1 Pedro 1 - DIOSPA QHELQACHISQ

Pedro napaykun

¹ Noqa, Pedro, Jesucristoj kachan kay cartata qhelqaspa apachimuykichej, Diospa ajllakusqankuna pikunachus Pontopi, Galaciapi, Capadociapi, Asiapi, chantá Bitiniapi ima waj llajtayoj jina tiyakushankichej, chaykunaman.

² Tata Diosqa qankunata ñawpajmantapacha ajllakusorqachej, wakichisqanman jina Santo Espiritunejta qankunata juchamanta t'aqaspa. Payqa Jesucristota kasunaykichejpaj churasorqachej, Jesucristo cruzpi wañusqanraykutaj llimphuchasqa kanaykichejpaj. Kunantaj napaykuykichej: Diosqa qhasilla k'acha yanapayninta, chantá sonqo tiyaykuyta ima qankunaman qochun, nispa.

Mana qhasitachu suyakushasqankuta yachaspa, kusikunku

³ Yupaychasqa kachun Tukuyta Kamachej Jesucristonchejpa Tatan Dios. Payqa jatun khuyakuyninrayku watejmanta paqarichiwarqanchej, Jesucristota wañusqamanta kawsarichisqannejta. Chayrayku kunan mayta suyakushanchej

⁴ Dios mana ismoj, mana ch'ichichasqa, nitaj chinkapoj chayaqeta qonawanchejta. Chaywanpis kunan chay chayaqe janaj pachapi qankunapaj waqaychasqa kashan.

⁵ Diospi atinikusqaykichejrayku qankunapis Diospa atiyninwan waqaychasqallataj kankichej, tukuy imamanta qhespichisqa kanata jap'inaykichejkama. Chayqa qhepanejman rikuchisqa kananpaj wakichisqa kashan.

⁶ Chayrayku, qankuna mayta kusikuychej, kunan tukuy imaymana llakiykunawan mana unaytachu ñak'arinaykichej kashajtinpis.

⁷ Chay ñak'ariykunaqa Diospi atinikusqaykichej cheqachus manachus kasqanta sut'inchanqa. Chaypacha Diospi atinikusqaykichej cheqapuni kajtin, qankuna Jesucristoj kutimunan p'unchayta jatunchasqa, chantá allinpaj qhawasqa kankichej. Diospi atinikusqaykichejqa qorimanta nisqaqa aswan valorniyoj, imaraykuchus qoreqa ninawan ch'uwachasqa kaspapis, tukukuyniyoj. Diospi atinikusqaykichejrí mana.

⁸ Qankunaqa Jesucristota mana rikuspalla munakunkichej. Kunanpis mana payta rikuspalla, paypi atinikunkichej, kusikunkichejtaj may jatun mana niy atina kusiywan.

⁹ Jinallataj qankuna kusisqa kawsashankichej, imaraykuchus yachankichej Diosqa qankunata qhespichisunaykichejta. Chayraykumin paypi atinikushankichej.

¹⁰ Diosmanta sut'inchajkunaqa qhespichisqa kanamanta allinta yachayta munaspa, watorqanku. Parlallarqankutaj, Dios qhasilla k'acha yanapayninpi imatachus qankunaman qonasuykichej kasharqa, chaymantapis.

¹¹ Cristoj Espíritun paykunapi kaspa, ñawpajmantapacha sut'inchasqa Cristo ñak'arinanmanta, chaymantataj jatunchasqa kananmanta ima. Paykunataj mayk'ajchus, chantá imaynamantatajchus chay kananta yachayta munaspa, mayta watorqanku.

¹² Diosrí sut'incharqa chay tukoyqa mana paykunapajchu kasqanta, manachayqa qankunapaj. Kunantaj Jesucristomanta sumaj willayta willajkuna chaymanta parlasorqachej, janaj pachamanta kachamusqa Santo Espíritoj atiyninwan. Chay jina t'ukuna imakunata angelkunapis maytapuni rikuyta munallankutaj.

Llimphu kawsayniyoj kananchejpaj Dios wajyawanchej

¹³ Chayrayku, qankuna allinta qhawarikuspa yuyaychakuychej, amataj sonqoykichejpa munasqanwan atipachikuychejchu. Chantá Dios qhasilla k'acha yanapayninrayku imatachus qosonqachej, chayta tukuy sonqo suyaychej. Chayta jap'inkichej, maypachachus Jesucristo kay pachaman ujtawan kutimonqa, chaypacha.

¹⁴ Chayrayku kasukoj wawakuna jina kaychej, amataj sonqoykichejpa munasqanta ruwaychejchu, imaynatachus ñawpajta manaraj Diosmanta allinta yachashaspa ruwaj kankichej, jinataqa.

¹⁵ Aswanpis qankuna juchamanta t'aqasqa jina allinta puriychej, imaraykuchus qankunata wajyaj Diosqa may llimphumin.

¹⁶ Diospa Qhelqachisqanpi nin: Qankunaqa Diospaj t'aqasqa kajkuna jina puriychej, imaraykuchus noqaqa may llimphumin kani, nispa.

¹⁷ Sichus Diosta Tataykichejpaj rejsikapunkichej chayqa, waj llajtayoj jina kaypi kawsanaykichejkama payta may jina jatun respetowan qhawaspa kawsaychej. Payqa sapa runata ruwasqanman jina juzgan, ni piman kutikuspa.

¹⁸ Yachankichej jina, Diosqa chay qhasi manakaj kawsaymanta ashkha preciota pagaspa kacharichisorqachej, mayqen kawsaytachus tataykichejkunamanta yachakorqankichej, chaymanta. Chay pagasqan precio mana qorichu, nitaj qolqechu karqa, imaraykuchus chaykunaqa tukukapojllamin.

¹⁹ Aswanpis, Cristo cruzpi wañuspa yawarninta jich'asqanwan qankuna kacharichisqa kankichej. Payqa mana ch'ichiyoj, mana iman imanasqa cordero jina jaywasqa karqa.

²⁰ Manaraj kay pacha ruwasqa kashajtin, Cristo chaypaj ajllasqa karqa. Paytaj kay qhepanejman rikhurimorqa qankunaj allinniykichejpaj.

²¹ Paynejta qankuna Diospi atinikunkichej, pichus Cristota wañusqamanta kawsarichispa jatuncharqa, chaymanta. Chayrayku Diospi atinikuspa, pay imatachus nisqanta qonantapuni suyakushankichej.

²² Kunantaj qankuna cheqa kajta kasusqaykichejrayku llimphuchasqaña kankichej, wawqe panaykichejta tukuy sonqowan munakunaykichejpaj. Chayrayku tukuy sonqo astawan astawan munakuychej.

²³ Qankuna watejmanta paqarerqankichej, mana wañoj tata mamamantachu. Manachayqa mana jayk'aj wañojmanta paqarerqankichej, chaytaj Diospa wiñay wiñaypaj kawsaj simi nisqannejta.

²⁴ Diospa Qhelqachisqanpi nin: Runaqa qhora jina, tukuy jatun kaynintaj qhora t'ika jinalla. Qhoraqa ch'akipun, t'ikataj t'akakapun.

²⁵ Tukuyta Kamachej Diospa simi nisqanrí wiñaynintinpaj kallanqapuni, nispa. Chay nisqaqa Jesucristomanta sumaj willaymin, mayqenchus qankunaman willasqa karqa, chay.