imaraykuchus payqa qankunamanta qhawashan.

⁸ Jinallataj allin yuyayniyoj jina, allinta qhawakuspa puriychej, imaraykuchus awqaykichej Kuraj Supayqa phiña león jina qhaparirispa, muyuykachashasunkichej, mayqellantapis oqoykunanpaj.

⁹ Diospi atinikusqaykichejpi sinch'ita sayaspa, Supayman sayaykuychej. Yachankichej jina, tukuy kay pachapi Diosta qhatej masiykichejkunapis qankuna jinallataj ñak'arispa kashanku.

¹⁰ Chantá qhasilla k'acha yanapayninta qoj Diosqa pisi p'unchaykunata ñak'arisqaykichejmanta qhepaman wiñay tukusqata ruwasonqachej. Jinallataj thuruyachisonqachej, kallpachasonqachej, chantá sayachisonqachej ima, imaraykuchus paymin Jesucristonejta wajyasorqachej jatun kayninpa lliphipiyninpi kawsanaykichejpaj.

¹¹ Paypaj kachun kamachina tukuy atiy wiñaypa wiñayninkama. Ajina kachun.

Cartaj tukukuynin

¹² Noqa kay pisillata Silvanowan qhelqachimushaykichej, pitachus Diosta kasuspa qhatejta jina qhawani, chaywan. Kay cartanejta sonqoykichejta oqhariyta munani, chantá sut'inta niykichej imachus qhatirisusqaykichejqa Dios qhasilla k'acha yanapayninpi munasqanrayku kasqanta. Chayrayku ari chaypi sinch'ita sayaychej.

¹³ Babiloniapi kaj iglesia, pikunachus qankunawan khuska Diospa ajllakusqan kanku, chaykuna napaykamusunkichej. Jinallataj waway Marcospis napaykullasunkichejtaj.

¹⁴ Puraj tukuy sonqo munakuywan napaykunakuychej. Kay cartata tukuspa, kayta niykichej: Jesucristoman ujchasqa tukuy kajkunaqa sonqo tiyaykusqa kawsakuychej.