1 Juan 2 - DIOSPA QHELQACHISQ

Cristoqa noqanchejrayku parlarej

¹ Munasqa wawaykuna, ama juchallikunaykichejpaj kaykunata qhelqamuykichej. Chaywanpis sichus pipis juchallikun chayqa, Tata Diospa ñawpaqenpi noqanchejrayku parlarinanpaj uj tiyan. Chayqa Jesucristo, paytaj cheqantapuni ruwan.

² Paymin juchanchej pampachasqa kananpaj ñak'asqa uywata q'olachisqa jina jaywasqa karqa. Manataj noqanchejpa juchanchejraykullachu, jaywasqa karqa, astawanqa kay pachapi tukuy runaj juchankurayku.

³ Sichus Diospa kamachisqanta kasunchej chayqa, yachanchej cheqapuni Dioswan allinpi kawsakushasqanchejta.

⁴ Sichus pipis ninman: Noqaqa Dioswan allinpi kawsakushani, nispa, nitaj kamachisqanta kasunchu chayqa, chay runaqa llullamin, manataj cheqantachu parlashan.

⁵ Sichus pipis Diospa nisqanta kasun chayqa, cheqatapuni Diosta munakusqanta rejsichishan. Kay jinamanta Dioswan uj sonqolla kasqanchejta yachanchej:

⁶ Pichus Dioswan uj sonqolla kasqanta nejqa kawsanan tiyan, imaynatachus Jesús kay pachapi kawsarqa, ajinata.

Purajmanta munakuna

⁷ Munasqa wawqe panakuna, mana mosoj kamachisqatachu qhelqamuykichej, manachayqa unaymantapacha uyarerqankichej, chay kamachisqata, mayqentachus yachankichejña, chayta.

⁸ Chaywanpis, kay kamachisqaqa mosoj. Jesusqa kay kamachisqata kasuspapuni purerqa, jinallatataj qankunapis purishankichej, imaraykuchus kawsayniykichejpi laqhaqa chinkapushanña, cheqa k'anchaytaj k'anchashanña.

⁹ Sichus pipis k'anchaypiña purishasqanta nishaspa, wawqe panantataj chejnikun chayqa, laqhallapiraj kawsashan.

¹⁰ Pichus wawqe pananta munakojrí k'anchaypi purishan, manataj pitapis misk'achinanpaj jina imatapis ruwanchu.

¹¹ Wawqe pananta chejnikojrí laqhallapiraj purishan. Manataj yachanchu maymanchus rinanta, imaraykuchus laqhaqa ñawinta mana rikojta saqenchu.

¹² Munasqa wawaykuna, kayta qankunaman qhelqamuykichej, imaraykuchus juchaykichejqa Jesucristonejta pampachasqaña.

¹³ Jesucristota qhatikuypi unayniyojña kajkuna, qankunaman qhelqamuykichej, imaraykuchus qankuna Jesucristota qhatikushankichej, pichus manaraj imapis kashajtin karqañapuni, chayta. Jesucristota qhatikuypi wayna jina kallpanpi kashajkuna, qankunamanpis qhelqamullaykichejtaj, imaraykuchus qankunaqa Kuraj Supayta atipankichejña. Wawakuna, qankunamanpis qhelqamullaykichejtaj, imaraykuchus Tata Dioswan allinpi kawsakushankichej.

¹⁴ Jesucristota qhatikuypi unayniyojña kajkuna, qankunaman qhelqamuykichej, imaraykuchus qankunaqa pichus ñawpajmantapacha kajta rejsinkichejña. Jesucristota qhatikuypi wayna jina kallpaykichejpi kajkuna, qankunaman qhelqamullaykichejtaj, imaraykuchus sinch'i kallpayoj kankichej, Diospa simi nisqantapis sonqoykichejpi jap'ikunchej, chantá Kuraj Supayta atiparqankichej.

¹⁵ Ama qankunaqa Diosman mana kutirikojkuna jina kawsayta munaychejchu, nitaj kay pachapi mana allin imakunatapis munakuychejchu. Pichus Diosman mana kutirikojkuna jina kawsayta munajqa Tata Diosta mana munakunchu.

