1 Pedro 3 - DIOSPA QHELQACHISQ

Qhari warmi imaynatachus kawsananku

¹ Jinallataj warmikuna, sapa ujpis qosaykichejwan k'umuykukoj sonqoyoj kaychej. Ajinamanta Jesusmanta sumaj willayta mana jap'ikuyta munaj qosakunaqa Diosman kutirikuyta munanqanku, mana parlasqaykichejta uyarispachu, manachayqa qankunaj allin purisqaykichejta rikusqankurayku.

² Paykuna rikonqanku allin ruwasqaykichejta, chantá qosaykichejta manchay respetowan qhawayta yachaj kasqaykichejta ima.

³ Ama anchata k'achanchakuyta munaychejchu, may jinata umaykichejta t'ikanchaspa, nitaj ancha valorniyoj jaluchukunata churakuspa, nillataj may jina precioyoj p'achata churakuspa.

⁴ Manachayqa sumaj llamp'u sonqo kaywan, chantá k'acha sonqo kaywan ima sonqoykichejta k'achanchaychej. Chay jina k'achanchakoyqa mana chinkapunchu, chaytaj Diospa ñawpaqenpi may jatunpaj qhawasqa.

⁵ Ñawpajtapis Diospi atinikoj warmikunaqa ajinata k'achanchakoj kanku, sapa ujpis qosankuman k'umuykukoj sonqo kaspa.

⁶ Sarapis qosan Abrahamta kasuspa, nej: Wiraqochíy, nispa. Sichus qankuna mana manchachikuspa allin kajta ruwankichej chayqa, cheqatapuni Saraj ususinkuna kasqaykichejmanta yachayta qoshankichej.

⁷ Ajinallatataj qosakuna sapa ujpis warmiykichejwan kawsakuychej, jatun respetowan paykunata qhawakuspa. Paykunata maypaj qhawaychej, imajtinchus paykuna mana qhari jina kallpayojchu kanku chaypis, qankuna jinallataj paykunapis Diospa qosqan mosoj kawsayta jap'enqanku. Ajinatachus ruwankichej chayqa, Dios mañakusqaykichejta uyarisonqachej.

Jesucristota qhatejkuna imachus ruwananku

⁸ Ajinaqa tukuyniykichej uj sonqolla kaychej. Ujkuna ujkuna khuyarinakuychej, Jesucristota qhatejkunapurataj q'ayachanakuspa kawsakuychej. Jinallataj allin sonqoyoj kaychej, chantá llamp'u sonqo ima.

⁹ Ama sajramanta sajrallatataj kutichiychejchu. Runa turiyajtinkupis ama kikillantataj ruwaychejchu. Manachayqa allin kajta munapuspa kutichiychej, imaraykuchus Diosqa chaypaj wajyasorqachej, paytaj ajinata ruwasqaykichejmanta saminchasonqachej.

¹⁰ Diospa Qhelqachisqanpi nin: Sichus pipis kusisqa kawsayta munan, jinallataj kusiy kawsayta rikuyta munan chayqa, mana allin kajta parlananmanta allinta qhawakuchun, nillataj llullakuchunchu.

¹¹ Chantá mana allin kajta ruwayta saqespa, allin kajta ruwachun. Wajkunawan allinpi kawsakuyta mask'achun, allillanpipuni kawsakunanpajtaj sonqonta churachun.

¹² Tukuyta Kamachej Diosqa cheqanta ruwaspa purej runakunata qhawashan, paykunaj mañakusqankutataj uyarin. Aswanpis Tukuyta Kamachej Diosqa mana allin kajta ruwajkunaj contranpi kashan, nispa.

¹³ Sichus tukuy sonqo allin kajta ruwankichej chayqa, ni pi imanasonqachejchu.

¹⁴ Sichus cheqanta ruwasqaykichejrayku ñak'arichisqa kankichej chayrí, may jina kusikuyniyojmin kankichej. Chayrayku, pikunachus ñak'arichisojkunata ama manchachikuychejchu, nitaj phutikuychejchu.

¹⁵ Manachayqa sonqoykichejpi Cristota Tukuyta Kamachejniykichejta jina mayta jatunchaychej. Jinataj wakichisqapuni kaychej, Diospi atinikuspa imatachus suyakushasqaykichejmanta sut'ita kutichinaykichejpaj. Pikunachus yachayta munajkunaman tapusqankuman jina llamp'u sonqowan kutichiychej, paykunata respetowan qhawaspa.

¹⁶ Chantapis sonqoykichej mana juchachasunaykichejpaj allintapuni puriychej. Ajinamanta pikunachus allinta purisqaykichejrayku qankunapaj mana allinta parlajkuna p'enqachisqa kanqanku, Cristota qhatispa allinta purisqaykichejmanta qhasi manakajta parlasqankurayku.

¹⁷ Aswan walej, allinta ruwasqaykichejrayku ñak'arinaykichejqa, Diospa munaynin ajina kajtenqa, manataj mana allin kajta ruwasqaykichejraykuchu.

¹⁸ Cristopis juchanchejrayku wiñaypaj uj kutillata ñak'arerqa. Pay mana juchayojchu karqa. Chaywanpis juchasapakunarayku wañorqa, Tata Diosman pusanasuykichejpaj. Cheqapuni payqa runa jina wañuchisqa karqa, Santo Espiritunejtataj kawsarichisqa karqa.

¹⁹ Chaymantataj payqa wisq'asqa kashaj sajra angelkunaman atipasqanmanta willaj rerqa.

²⁰ Chaykunaqa unay Diosta mana kasorqankuchu, maypachachus Noé jatun barcota ruwashajtin Diosqa jatun pacienciawan suyasharqa, chaypacha. Chay jatun barcopitaj, pusaj runalla yakupi jeq'eqaspa wañunamanta qhespichisqa karqanku.

²¹ Chay tukoyqa bautismowan ninakun. Bautismoqa mana ukhunchejpa ch'ichinta mayllanchu. Aswanpis noqanchej chaynejta Diospa ñawpaqenpi llimphu sonqo kayta munasqanchejta nishanchej. Kunantaj Diosqa Jesucristoj kawsarimpusqannejta qhespichiwanchej.

²² Jesucristoqa janaj pachaman ripunña, chaypitaj Diospa pañanpi tiyasqa kashan. Paytaj tukuy angelkunata, kamachejkunata, chantá atiyniyojkunata ima kamachishan.