¹⁶ Kay pachapi kaykuna tiyan: Juchallinaman aysaj sonqoj mana allin kajta munaynin, ñawej rikusqanta imata jina munapayay, imatachus tarisqanmanta chayrí kapuyninmanta runaykachay ima. Chay tukoyqa mana Tata Diosmantachu, manachayqa Diosman mana kutirikojkunamanta.

¹⁷ Kay pachapi mana allin kajqa tukukapushan, jinallataj mana allinta kajta munanapis. Diospa munayninta ruwajrí, wiñaypaj kawsanqa.

Cristoj contranpi sayarejkunamanta qhawakuna

¹⁸ Munasqa wawaykuna, kay tiempo tukukapunan qayllapiña kashanchej. Qankuna kay tiempo tukukunan qayllata Cristoj contranpi sayarej rikhurimunanmanta uyarerqankichej. Kunantaj Cristoj contranpi sayarejkuna ashkha rikhurimunkuña. Chayrayku yachanchej kay tiempo tukukapunan qayllapiña kashasqanchejta.

¹⁹ Paykunaqa noqaykuwan khuska karqanku. Chaywanpis mana noqaykumantapunichu karqanku. Noqaykumantachus kankuman karqa chayqa, paykunaqa noqaykuwan qhepakunkuman karqa. Jinapis llojsipuspa, mana jayk'ajpis noqaykumantachu kasqankuta yachayta qorqanku.

²⁰ Aswanpis Cristoqa Santo Espiritunejta qankunata paypaj t'aqasorqachej, tukuyniykichejtaj cheqa kajta yachankichej.

²¹ Manamin cheqa kajta mana rejsisqaykichejraykuchu noqa kayta qhelqamuykichej, manachayqa cheqa kajta rejsisqaykichejrayku. Jinallataj qankuna cheqan kaj mana cheqan kajmanta waj jina kasqanta yachankichej.

²² Pitaj llullari? Pichus yachachishaspa nin: Jesusqa mana Diospa kachamusqan Cristochu, nispa. Chay runamá Cristoj contranpi sayarejqa, imaraykuchus Tata Diosta, Diospa Churintawan ima qhesachan.

²³ Pichus Diospa Churinta qhesachajqa mana Tata Dioswanchu kashan. Pichus Churita Cristo kasqanta nejrí Tata Dioswan kashan.

²⁴ Chayrayku, imatachus qallariymantapacha yachachisorqachej, chayta kasuspa ama sayk'uychejchu. Sichus qallariymantapacha yachasqaykichejta kasuspallapuni kankichej chayqa, Churiman, Tata Diosman ima ujchasqa kashankichej.

²⁵ Chaymá chay wiñay kawsayqa, mayqentachus kikin Jesucristo qonawanchejta nerqa, chay.

²⁶ Noqa kay imakunata qhelqamuykichej qankunata pantachiyta munajkunamanta qhawakunaykichejpaj.

²⁷ Qankunamanrí Diosqa Santo Espirituta qosorqachej, paytaj qankunapi tiyakushan. Chayrayku mana pejpa yachachinanrajchu kanaykichej tiyan, manachayqa Santo Espíritu tukuy imata yachachisunkichej. Paypa yachachisqanqa cheqanmin, manataj llullachu. Chayrayku qankunaqa Cristowan allinpipuni kawsakuychej, imaynatachá Santo Espíritu yachachisorqachej, ajinata.

²⁸ Kunanqa, wawaykuna, Cristowan allinpipuni kawsakuychej, pay ujtawan kutimojtin, mana manchachikuspa, nitaj p'enqakuspa, paypa ñawpaqenpi rikhurinanchejpaj.

²⁹ Qankuna yachankichejña Jesucristo cheqanta ruwaj kasqanta. Yachallankichejtaj cheqan kajta ruwajkunaqa cheqapuni Diospa wawankuna kasqankuta.